គ្រាន់តែចេះបកស្លា មិនខ្វះទេលុយចាយ!
- 2017-09-16 14:44:38
- ចំនួនមតិ 0 | ចំនួនចែករំលែក 0
គ្រាន់តែចេះបកស្លា មិនខ្វះទេលុយចាយ!
ចន្លោះមិនឃើញ
«គ្រាន់តែចេះបកស្លា មិនខ្វះទេលុយចាយ» នេះជាអ្វីដែលក្មេងៗ នៅក្នុងភូមិមួយចំនួន ក្នុងឃុំជប់ ស្រុកត្បូងឃ្មុំ ប្រាប់អ្នកយកព័ត៌មានសប្បាយ។ ឃុំជប់ ជាឃុំមួយដែលសម្បូរចម្ការស្លាច្រើនជាងគេ នៅក្នុងស្រុកត្បូងឃ្មុំ ខេត្តត្បូងឃ្មុំ។ ទន្ទឹមគ្នានេះ រដូវដែលគេអាចប្រមូលផលស្លាបាន គឺចន្លោះពីខែមិថុនា ដល់ខែវិច្ឆិកា។
កុមារី ជឹង ស្រីណាត់ អាយុ១៣ឆ្នាំ ជាសិស្សថ្នាក់ទី៦ នៃសាលាបឋមសិក្សា៧មករា ឃុំជប់ និយាយថា នាងស៊ីឈ្នួលបកស្លាឱ្យគេ បាន៤ឆ្នាំហើយ។ ក្នុងមួយថ្ងៃៗ នាងអាចបកបាន ពី១ពាន់ ទៅ ៥ពាន់គ្រាប់ ហើយទទួលបានប្រាក់ឈ្នួលពី ៥ពាន់រៀល ទៅ២ម៉ឺន៥ពាន់រៀល។ នៅពេលវ៉ាកងនេះ នាងមកបកស្លាឱ្យគេរាល់ថ្ងៃ តែពេលចូលរៀនវិញ នាងបកតែថ្ងៃអាទិត្យប៉ុណ្ណោះ។ ឯប្រាក់ដែលនាងរកបាន គឺយកទៅឱ្យឪពុកសន្សំទុក។
ដូចគ្នានេះដែរ កុមារី តី ពិសី អាយុ១១ឆ្នាំ ដែលកំពុងបកស្លានៅផ្ទះមួយផ្សេងទៀត ឱ្យដឹងដែរថា ក្នុងមួយថ្ងៃៗនាង បកបានពី ៥០០ ទៅ ៨០០គ្រាប់ ហើយក្នុងមួយគ្រាប់នាងទទួលបានប្រាក់ឈ្នួល ៦០រៀល។ ពិសី ថា ការបកស្លានេះ មានភាពងាយស្រួល ធ្វើការក្នុងម្លប់ និងទទួលបានលុយភ្លាមៗ។ លុយដែលនាងទទួលបាន គឺទុកសម្រាប់ទិញសម្ភារៈសិក្សា និង សម្លៀកបំពាក់។
ដោយឡែក អ្នកស្រី សាំង សារិ អាយុ៤៥ឆ្នាំ អ្នករកស៊ីម៉ៅចម្ការស្លា និង ផលិតស្លាក្រៀម នៅឃុំជប់ បានឱ្យដឹងថា បន្ទាប់ពីបេះផ្លែស្លារួចហើយ អ្នកស្រីត្រូវជួលក្មេងៗ ឬមនុស្សធំដែលទំនេរ ឱ្យមកជួយបកសម្បកស្លា ដោយឱ្យថ្លៃឈ្នួលមួយគ្រាប់ពី ៥០ ទៅ ៦០ រៀល។ ក្នុងមួយថ្ងៃអ្នកស្រី ទទួលបានគ្រាប់ស្លាដែលបកសម្បកស្អាតជាច្រើនម៉ឺនគ្រាប់។ ទាក់ទងនឹងការជួលក្មេងៗមកបកស្លានេះ អ្នកស្រី និយាយថា ការបកសម្បកស្លា ជាការងារស្រាលដែលក្មេងៗអាចធ្វើបាន ហើយអាចឱ្យពួកគេដឹងពីតម្លៃលុយ ចេះរកលុយ និងសន្សំលុយ ដែលបានមកពីកម្លាំងពលកម្មរបស់ខ្លួនផ្ទាល់៕