របាយការណ៍​ចុង​ក្រោយ​របស់​ Kepios អំពី​ Global Digital Reports បាន​បង្ហាញ​ថា​ចំនួន​អ្នក​ប្រើ​បណ្ដាញ​ទំនាក់ទំនង​សង្គម​ (Facebook, Instagram ឬ Twitter ជា​ដើម) ​នៅ​ក្នុង​កម្ពុជា​មាន​​ចំនួន​ ៥,៨ លាន​នាក់​ ​ស្មើ​នឹង​ ៣៦% នៃ​ចំនួន​ប្រជាជន​សរុប។

តាម​របាយការណ៍​បាន​បង្ហាញ​ថា​ចំនួន​អ្នក​ប្រើ​បណ្ដាញ​សង្គម​នៅ​កម្ពុជា​កើន​ឡើង​ ៣៨% បើ​ធៀប​នឹង​ឆ្នាំ​មុន។ ដោយ​ឡែក​ចំនួន​អ្នក​ប្រើ​ប្រាស់​​អ៊ីនធឺណិត​នៅ​កម្ពុជា​វិញ​មាន​សរុប​ ៧ ១៥៧ ៤០៩ នាក់​ កើន​ឡើង​ ៤៣% ធៀប​នឹង​ឆ្នាំ​មុន។ បញ្ជាក់​ដែរ​ថា​កម្ពុជា​ជា​ប្រទេស​ដែល​មាន​កំណើន​អ្នក​ប្រើ​ប្រាស់​អ៊ីនធឺណិត​ច្រើន​បំផុត​លំដាប់​ទី​ ៤ ក្នុង​តំបន់​អាស៊ី​ប៉ាស៊ីហ្វិក។

របាយការណ៍​ដដែល​នេះ​ក៏​បង្ហាញ​ដែរ​ថា​​រយៈពេល​ ១២ ខែ​ចុង​ក្រោយ​នេះ​ ចំនួន​អ្នក​ប្រើ​អ៊ីនធឺណិត​នៅ​តំបន់​អាស៊ី​ប៉ាស៊ីហ្វិក​មាន​ ១,៩៤ ពាន់​លាន​នាក់ កើន​ឡើង​ ៨ ភាគ​រយ​ធៀប​ឆ្នាំ​មុន។ អ្នក​ប្រើ​ប្រាស់​បណ្ដាញ​សង្គម​​មាន​សរុប​ ១,៦៧ ពាន់​លាន​នាក់​កើន​ឡើង​ ១៧ ភាគ​រយ ក្នុង​នោះ​មាន​ ១,៦៣ ពាន់​លាន​នាក់​ប្រើ​បណ្ដាញ​សង្គម​តាម​រយៈ​ទូរសព្ទ៕​​​​​​​​

ប្រភព៖ thenextweb   ប្រែ​សម្រួល៖ សុខហេង