មកមើលការវិវត្ត Logo របស់ក្លឹបធំៗក្នុងលីគកំពូលអង់គ្លេស
- 2017-09-20 07:16:00
- ចំនួនមតិ 0 | ចំនួនចែករំលែក 0
មកមើលការវិវត្ត Logo របស់ក្លឹបធំៗក្នុងលីគកំពូលអង់គ្លេស
ចន្លោះមិនឃើញ
និមិត្តសញ្ញា ឬ Logo តំណាងរបស់ក្លឹបជាអត្តសញ្ញាណមួយយ៉ាងសំខាន់ ប៉ុន្តែអ្វីៗតែងតែប្រែប្រួលចៀសមិនផុតនោះទេ។ ដូចគ្នា និមិត្តសញ្ញារបស់ក្លឹបបាល់ទាត់ធំៗទាំង៦ក្នុងលីគកំពូលអង់គ្លេសក៏មានការវិវត្តពីមួយដំណាក់កាល ទៅមួយដំណាក់កាលរហូតដល់ Logo ដែលប្រិយមិត្តបាល់ទាត់ស្គាល់រាល់ថ្ងៃ ដែលការប្រែប្រួលនោះមានដូចតទៅ៖
១ Arsenal៖ និមិត្តសញ្ញាតំណាងក្លឹបយក្សអង់គ្លេសមួយនេះ មានការប្រែប្រួលធំៗ៣ដង។ ដំបូង Logo ក្លឹបនេះមានរូបកាំភ្លើងធំចំនួន៣ ក្រោយមកសញ្ញានេះត្រូវបានផ្លាស់ប្ដូរមកជាកាំភ្លើងធំតែមួយគ្រឿងប៉ុណ្ណោះបែរទៅឆ្វេង។ យ៉ាងណា ឆ្នាំ១៩៤៩ រូបសញ្ញាកាំភ្លើងធំនេះត្រូវបានប្តូរឲ្យបែរទៅស្កាំវិញ ដែលប្រិយមិត្តស្គាល់រាល់ថ្ងៃនេះបង្កើតឡើងក្នុងឆ្នាំ ២០០២ និងដាក់ឲ្យប្រើប្រាស់រហូតដល់សព្វថ្ងៃ។
២ Chelsea៖ រូបសញ្ញាក្លឹបនេះមានការវិវត្តធំៗ៤ដង។ ដំបូងមានរូបមនុស្សចាស់ ក្រោយមកប្ដូរជារូបជាតោខៀវក្នុងអំឡុងឆ្នាំ ១៩៥០ ហើយត្រូវបានកែម្ដងទៀតក្នុងឆ្នាំ ១៩៨៦ ដោយប្ដូរទៅជារូបតោខៀវលាយក្រហមជាមួយនឹងអក្សរ CFC។ ទើបតែឆ្នាំ ២០០៥ ប៉ុណ្ណោះដែលក្លឹបនេះប្ដូរនិមិត្តសញ្ញារបស់ខ្លួនមកនិមិត្តសញ្ញាសព្វថ្ងៃ។
៣.Liverpool៖ រូបហង្សជានិមិត្តសញ្ញាសម្រាប់ក្លឹបជើងឯកលីគកំពូលអង់គ្លេស ១៨សម័យមួយនេះតាំងក្លឹបនេះកកើតមកក្នុងឆ្នាំ ១៨៩២។ ឆ្នាំ ១៩៨០ ក្លឹបនេះបានធ្វើការកែប្រែនិមិត្តសញ្ញាតំណាងក្លឹបរបស់ខ្លួនដោយរក្សាទុករូបហង្សឲ្យនៅដដែល ប៉ុន្តែបន្ថែមខែល និងសរសេរឈ្មោះពេញរបស់ក្លឹប។ ដើម្បីរំលឹកដល់អ្នកគាំទ្រក្លឹបមួយនេះដែលបានស្លាប់ក្នុងសោកនាដកម្ម Hillsborough។ ក្នុងអំឡុងឆ្នាំ ១៩៩០ ក្លឹបហង្សក្រហមបានបន្ថែមពាក្យថា You'll Never Walk Alone នៅពីលើរូបហង្ស ដែលនិមិត្តសញ្ញានេះត្រូវបានប្រើប្រាស់រហូតដល់សព្វថ្ងៃ។
