ក្មួយស្រី ខាន់ ជេមស៍ មានទីផ្សារក្រៅផលិតកម្មច្រើន តែមិនអាចប្រឡូក

2017-09-28 04:57:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពន្លកថ្មីរបស់ផលិតកម្ម សាន់ដេ ដែលប្រិយមិត្តច្រើនស្គាល់ថាជាក្មួយស្រីរបស់លោក ខាន់ ជេមស៍ បានប្រាប់សប្បាយថា តាំងពីប្រឡូកសិល្បៈអស់រយៈពេលជាង១ឆ្នាំមកនេះ នាងត្រូវបានគេទាក់ទងឲ្យទៅសម្ដែង និងច្រៀងជាច្រើនកន្លែង តែរូបនាងមិនអាចប្រឡូក។

វីរៈ និច ប្រាប់ថា ការងារសិល្បៈដែលខ្លួនកំពុងប្រឡូកសព្វថ្ងៃ គឺមានតែច្រៀងក្នុងផលិតកម្ម និងចេញទៅការប្រគំតន្ត្រីនានាតាមខេត្ត និងនៅប៉ុស្តិ៍ទូរទស្សន៍ប៉ុណ្ណោះ បើសម្រាប់ការថតភាពយន្ត និងចេញច្រៀងតាមភោជនីយដ្ឋាននានា ធ្លាប់មានគេទាក់ទងមកដែរ តែនាងមិនអាចបំពេញការងារបាន។

"ធ្លាប់មានគេហៅថតកុនច្រើនដែរបង តែខ្ញុំមិនមានពេលគ្រប់គ្រាន់ ហើយមិនសូវស្រឡាញ់ខាងផ្នែកសម្ដែងផង ណាមួយខ្ញុំកុងត្រាជាមួយផលិតកម្ម បើសិនជាថត ក៏ថតឲ្យតែផលិតកម្មដែរ។ សម្រាប់ការចេញទៅច្រៀងនៅតាមភោជនីយដ្ឋានផ្សេងៗដើម្បីរកចំណូលបន្ថែម មានគេហៅច្រើនដូចគ្នា តែប៉ាម៉ាក់មិនឲ្យទៅទេ"។ ស្រីស្អាតវ័យ១៩ឆ្នាំបញ្ជាក់។

នាងបានឲ្យដឹងទៀតថា រូបនាងមិនទាន់គិតគូស៊ីជម្រៅទៅលើការរកប្រាក់ផ្គត់ផ្គង់ជីវភាពឡើយ ពោលគឺ នាងមិនមែនជាជំហរធំក្នុងគ្រួសារនោះទេ។ ម៉្យាងទៀត នៅក្នុងវ័យនេះ នាងចង់ផ្ដោតអារម្មណ៍លើការសិក្សាឲ្យបានច្រើន ចំណែកសិល្បៈ នាងឆ្លៀតបំពេញការងារនៅពេលទំនេរ ដើម្បីទទួលបានបទពិសោធន៍ថ្មីៗ និងពង្រីកប្រជាប្រិយភាពតាមដែលអាចធ្វើបាន ព្រោះវាជាការងារដែលខ្លួនស្រឡាញ់។

សព្វថ្ងៃ ក្មួយស្រីតារាល្បីរូបនេះ ជានិស្សិតឆ្នាំទី២ នៃ "សាកលវិទ្យាភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច" សិក្សាលើជំនាញច្បាប់។ នាងបានក្លាយជាតារាចម្រៀងរបស់ផលិតកម្ម សាន់ដេ ជាផ្លូវការកាលពីអំឡុងដើមឆ្នាំ២០១៦ តាមរយៈលោក ខាន់ ជេមស៍ ដែលជាពូបង្កើត។

វីរៈ និច បានសាងប្រជាប្រិយភាពរបស់ខ្លួនតាមរយៈបទចម្រៀងជាច្រើនដូចជា "មនុស្សស្រីមានសង្សារច្រើន មិនមែនសុទ្ធតែសាវា" “ជាតិនេះឆាចោល" “ដល់ម៉ោងខូចចិត្តហើយ" និង ចង់ឲ្យមនុស្សប្រុសសាវាក្លាយជាខ្ទើយ"៕

អត្ថបទ៖ សុខណា