រឿងលម្អិត ខ្ញុង សែនព្រេនជាមួយនាយកៃដ ធ្វើជាប្ដីប្រពន្ធ

2017-09-27 02:00:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតតារាកំប្លែងមេម៉ាយកូន១អ្នកនាង ខ្ញុង បានសារភាពព្រមទទួលស្គាល់ថាខ្លួនពិតជាមានទំនាក់ទំនងស្នេហ៍ស៊ីជម្រៅជាមួយនាយកៃដពិតមែន។ នាងបញ្ជាក់ថា អ្នកទាំង២ថែមទាំងបានសែនព្រេនជាមួយគ្នា នៅមុខចាស់ទុំទាំងសងខាងទៀតផង ហើយបច្ចុប្បន្នកំពុងតែរស់នៅជាប្ដីប្រពន្ធតែម្ដង។

ខ្ញុងថ្លែងថា ដំបូងឡើយខ្លួនគិតថា ចង់លាក់បាំងខ្លាចមហាជនដឹងថា មានប្ដីហើយអាចធ្លាក់ប្រជាប្រិយភាព ប៉ុន្តែដោយដំណឹងស្នេហានេះមហាជនបានដឹងខ្លះហើយ ក៏ព្រមទម្លាយឲ្យអស់សាច់រឿងតែម្ដងទៅ។ អ្នកនាង ស្រេង សុគន្ធដា ហៅខ្ញុង បានរៀបរាប់ឲ្យដឹងថា នាងនិងនាយកៃដដំបូងឡើយគឺរាប់អានគ្នាធម្មតាទេ ដែលកាលនោះ នាយកៃដ មិនបានជាប់នៃការប្រឡងឡើយ។

ខ្ញុងបានបន្តថា ក្រោយពីនាងក្លាយជាតារាកំប្លែងមក នាយកៃដ ក៏បាត់ទំនាក់ទំនងនឹងគ្នាជាង២ឆ្នាំ គឺទើបតែខាង CTN ហៅអតីត អ្នកដែលមានសមត្ថភាពដែលធ្លាប់ចូលប្រឡង មកចូលលេងកំប្លែងដោយពង្រីកក្រុមថ្មី ទើបបានជួបគ្នាម្ដងទៀត ហើយក៏ចាប់ផ្ដើមមានទំនាក់ទំនងគ្នាស៊ីជម្រៅបន្តិចម្ដងៗ។

ខ្ញុងលើកឡើយថា នាយកៃដ ធ្លាប់មានប្រពន្ធ និងមានកូនប្រុសម្នាក់អាយុប្រហែល៤ឆ្នាំ ដោយប្រពន្ធនាយកៃដ កាលដែលយកគ្នាជាប្ដីប្រពន្ធនោះ មិនបានរៀបការ ឬចុះសំបុត្រអាពាហ៍ពិពាហ៍ជាមួយគ្នាទេ។

តាមការរៀបរាប់របស់ខ្ញុង នាយកៃដ ទើបតែលែងលះប្រពន្ធ ដាច់ស្រេចជាង៥ខែនេះទេ ខ្ញុងថា ដោយឃើញ នាយកៃដ តាមស្រលាញ់នាងយូរហើយ និងឃើញថា នាយបានលែងលះប្រពន្ធដាច់ស្រេចមិនជំពាក់ជំពិនស្រីណាផ្សេងទៀត គួបផ្សំខ្លួនមិនចង់នៅមេម៉ាយយូរពេក ត្បិតអីទ្រាំធ្វើជាស្ត្រីមេម៉ាយ៧ឆ្នាំមកហើយ ក៏សម្រេចចិត្តជ្រើសរើសនាយកៃដជា គូរអនាគតតែម្ដងទៅ។

នាងបានបន្តឲ្យដឹងទៀតថា អ្នកទាំងពីរបានសម្រេចចិត្តសែនព្រេន ក្រាបផ្ទឹមសុំគ្នាធ្វើជាប្ដីប្រពន្ធ នៅមុខចាស់ទុំទាំងសងខាង កាលពីថ្ងៃទី៣០ ខែ សីហា ឆ្នាំ ២០១៧ ចំថ្ងៃថ្ងៃឡើងផ្ទះតែម្ដង ប៉ុន្តែដំណឹងនេះ ខ្លួនមិនដែលទម្លាយឲ្យមហាជនបានដឹងឡើយ។

ខ្ញុងបញ្ជាក់ថា មូលហេតុដែលនាំឲ្យអ្នកទាំងពីរ ជ្រើសរើសការសែនព្រេន មិនធ្វើពិធីរៀបអាពាហ៍ពិពាហ៍ក៏ ព្រោះតែ នាងគិតថា ខ្លួនមិនសូវមានប្រាក់ច្រើន ម្យ៉ាងទាំងសងខាងសុទ្ធតែមេម៉ាយដូចគ្នា ក៏សម្រេចចិត្តសែនព្រេនតែម្ដងទៅ។

ទោះបីជាចំណងស្នេហ៍របស់ ខ្ញុង និង នាយកៃដ ធ្វើឡើងលក្ខណៈសែនព្រេនបែបនេះក្ដី ដើម្បីឲ្យមានសុពលភាពតាមផ្លូវច្បាប់ ខ្ញុងថា អ្នកទាំងពីរគ្រោងនាំគ្នាទៅចុះសំបុត្រអាពាហ៍ពិពាហ៍ជាមួយគ្នាក្នុងពេលឆាប់ៗនេះ៕

អត្ថបទៈ ស៊ុនហួត