Pixel 2 មានកាមេរ៉ាតែមួយគ្រាប់ទេ ប៉ុន្តែឈ្នះ iPhone 8 Plus និង Note 8

2017-10-05 02:58:28
ចំនួនមតិ 0 | ចំនួនចែករំលែក 0

ចន្លោះមិនឃើញ

Google បានប្រកាសចេញ Google Pixel 2 និង Pixel 2 XL កាលពីយប់ម៉ោង ១១ ថ្ងៃម្សិលមិញនេះ ដើម្បីបំបាត់ចោលនូវមន្ទិលសង្ស័យជាច្រើនទាក់ទងកំពូលស្មាតហ្វូនទាំងពីរ។

ចំណុចដែលគេចាប់អារម្មណ៍ខ្លាំងបំផុតលើ Pixel ស៊េរីថ្មីទាំងពីរនេះ គឺនៅត្រង់ផ្នែកកាមេរ៉ាដោយតែវានៅមានបំពាក់កាមេរ៉ាមួយគ្រាប់ដដែល ខុសប្លែកពីគូប្រជែងធំៗដែលបានប្ដូរទៅប្រើប្រព័ន្ធកាមេរ៉ាភ្លោះទៅហើយនោះ។ ត្បិតថាមានកាមេរ៉ាតែមួយគ្រាប់ប៉ុន្តែ កាមេរ៉ាទំហំ ១២ MP របស់ស្មាតហ្វូនទាំងពីរ អាចថតបានរូបភាព និងវីដេអូដែលមានគុណភាពល្អជាង iPhone 8 Plus និង Galaxy Note 8 ទៅទៀត។

បើតាមការធ្វើតេស្តរបស់ DxOMark លទ្ធផលបានបង្ហាញថា Google Pixel 2 ទទួលបានពិន្ទុដល់ទៅ ៩៩ សម្រាប់ការថតរូប និងការថតវីដេអូទទួលបាន ៩៦ ពិន្ទុ នាំឲ្យពិន្ទុសរុបមានដល់ ៩៨ ពិន្ទុ នាំមុខ iPhone 8 Plus និង Note 8 ដែលមានពិន្ទុសរុប ៩៤ ពិន្ទុ។ បញ្ជាក់ថាទាំង Google Pixel 2 និង Pixel 2 XL មានបំពាក់កាមេរ៉ាកម្រិត ១២ MP ជាមួយ Aperture f/1.8, មានបច្ចេកវិទ្យារក្សាលំនឹង OIS និង EIS និងមានបច្ចេកវិទ្យា Dual Pixel Autofocus ផងដែរ។

ចំពោះការថតរូប Portrait Mode (ច្បាស់មុខព្រាលក្រោយ) វិញ Pixel 2 ក៏អាចធ្វើបានដូចស្មាតហ្វូនកាមេរ៉ាភ្លោះដែរ ដោយអាចធ្វើបានតាមរយៈ Software ទាំងស្រុង។ Portrait Mode នេះក៏អាចថតបានដោយប្រើកាមេរ៉ាខាងមុខបានផងដែរ ដែល Google បានអះអាងថាបច្ចេកវិទ្យានេះដំណើរការបានល្អបំផុត។

នៅពេលថតវីដេអូ Pixel 2 នឹងប្រើទាំងបច្ចេកវិទ្យារក្សាលំនឹង OIS និង EIS ដើម្បីធានាថាវីដេអូនឹងមានភាពរលូនស្រិល។ អ្វីដែលពិសេសលើសនេះអ្នកដែលទិញ Pixel 2 នឹងទទួលបានការរក្សាទុករូបភាព ឬ វីដេអូក្នុងគុណភាពដើមបានដោយឥតកំណត់នៅលើកម្មវិធី Google Photos ទៀតផង។

Google Pixel 2 មានបំពាក់អេក្រង់ទំហំ ៥ អ៊ីញ ជាមួយ Resolution កម្រិត 1080 x 1920 និង Pixel 2 XL មានអេក្រង់ទំហំ ៦ អ៊ីញ កម្រិត Resolution 1440 x 2880 ដែលសុទ្ធសឹងជាប្រភេទអេក្រង់ OLED ដូចគ្នា។ អេក្រង់របស់ Pixel ទាំងពីរនេះមាននូវមុខងារ Always-On Display ដើម្បីបង្ហាញដំណឹងសំខាន់ៗ ហើយតួខ្លួនរបស់ពួកវាមានបង្កប់មុខងារច្របាច់ដើម្បីបញ្ជាដូចជា HTC U 11 ដែរ។

Pixel 2 និង 2 XL មានបំពាក់បន្ទះឈីប Snapdragon 835 និងមាន RAM ទំហំ ៤ GB ជាមួយអង្គផ្ទុកទិន្នន័យទំហំ ៦៤ GB និង ១២៨ GB ដែលដំណើរការដោយប្រព័ន្ធប្រតិបត្តិការ Android Oreo 8.0 មកស្រាប់។ Pixel 2 មានថាមពលថ្មទំហំ ២៧០០ mAh និង Pixel 2 XL មានថាមពលថ្មទំហំ ៣៥២០ mAh មិនអាចសាកថ្មដោយឥតប្រើខ្សែ ប៉ុន្តែអាចទ្រាំទ្រនឹងបច្ចេកវិទ្យាសាកថ្មបានលឿន។

គួរបញ្ជាក់ដែរថារន្ធដោតកាសប្រភេទ 3.5 mm ត្រូវបានដកចេញហើយ ដោយអាចដោតកាសតាមរន្ធ USB-C ជំនួសវិញ។ ប៉ុន្តែ Google ក៏បានបន្ថែមនូវឌុយសម្រាប់តភ្ជាប់ពីរន្ធកាស 3.5 mm ទៅរន្ធ USB-C នៅក្នុងប្រអប់ផងដែរ។ ប្រព័ន្ធបញ្ចេញសំឡេងលើ Pixel 2 និង Pixel 2 XL លើកនេះបានអាប់ដេតទៅជាប្រព័ន្ធ Stero អាចបញ្ចេញសំឡេងបានគ្រប់ជ្រុងជ្រោយ។

Google Pixel 2 និង Pixel 2 XL នឹងបញ្ចេញលក់លើទីផ្សារបរទេសនាថ្ងៃទី ១៧ ខែតុលា ដោយ Pixel 2 តម្លៃចាប់ពី ៦៥០ ដុល្លារ ទៅ ៧៥០ ដុល្លារ ដែលមានជម្រើសពណ៌ខៀវ, ខ្មៅ និងពណ៌ស។ ចំណែក Pixel 2 XL តម្លៃចាប់ពី ៨៥០ ដុល្លារ ទៅ ៩៥០ ដុល្លារ មានជម្រើសពណ៌ខ្មៅ និងពណ៌ខ្មៅលាយ-ស៕