CR-V ឆ្នាំ ២០១៨ ប្រើម៉ាស៊ីន Hybrid បង្ហាញខ្លួនព្រឹកមិញ

2017-09-14 04:03:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Honda បាននាំយក CR-V ឆ្នាំ ២០១៨ រថយន្តប្រភេទ SUV ដំបូងរបស់ខ្លួនដែលមានប្រើម៉ាស៊ីន Hybrid ទៅដាក់តាំងបង្ហាញក្នុងកម្មវិធីតាំងបង្ហាញរថយន្តនាប្រទេសអាល្លឺម៉ង់។

រថយន្តដែលដាក់តាំងបង្ហាញជាប្រភេទផលិតគំរូ ហេតុនេះក្រុមហ៊ុនមិនបានរៀបរាប់លម្អិតពីប្រព័ន្ធHybrid ឈ្មោះ Intelligent Multi Mode Drive ដែលប្រើលើរថយន្តម៉ូដែលនេះឡើយ។ ប៉ុន្តែបានឲ្យដឹងថារថយន្តនេះមានបំពាក់ម៉ាស៊ីន i-VTEC ចំណុះ ២,០ លីត្រ អមជាមួយម៉ូទ័រអគ្គិសនី និងមានម៉ូទ័របម្លែងថាមពលមួយ ហើយមានប្រព័ន្ធបើកបរ ៣ ប្រភេទ។

៣ ប្រភេទនោះរួមមាន EV Drive, Hybrid Drive និង Engine Drive។ ចំពោះ EV Drive ម៉ូទ័រអគ្គិសនីត្រូវប្រើថាមពលដែលមកពីអាគុយទាំងស្រុង។ ចំណែក Hybrid Drive ម៉ាស៊ីនប្រើប្រេងឥន្ធនៈធម្មតាជាអ្នកផ្គត់ផ្គង់ថាមពលទៅម៉ូទ័របម្លែងថាមពល ដើម្បីផលិតថាមពលឲ្យម៉ូទ័រអគ្គិសនី ហើយក៏អាចផ្ដល់ថាមពលខ្លះៗសម្រាប់ស្តុកទុកក្នុងអាគុយផងដែរ។ ចុងក្រោយ Engine Drive អនុញ្ញាតឲ្យម៉ាស៊ីនប្រេងឥន្ធនៈផ្ដល់ថាមពលដល់កង់ទាំងបួនដោយផ្ទាល់ ហើយមានម៉ូទ័រអគ្គិសនីជាអ្នកបន្ថែមថាមពលពេលចាំបាច់។

CR-V Hybrid ឆ្នាំ ២០១៨ នេះនឹងមានលក់លើទីផ្សារអឺរ៉ុបនាឆ្នាំ ២០១៨ ខាងមុខ ដោយមិនបានបញ្ជាក់ពីតម្លៃលក់ឡើយ។ Honda ក៏បានបញ្ជាក់ដែរថា CR-V ជំនាន់ថ្មីនេះនឹងមិនមានជាប្រភេទប្រើម៉ាស៊ីនម៉ាស៊ូតសម្រាប់លក់លើទីផ្សារអឺរ៉ុបនោះទេ៕

ប្រភព៖ carscoops ប្រែសម្រួល៖ សុខហេង