ចេញប៉ុស្តិ៍ទូរទស្សន៍ថ្មីមួយទៀតហើយ ប្លែកត្រង់អាចផ្សាយផ្ទាល់វីដេអូខ្លួនឯង និងបញ្ចេញមតិបានភ្លាមៗហ្មង

2017-09-27 08:19:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានីយទូរទស្សន៍ NICE TV ដែលបង្កើតឡើងក្រោមកិច្ចសហប្រតិបត្តិការរវាងក្រសួងមហាផ្ទៃ និងក្រុមហ៊ុន NICE Culture Investment Group របស់ចិននោះ បានធ្វើពិធីសម្ពោធការិយាល័យហើយកាលពីព្រឹកមិញ ក្រោមសក្ខីភាពសម្ដេចក្រឡាហោម ស ខេង ឧបនាយករដ្ឋមន្ត្រីកម្ពុជា ព្រមទាំងភ្ញៀវកិត្តិយសសំខាន់ៗជាច្រើនទៀត។

ប៉ុស្តិ៍ទូរទស្សន៍ដែលមានទីតាំងនៅក្នុងក្រសួងមហាផ្ទៃផ្ទាល់មួយនេះ ខុសប្លែកពីស្ថានីយដទៃត្រង់ថា អ្នកទស្សនាអាចបញ្ចេញមតិយោបល់ផ្សេងៗបានយ៉ាងងាយតាមរយៈកម្មវិធីឈ្មោះ TU TU Live ព្រមទាំងអាចធ្វើការផ្សាយផ្ទាល់វីដេអូខ្លួនឯងបានផងដែរ។

NICE TV បានចំណាយទឹកប្រាក់ ៩លានដុល្លារ ក្នុងការបើកដំណើរការអគារកម្ពស់ ៧ជាន់ លើផ្ទៃដី ៣ ០០០ម៉ែត្រការ៉េមួយនេះ ដោយអាចដាក់បុគ្គលិកបាន ៣០០នាក់ ព្រមទាំងមានគ្រឿងបរិក្ខារស្ទូឌីយោពិត និងស្ទូឌីយោនិម្មិតទំនើបជាច្រើន។

ក្រៅពីចាក់ផ្សាយការរីកចម្រើនក្នុងសង្គមជាតិ ស្នាដៃរបស់រដ្ឋាភិបាល ព្រមទាំងសកម្មភាពផ្សេងៗរបស់រដ្ឋ ប៉ុស្តិ៍ទូរទស្សន៍មួយនេះ ក៏មានផ្សាយពីកម្មវិធីកម្សាន្ត សិល្បៈ ភាពយន្ត ព្រមទាំងកម្មវិធីជាច្រើនទៀតផងដែរ ដោយពេលនេះផ្ទាល់កំពុងតែដំណើរការកម្មវិធី "នាទីសន្តិសុខមាតុភូមិ" “First Talk” “Share បទពិសោធន៍ខ្ញុំ" “Super Super Luck” “Come To Sing” ព្រមទាំងភាពយន្តភាគជាច្រើនទៀតផងដែរ៕