រុស្សីគំរាមបិទ Facebook ប្រសិនបើមិនព្រមសហការ

2017-09-27 03:02:22
ចំនួនមតិ 0 | ចំនួនចែករំលែក 0

ចន្លោះមិនឃើញ

រុស្សីនិយាយថានឹងបិទបណ្ដាញទំនាក់ទំនងសង្គមយក្ស Facebook នៅឆ្នាំ ២០១៨ ខាងមុខប្រសិនបើមិនព្រមធ្វើតាមច្បាប់រក្សាទុកទិន្នន័យក្នុងស្រុក របស់រុស្សីទេនោះ។

លោក Alexander Zharov ប្រធានផ្នែកនិយតករខាងសហព័ន្ធព័ត៌មានបច្ចេកវិទ្យានិងទូរគមនាគមន៍បានសង្កត់ធ្ងន់ថា "ច្បាប់នេះគឺជាកាតព្វកិច្ចសម្រាប់អ្នករាល់គ្នា”។ លោកបានបន្ថែមថា ៖ "មិនថាក្នុងកាលៈទេសៈណាយើងនឹងធ្វើឲ្យប្រាកដប្រជាថាច្បាប់ត្រូវបានអនុវត្តន៍ បើមិនដូច្នោះក្រុមហ៊ុននេះនឹងមិនអាចដំណើរការនៅសហព័ន្ធរុស្សីបានទៀតនោះទេ។ នៅទីនេះគ្មានការលើកលែងឡើយ”។

គួរដឹងថាច្បាប់ស្ដីពីការរក្សាទុកទិន្នន័យក្នុងស្រុក របស់រុស្សី បានចាប់ផ្ដើមអនុវត្តន៍នៅខែកញ្ញា ឆ្នាំ ២០១៥។ ច្បាប់នេះតម្រូវឲ្យក្រុមហ៊ុនទាំងឡាយដែលប្រមូលយកទិន្នន័យផ្ទាល់ខ្លួនពីអ្នកប្រើប្រាស់ដែលជាពលរដ្ឋនៃប្រទេសនេះ ត្រូវរក្សាទុកទិន្នន័យដែលប្រមូលបាននៅលើដីរុស្សី។

លោក Zharov បានឲ្យដឹងដែរថាខ្លួនទទួលបានលិខិតពីក្រុមហ៊ុន Twitter លើការយល់ព្រមអនុវត្តន៍តាមច្បាប់នេះចាប់ផ្ដើមពីឆ្នាំ ២០១៨ តទៅ។ ដោយឡែកចំពោះក្រុមហ៊ុន LinkedIn ត្រូវបានបិទមិនឲ្យដំណើរការនៅរុស្សីកាលពីខែវិច្ឆិកា ឆ្នាំ ២០១៦ ព្រោះតែមិនព្រមអនុវត្តន៍ច្បាប់នេះ។

មកទល់ពេលនេះមិនទាន់មានការឆ្លើយតបពីសំណាក់ Facebook នៅឡើយទេ ដោយសារតែភ្នាក់ងាររបស់លោក Zharov មិនទាន់បានទាក់ទងទៅ Facebook៕

ប្រភព៖ CNN ប្រែសម្រួល៖ សុខហេង