ក្រសួងអប់រំគ្រោងបង្កើត"បណ្ណាល័យអនឡាញ" ដើម្បីជំរុញការអានសៀវភៅចម្រុះទូទាំងប្រទេស
- 2017-09-20 04:30:00
- ចំនួនមតិ 0 | ចំនួនចែករំលែក 0
ក្រសួងអប់រំគ្រោងបង្កើត"បណ្ណាល័យអនឡាញ" ដើម្បីជំរុញការអានសៀវភៅចម្រុះទូទាំងប្រទេស
ចន្លោះមិនឃើញ
ដើម្បីលើកកម្ពស់ការអាន ក្រសួងអប់រំ យុវជន និងកីឡា គ្រោងបង្កើត "បណ្ណាល័យអនឡាញ" ប្រមូលសៀវភៅអានចម្រុះ ទទួលបានអំណាចនៃការអាន និងសិក្សាស្រាវជ្រាវបានទូលំទូលាយ ខណៈបណ្ណាល័យសម្រាប់សិស្សចូលអាន មិនមានគ្រប់គ្រាន់នៅតាមសាលារៀននៅទូទាំងប្រទេសឡើយ។
ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ បានថ្លែងក្នុងពិធីជួបជុំបណ្ណារក្សនៅបណ្ណាគារ Monument Book នាថ្ងៃម្សិលមិញនេះ បានថ្លែងថា ក្រសួងអបរំមានគម្រោងបង្កើត E-Library បណ្ណាល័យអនឡាញ សម្រាប់សិស្សានុសិស្សទទួលបានការសិក្សាស្រាវជ្រាវ និងពង្រីកភាសាអំណាននៅក្នុងប្រទេសកម្ពុជា។ ឯកឧត្តមបន្ថែមថាៈ «នេះជាគម្រោងលើកទឹកចិត្តសិស្សឲ្យអានអាចទាំងអក្សរសាស្ត្រខ្មែរ និងបរទេស»។
រដ្ឋមន្ត្រីក្រសួងអប់រំ បានលើកឡើងថា ការសរសេរ និងអានរបស់យុវជនក្នុងពេលបច្ចុប្បន្នមានការធ្លាក់ចុះ ខណៈសិស្សភាគច្រើនពេញចិត្តការវាយអក្សរដោយប្រើកុំព្យូទ័រជាង។ ហេតុដូច្នេះ ទើបក្រសួងអប់រំដាក់ឲ្យមានការសរសេរតែងសេចក្ដី ដើម្បីឲ្យសិស្សអានច្រើន និងសរសេរឲ្យបានច្រើន។ នារយៈពេលកន្លងមកនេះ ក្រសួងអប់រំក៏បានបង្កើតឲ្យមានកម្មវិធីប្រឡងប្រណាំងអំណានជាតិ ដោយការប្រឡងនេះ គឺធ្វើឡើងដើម្បីជម្រុញ សិស្ស យុវជនរៀនសូត្រស្រាវជ្រាវ និងពង្រីកចំណេះបន្ថែម។
លោក ឧកញ៉ា គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បន្ថែមថា បណ្ណារក្សដើរតួសំខាន់ក្នុងបណ្ណាល័យសាលា ពួកគាត់ជាអ្នកពន្យល់ណែនាំ ជម្រុញ និងរៀបចំកាលវិភាគជួបជុំជាដើម។ ការជួបជុំ បណ្ណារក្ស ជាឱកាសមួយល្អដើម្បីបំផុសគំនិតល្អឲ្យកូនខ្មែរចាប់ផ្ដើមអាន។
លោក ម៉េង ហៀង អគ្គនាយកក្រុមហ៊ុន Monument Book មើលឃើញថា នៅក្នុងវិស័យអប់រំ ការប្រើប្រាស់ប្រព័ន្ធឌីជីថល ជាញឹកញាប់អាចមានប្រសិទ្ធភាពតិចជាងសៀវភៅសិក្សា។ លោកគូសបញ្ជាក់ថា លទ្ធផលល្អនៃការបង្រៀន តាមសៀវភៅនៅតែពេញនិយម និងឲ្យតម្លៃពីកុមារនៅទូទាំងពិភពលោក ហើយក៏ជាការរួមចំណែករីកចម្រើនដ៏ធំមួយក្នុងការជម្រុញការបោះពុម្ភសៀវភៅសម្រាប់កុមារផងដែរ។
ដោយសារតែបែបនេះ ទើបបង្កើតឲ្យមានកម្មវិធីជួបជុំបណ្ណារក្សលើកដំបូងនេះឡើង ដើម្បីប្រមូលអ្នកឯកទេសផ្នែកអប់រំ បណ្ណារក្ស និងថ្នាក់ដឹកនាំសាលា ពិនិត្យពីគម្លាតការអានរបស់សិស្សនៅតាមសាលា និងរកវិធីសាស្ត្របញ្រ្ចៀបការអានដល់សិស្សឲ្យបានច្រើន។ លោក ម៉េង ហៀង បន្ថែម។
គួរជម្រាបបន្ថែមថា បណ្ណាល័យនៅសាលារៀនសរុបនៅកម្ពុជាមានប្រមាណ ៥ ៣០០ បណ្ណាល័យ ក្នុងនោះថ្នាក់បឋមសិក្សា មានបណ្ណាល័យចំនួន ៤០០០ ចំណែកថ្នាក់អនុវិទ្យាល័យមានចំនួន ៨០០ និងថ្នាក់វិទ្យាល័យ មានចំនួនប្រហែល ៥០០បណ្ណាល័យ ខណៈមានថ្នាក់រៀនសរុបចំនួនប្រមាណជាង ៨ ៧០០ថ្នាក់ នៅទូទាំងប្រទេស៕