ឆាយ វីរៈយុទ្ធ រំលឹករឿងដែលលោកចងចាំ កើតឡើងនារដូវភ្ជុំកាលនៅស្រុកកំណើត

2014-09-23 14:01:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អនុស្សាវរីយជិះទូកលេងជាមួយមិត្តភ័ក្ដិ និងក្រុមគ្រួសារយ៉ាងសប្បាយរីករាយនាខែទឹកឡើងក្នុងរដូវបុណ្យភ្ជុំ គឺជាអនុស្សាវរីយមួយដែលលោក ឆាយ វីរៈយុទ្ធ នៅចងចាំមកដល់ឥឡូវ។ នេះបើតាមសាមីខ្លួន។

"មិនជាតូចប៉ុន្មានទេ គឺរាងធំដែរហើយ ខ្ញុំតែងតែជិះទូកលេង និងជិះទៅវត្តជាដើមជាមួយពុកម៉ែ ព្រោះតែខែហ្នឹងគឺទឹកឡើងលិចទីវត្តហើយ...ហ៊ឺនិយាយទៅ គឺជារឿងមួយគួរឲ្យចងចាំដែរ!"។

ឆាយ វីរៈយុទ្ធ ដែលមានឈ្មោះដើមថា ឆាយ ចាន់ឆោម មានស្រុកកំណើតនៅភូមិពោធិសាលា២ ឃុំព្រែកក្របៅ ស្រុកកងមាស ខេត្តកំពង់ចាម។ នៅជិតភូមិកំណើតរបស់លោក មានវត្ត៣ គឺវត្ត "ពាមក្នុង" និងវត្ត "ព្រែកក្របៅ" ឯវត្តទី៣លោកមិនចាំ។ រដូវបុណ្យទាន ដូចជាបុណ្យភ្ជុំនេះជាដើម លោកតែងតែទៅវត្តទាំងនោះជាមួយឪពុកម្ដាយ ប៉ុន្តែភាគច្រើនគឺវត្ត "ពាមក្នុង" ព្រោះជិតផ្ទះរបស់លោក។

ទូក គឺជាមធ្យោបាយធ្វើដំណើរដ៏ប្រសើរសម្រាប់អ្នកស្រុកភូមិលោកទាំងអស់ នារដូវនេះដែលជារដូវទឹកលិចភូមិស្រុកអស់ហើយ មធ្យោបាយធ្វើដំណើរផ្សេងៗត្រូវជំនួសដោយទូក។ ដូច្នេះការជិះទូកលេង និងហែលទឹកលេងក៏ជាការកម្សាន្តពេញនិយមមួយរបស់លោក ក៏ដូចជាកុមារៗក្នុងភូមិរបស់លោកផ្សេងទៀតដែរ។

យ៉ាងណាក៏ដោយ លោកថាភាគតិចណាស់ ដែលលោកជិះលេងសប្បាយជាមួយមិត្តភ័ក្ដិ ពោលគឺភាគច្រើនលោកជិះជាមួយឪពុកម្ដាយ ព្រោះអ្នកមានគុណទាំងបារម្ភ បើទោះលោកចេះហែលទឹកស្ទាត់ជំនាញ។ "ខ្ញុំអត់ដែលលង់ទឹកទេ ព្រោះចេះហែលស្ទាត់ណាស់ (សើច) ប៉ុន្តែធម្មតាទេឪពុកម្ដាយតែងបារម្ភពីកូនអីចឹងណា!”។

វិលមកការងារសិល្បៈវិញ លោក ឆាយ វីរៈយុទ្ធ កំពុងមមាញឹកនឹងការថតចម្រៀងត្រៀមចេញអាល់ប៊ុមថ្មី។ យ៉ាងណាអំឡុងបុណ្យកាន់បិណ្ឌក្នុងខែភ្ជុំបិណ្ឌ លោកនៅតែឆ្លៀតយកចង្ហាន់ទៅវេរប្រគេនព្រះសង្ឃ បានចំនួន ៥វត្តហើយ។ លោកគ្រោងទៅឲ្យបានគ្រប់៧វត្តក្នុងថ្ងៃឆ្លងភ្ជុំធំនេះនៅស្រុកកំណើត។

"ខ្ញុំទៅរាល់ឆ្នាំមិនដែលខានទេ ការងារសិល្បៈក៏អត់ទទួលដែរ ព្រោះត្រូវជួបជុំបងប្អូន ម្យ៉ាងពុកម៉ែខ្ញុំក៏ផ្ដាំដែរថា បុណ្យទានត្រូវមកជួបជុំបងប្អូនកូន!"៕

អត្ថបទ៖ ទារិកា