ប្រជាជនអេស្ប៉ាញជាង ២លាននាក់ បោះឆ្នោតគាំទ្របង្កើតរដ្ឋឯករាជ្យមួយ

2017-10-02 02:13:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃអាទិត្យទី ១ តុលា ម្សិលមិញ រដ្ឋាភិបាលសហគមន៍ Catalan បានរាយការណ៍ថា សំឡេងឆ្នោតគាំទ្រផ្ដាច់ទឹកដីពីប្រទេសអេស្ប៉ាញ ជារដ្ឋឯករាជ្យមួយ មានចំនួនដល់ទៅ ៩០% ឬស្មើនឹងប្រជាជនប្រមាណ ២,២៦លាននាក់។

រូបភាពផ្ដល់សិទ្ធិដោយ Reuters

មេដឹកនាំសហគមន៍ Catalan លោក Carles Puigdemont និយាយថា តំបន់ភាគឦសានប្រទេសអេស្ប៉ាញដែលលោកគ្រប់គ្រងបានឈ្នះសំឡេងបោះឆ្នោតជារដ្ឋឯករាជ្យ។

មន្ត្រីសហគមន៍ Catalan បញ្ជាក់ថា មនុស្សប្រមាណជាង ៨០០នាក់ បានរងរបួសក្នុងការប៉ះទង្គិចជាមួយប៉ូលិសបង្ក្រាបកុបកម្មអេស្ប៉ាញក្នុងអំឡុងសហគមន៍ Catalan ធ្វើប្រជាមតិ ដែលធ្វើឲ្យប្រទេសធ្លាក់ចូលវិបត្តិរដ្ឋធម្មនុញ្ញជ្រៅបំផុតក្នុងរយៈពេលប៉ុន្មានទសវត្សរ៍ចុងក្រោយនេះ។

ប៉ូលិសបានព្យាយាមចូលទៅដកហូតសន្លឹកឆ្នោតនៅតាមមណ្ឌលបោះឆ្នោត ដើម្បីរារាំងការធ្វើប្រជាមតិបង្កើតរដ្ឋឯករាជ្យនេះ ក៏បង្កើតជាការប៉ះទង្គិចតែម្ដង តែគេមិនទាន់ដឹងថាមានអ្នកបាត់បង់ជីវិត ឬយ៉ាងណាទេ៕