Borussia Dortmund គឺ​ជា​ក្រុម​មួយ​ក្នុង​ចំណោម​៨​ដែល​ Real Madrid មិន​ដែល​ឈ្នះ​ក្រៅ​ទឹកដី​ក្នុង​ពាន​រង្វាន់​ UEFA Champions League។ ក្រុម​ជើងឯក​អឺរ៉ុប​១២​សម័យ​កាល​នឹង​ត្រូវ​ធ្វើ​ដំណើរ​ទៅ​ទឹកដី​ Signal Iduna Park នៅ​យប់​នេះ​ដើម្បី​ប្រកួត​លើក​ទី​ពីរ​វគ្គ​ជម្រុះ​ក្នុង​ពូល។

តើ​មាន​ក្រុម​ណា​ខ្លះ​ដែល​ស្ដេច​.ស​មិន​ស្គាល់​ពាក្យ​ថា​ឈ្នះ​នៅ​ក្រៅ​ទឹកដី?

១. Juventus ប៉ះ​គ្នា​ជាមួយ​ក្រុម​ជើង​ខ្លាំង​អ៊ីតាលី​៦​លើក​នៅ​ទឹកដី​ Allianz Stadium ក្រុម​ Real Madrid ចាញ់​៥​ និង​ស្មើ​មួយ​ ជា​កំណត់ត្រា​អាក្រក់​បំផុត​របស់​ពួកគេ​នៅ​ Champions League។

២. Dortmund យប់​នេះ​ក្រុម​រហស្សនាម​ថា Los Blancos នឹង​ប៉ះ​ Dortmund សារ​ជា​ថ្មី​ខណៈ​កំណត់ត្រា​កន្លង​មក​នៅ​ទឹកដី​Signal Iduna Park គឺ Real ស្មើ​៣ និង​ចាញ់​៣។

៣. Olympiacos Real ធ្លាប់​ធ្វើ​ដំណើរ​ទៅ​ទីក្រុង​អាតែន​ ប្រទេស​ក្រិក​ចំនួន​៤​លើក​ដើម្បី​ប្រកួត​ជាមួយ​ Olympiacos។ បើ​ទោះ​ជា​សមត្ថភាព​កីឡាករ​ទាំង​ពីរ​ក្រុម​ហាក់​មិន​ប្រដំប្រសងគ្នា​តែ​ ក្រុម​យក្ស​អេស្ប៉ាញ​មិន​ធ្លាប់​ឈ្នះ​នោះ​ទេ​ពោល​គឺ​ស្មើ​៣ និង​ចាញ់​១។

៤. AC Milan ជើង​ឯក​អឺរ៉ុប​៧​សម័យ​កាល​ AC Milan វិញ​ក៏​ធ្វើ​ឲ្យ​ Real ចុកចាប់​មិន​តិច​ដែរ​នៅ​ទឹកដី​ San Siro ដោយ​សារ​ប្រកួត​នៅ​ទីនោះ​៣ដង​ Real ស្មើ​២ និង​ចាញ់​១។

៥. Spartak Moscow ប៉ះ​គ្នា​២​ដង​ជាមួយ​ក្រុម​ខ្លាំង​មក​ពី​រុស្ស៊ី​ Real Madrid ចាញ់​ទាំង​២​លើក។

៦. Atletico Madrid ក្រុម​ទាំង​ពីរ​ប៉ះ​គ្នា​ច្រើន​នៅ​ការ​ប្រកួត​ពាន​ក្នុង​ស្រុក​របស់​អេស្ប៉ាញ​តែ​នៅ​ Champions League វិញ​គឺ​២​ប្រកួត​កន្លង​មក​ Real ចាញ់​១​ ស្មើ​១។

៧. Lazio Real Madrid មិន​ដែល​ឈ្នះ​ Lazio នោះ​ទេ​នៅ​ទឹកដី​ Stadio Olimpico ហើយ​ Lazio ក៏​មិន​ដែល​ឈ្នះ​ Real ដូចគ្នា​ ដោយ​២​ប្រកួត​កន្លង​មក​ក្រុម​ទាំង​ពីរ​​ស្មើ​គ្នា​រាល់​លើក។

៨. Manchester City Real ធ្លាប់​មាន​ប្រវត្តិ​ទម្លាក់​ Man City ចេញ​ពី​ Champions League វគ្គ​ពាក់​កណ្ដាល​ផ្ដាច់​ព្រ័ត្រ​ប៉ុន្តែ​ប្រវត្តិ​ជួប​គ្នា​២​លើក​នៅ​ទឹកដី Etihad គឺ​ក្រុម​ទាំង​ពីរ​ស្មើ​គ្នា​ទាំង​អស់៕