ចាប់ពីខែក្រោយនេះទៅ បើអាចគួរជិះវាងរង្វង់មូល២កន្លែងនៅភ្នំពេញ

2017-09-27 09:31:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ពានមិត្តភាពកម្ពុជា-ជប៉ុន (ស្ពានជ្រោយចង្វាចាស់) នឹងត្រូវបិទជាបណ្ដោះអាសន្ន ចាប់ពីថ្ងៃទី០១ ខែតុលា ឆ្នាំ២០១៧ ខាងមុខនេះ ដើម្បីធ្វើការជួសជុលស្តាឡើងវិញ។ ចរាចរណ៍ទ្វេទិសឆ្លងកាត់ទន្លេនឹងប្រព្រឹត្តទៅតែនៅលើស្ពានមិត្តភាពកម្ពុជា-ចិន តែមួយប៉ុណ្ណោះ។ ចរាចរណ៍អាចនឹងមានការកកស្ទះខ្លាំងនៅបរិវេណជុំវិញការដ្ឋានសាងសង់។ជាពិសេសនៅត្រង់ចំណុចរង្វង់មូលស្ពានទាំងសងខាង (រង្វង់មូលកួចកាណុង និងរង្វង់មូលព្រហ្មមុខបួន)។ បើអាចសូម ប្រជាពលរដ្ឋជៀសវាងការធ្វើដំណើរទៅកាន់ទីតាំងរង្វង់មូលស្ពាន ជាពិសេសនៅក្នុងម៉ោងមមាញឹក។

ទន្ទឹមនឹងនោះដែរ ក្រសួងសាធារណការបានដាក់ចេញនូវវិធានការមួយចំនួន ដើម្បីកាត់បន្ថយការកកស្ទះដូចជា៖ ការកែតម្រូវចំណុចរង្វង់មូលស្ពានទាំងសងខាង ការរៀបចំគំនូសប្លង់បង្ហាញទិសដៅប្រព័ន្ធចរាចរណ៍ ការផ្ដល់នូវដំណោះស្រាយសម្រាប់ការពង្វាងចរាចរណ៍ និងការចែករំលែកព័ត៌មានទាក់ទងនឹងផ្លូវវាងផ្សេងទៀតជាដើម។ ក្រសួងសាធារណការដ៏ដូចជា រដ្ឋបាលរាជធានីភ្នំពេញក៏សូមធ្វើការអធ្យាស្រ័យនិងយោគយល់ពីសំណាក់ប្រជាពលរដ្ឋ ចំពោះការរំខានទាំងឡាយណាដែលនឹងកើតមានឡើងក្នុងអំឡុងពេលនៃការជួសជុលស្ពាននេះ។

សូមជម្រាបជូនថា គម្រោងជួសជុលស្តាស្ពានជ្រោយចង្វាចាស់នេះឡើងវិញវិញនេះ ត្រូវបានគាំទ្រដោយហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងទឹកប្រាក់ចំនួន ៣.៣៤៣ លានយ៉េន ប្រមាណជា ៣៣លានដុល្លារអាមេរិក។ ការជួសជុលស្តាឡើងវិញនៃស្ពាននេះ នឹងប្រើរយៈពេលប្រមាណជា (២១ខែ) រហូតដល់ ខែមិថុនា ឆ្នាំ២០១៩៕

អត្ថបទ៖ វឌ្ឍនៈ