ប្រទេសណាខ្លះគ្រោងនឹងបញ្ចប់ជីវិតរថយន្តសាំង និងម៉ាស៊ូតនាពេលអនាគត?
- 2017-09-14 12:22:50
- ចំនួនមតិ 0 | ចំនួនចែករំលែក 0
ប្រទេសណាខ្លះគ្រោងនឹងបញ្ចប់ជីវិតរថយន្តសាំង និងម៉ាស៊ូតនាពេលអនាគត?
ចន្លោះមិនឃើញ
ប្រទេសនៅជុំវិញពិភពលោកកំពុងនាំគ្នាបញ្ចប់ជីវិតរថយន្តប្រើសាំង និងម៉ាស៊ូតដែលក្នុងនោះមានចិន អង់គ្លេស ន័រវែស បារាំង អាល្លឺម៉ង់ និង ឥណ្ឌាជាដើម ។
ប្រទេសចិន៖ ដែលជាទីផ្សាររថយន្តធំជាងគេរបស់ពិភពលោកបច្ចុប្បន្នកំពុងធ្វើការលើគម្រោងបញ្ចប់ការផលិតនិងលក់រថយន្តប្រើសាំង និងម៉ាស៊ូត ។
ចក្រភពអង់គ្លេស៖ អង់គ្លេសឱ្យដឹងកាលពីខែកក្កដាថា ខ្លួននឹងហាមប្រាមការលក់រថយន្តសាំងនិងម៉ាស៊ូតថ្មីនៅឆ្នាំ ២០៤០ ដែលជាផ្នែកនៃការសម្អាតបរិយាកាសក្នុងប្រទេស ហើយនៅឆ្នាំ ២០៥០ រថយន្តទាំងអស់នឹងគ្មានជាតិពុល ១០០% ។ កាលពីឆ្នាំ ២០១៦ រថយន្តថ្មីជិត ២,៧ លានគ្រឿងត្រូវបានចុះបញ្ជីធ្វើឱ្យប្រទេសអង់គ្លេសក្លាយជាទីផ្សាររថយន្តធំជាងគេទី៦ក្នុងលោក ។
បារាំង៖ រដ្ឋាភិបាលរបស់ប្រទេសបារាំងក៏មានគោលដៅដូចអង់គ្លេសដែរពោលគឺនៅឆ្នាំ ២០៤០ ខ្លួននឹងបញ្ចប់ការលក់រថយន្តសាំង និងម៉ាស៊ូតដើម្បីកាត់បន្ថយការឡើងកម្ដៅផែនដី ។ បន្ទាប់ពីឆ្នាំ ២០៤០ ប្រទេសនឹងមានរថយន្តអគ្គិសនី និងរថយន្តប្រភេទ hybrid ។ យ៉ាងណាមិញចំណែកទីផ្សាររថយន្តអគ្គិសនី ប្រភេទ hybrid និងរថយន្តប្រើឥន្ធនៈក្នុងប្រទេសបារាំងមានទំហំតូចចង្អៀតមាន ៤% តែប៉ុណ្ណោះ តែរីកចម្រើនយ៉ាងឆាប់រហ័សក្នុងនោះការលក់កើនឡើង ២៥% ក្នុងត្រីមាសទី១ឆ្នាំ ២០១៧ នេះ។
អាល្លឺម៉ង់៖ អធិការបតីអាល្លឺម៉ង់លោកស្រី Angela Merkel ត្រូវបានចោទសួរកាលពីខែមុនរឿងកំណត់កាលបរិច្ឆេទបញ្ចប់ការលក់រថយន្តម៉ាស៊ូត និងសាំង។ លោកស្រីតបថា មិនអាចកំណត់ពេលវេលាច្បាស់លាស់នោះទេ តែយើងបាននឹងកំពុងជំរុញការវិនិយោគក្នុងការផ្លាស់ប្ដូររចនាសម្ព័ន្ធ និងបច្ចេកវិទ្យាសម្រាប់រថយន្តអគ្គិសនីពេញលេញហើយ ។
ឥណ្ឌា៖ រដ្ឋាភិបាលឥណ្ឌាកំណត់គោលដៅនៅឆ្នាំ ២០៣០ នឹងមានរថយន្តអគ្គិសនីលក់ពេញប្រទេស ។ ន័រវែស៖ គោលដៅច្បាស់លាស់នៃគ្រោងការដឹកជញ្ជូនរបស់ប្រទេសន័រវែសគឹ រថយន្តថ្មីទាំងអស់លក់ក្នុងប្រទេសនៅឆ្នាំ ២០២៥ ដាច់ខាតជាប្រភេទរថយន្តគ្មានភាយជាតិពុល ។ យ៉ាងណាមិញន័រវែសកំពុងក្លាយជាប្រទេសនាំមុនគេទៅហើយព្រោះ ៤០%នៃរថយន្តដែលលក់ក្នុងប្រទេសកាលពីឆ្នាំមុនសុទ្ធសឹងតែជារថយន្តអគ្គិសនី ឬប្រភេទ hybrid ទាំងអស់ ។
យោងតាមទីភ្នាក់ងារថាមពលអន្តរជាតិ IEA ថា មានប្រទេស៨ផ្សេងទៀតដែលកំណត់គោលដៅផ្លូវការសម្រាប់រថយន្តអគ្គិសនីដូចជាប្រទេស អូទ្រីស ដាណឺម៉ាក អៀរឡង់ ជប៉ុន ហូឡង់ ព័រទុយហ្គាល់ កូរ៉េ និងប្រទេសអេស្ប៉ាញ ។ ដោយឡែកអាមេរិកមិនទាន់មានគោលនយោបាយនៅឡើយទេ តែរដ្ឋចំនួន៨បានកំណត់គោលដៅរួចទៅហើយ ។ គួរបញ្ជាក់ថា នៅទូទាំងពិភពលោកមាន ៩៥%នៃរថយន្តអគ្គិសនីត្រូវបានលក់ក្នុងប្រទេសចំនួន១០ប៉ុណ្ណោះគឺ ចិន អាមេរិក ជប៉ុន កាណាដា ន័រវែស អង់គ្លេស បារាំង អាល្លឺម៉ង់ ហូឡង់ និងប្រទេសស៊ុយអែត ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