៤-Manchester City
ដំបូងក្លឹបនេះ យកនិមិត្តសញ្ញារបស់ទីក្រុង Manchester មកធ្វើជានិមិត្តសញ្ញាតំណាងរបស់ក្លឹប។ អំឡុងសតវត្សទី២០ ក្លឹបមួយនេះបានកែប្រែទៅជា Logo ដែលមានរាងរង្វង់ និងមានរាងរៅស្រដៀងនឹងនិមិត្តសញ្ញាតំណាងសព្វថ្ងៃ។ ក្នុងឆ្នាំ ១៩៩៨ក្លឹបមួយនេះបានធ្វើការកែប្រែនិមិត្តសញ្ញារបស់ខ្លួនម្ដងទៀតទៅជារូបឥន្ទ្រី ប៉ុន្តែឆ្នាំ២០១៦កន្លងទៅនេះ ក្លឹបយក្សអង់គ្លេសមួយនេះបានប្ដូរទៅប្រើនិមិត្តសញ្ញា ដែលមានលក្ខណៈស្រដៀងនឹងនិមិត្តសញ្ញារបស់ក្លឹបដែលប្រើក្នុងអំឡុងសតវត្សទី ២០។
៥.Manchester United៖ ដូចក្លឹប Manchester City ដែរ ក្លឹបមួយនេះក៏បានប្រើនិមិត្តសញ្ញារបស់ទីក្រុង Manchester ដើម្បីតំណាងក្លឹបរបស់ខ្លួន។ ក្រោយមកក្នុងអំឡុងឆ្នាំ ១៩៦០ ក្លឹបមួយនេះបានកែប្រែនិមិត្តសញ្ញារបស់ខ្លួនទៅជានិមិត្តសញ្ញាដែលមាននៅក្នុងរូប (កណ្ដាលឆ្វេង)។ ក្នុងអំឡុងឆ្នាំ ១៩៨០ រូបបិសាចត្រូវបានដាក់បញ្ចូលនៅចំកណ្ដាលនិមិត្តសញ្ញារបស់ក្លឹបមួយនេះ ហើយក្នុងឆ្នាំ ១៩៩៨ ពាក្យ Football Club ត្រូវបានលុបចោល ពីនិមិត្តសញ្ញារបស់ក្លឹបមួយនេះ ហើយនិមិត្តសញ្ញានេះត្រូវបានប្រើប្រាស់រហូតដល់សព្វថ្ងៃ។
៦.Tottenhem Hotspurs៖ រូបមាន់ឈរលើបាល់ជាអត្តសញ្ញាណយ៉ាងសំខាន់របស់ក្លឹបមួយនេះ។ ដំបូងក្លឹបមួយនេះមាននិមិត្តសញ្ញាតែមាន់ឈរលើបាល់ដែលស្រដៀងនឹងនិមិត្តសញ្ញាបច្ចុប្បន្ន តែក្រោយមកត្រូវបានកែដោយថែមខែល និងរូបតោ ក្នុងអំឡុងឆ្នាំ ១៩២០ តែក្រោយមក ក្នុងកំឡុងឆ្នាំ១៩៨០ រូបខែលត្រូវបានលុបចោល ហើយក្នុងឆ្នាំ ២០០៦ ក្លឹបបានរក្សាទុកតែរូបមាន់ឈរលើបាល់ ជាមួយនឹងឈ្មោះក្លឹបប៉ុណ្ណោះ ដែលជានិមិត្តសញ្ញាតំណាងក្លឹប Spurs រហូតដល់ពេលបច្ចុប្បន្ន៕