កូនខ្មែរតែម្នាក់គត់ រៀនសាលាតន្រ្តីលំដាប់ពិភពលោកដល់ទៅ១៤ឆ្នាំ បង្កើតស្នាដៃល្អឯកជាច្រើន

2017-10-05 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

សាស្ត្រាចារ្យ ហ៊ឹម សុភី ជាកូនខ្មែរតែម្នាក់គត់ ដែលមានសមត្ថភាពខ្ពស់ ទទួលបានអាហារូបករណ៍រៀននៅសាលាលំដាប់ពិភពលោកមួយ នៅប្រទេសរុស្សី និងបានបង្កើតស្នាដៃដ៏ល្អឯក ធ្វើឱ្យពិភពលោកឱ្យតម្លៃខ្ពស់។

សាស្ត្រាចារ្យបណ្ឌិត ហ៊ឹម សុភី

ថ្មីៗនេះបណ្ឌិត ហ៊ឹម សុភី ទើបតែបានបង្ហាញស្នាដៃតន្ត្រី "បង្សុកូល” ដែលធ្វើឡើងដើម្បីឧទ្ទិសទៅដល់អ្នកស្លាប់ក្នុងរបបខ្មែរក្រហម និងបង្ហាញអំពីសោកនាដកម្មសង្គ្រាម។ ស្នាដៃនេះ ទុកជាសារមួយឱ្យពិភពលោកទាំងមូលស្វែងយល់អំពីទុក្ខវេទនា សេចក្ដីនិរាសព្រាត់ប្រាសដែលកើតចេញពីភ្លើងសង្គ្រាម។ តន្ត្រី"បង្សុកូល” ត្រូវបានពិភពលោកឱ្យតម្លៃយ៉ាងខ្លាំង មានបណ្ដាប្រទេសជាច្រើនបានផ្ដល់កិត្តិយសឱ្យតន្ត្រីនេះបានចូលទៅសម្ដែងក្នុងសាលមហោស្រពលំដាប់ថ្នាក់ពិភពលោកដ៏កម្ររបស់ប្រទេសពួកគេ។

បណ្ឌិត ហ៊ឹម សុភី (រូបឆ្វេងដៃ)

ឆ្លងកាត់ការខិតខំប្រឹងប្រែងរៀន មិនហ៊ានប្រហែស សាស្ត្រាចារ្យបណ្ឌិត ហ៊ឹម សុភី បានប្រាប់ Sabay ថា លោកជាកូនខ្មែរតែម្នាក់គត់ ដែលបានរៀននៅសាលា អភិរក្សដ្ឋានតូយ៌តន្ត្រីមូស្គូ ឈ្មោះ ឆាយកូស្គី លំដាប់ពិភពលោក នៅប្រទេសរុស្សី ( ពីដើមហៅសហភាពសូវៀត)។

បណ្ឌិត ហ៊ឹម សុភី រាប់ពីស្តាំទីពីរ

“ខ្ញុំខំរៀនណាស់ មិនមែនរៀនល្មមៗទេ ហើយអ្នកដែលបានទៅរៀននៅសាលានោះ មិនងាយទេ ខ្ញុំជានិស្សិតកម្ពុជាតែម្នាក់គត់ដែលបានទៅរៀននៅសាលានោះ ខ្ញុំចំណាយពេលរហូតទៅដល់ជិត១៤ឆ្នាំ ទទួលបានសញ្ញាប័ត្រធំៗជាច្រើនពីសាលានោះ”។

បណ្ឌិត ហ៊ឹម សុភី និងរដ្ឋមន្ត្រីក្រសួងអប់រំ យុវជន និងកីឡា

បទពិសោធន៍សិក្សា និងប្រវត្តិការងារ ក្នុងប្រទេស៖

ឆ្នាំ១៩៧២ លោករៀនប៉្យាណូ ជាមួយសាស្ត្រាចារ្យជនជាតិបារាំង នៅសាលាភូមិន្ទវិចិត្រសិល្បៈ មហាវិទ្យាល័យដូរ្យតន្ត្រី។
ឆ្នាំ ១៩៧៩ ធ្វើការនៅសិល្បៈរដ្ឋធានីភ្នំពេញ លោកបានតែងបទចម្រៀងជាច្រើនបទដូចជាបទ "សម្រស់រាជធានីភ្នំពេញ” "កម្ពុជាបេះដូងខ្ញុំ” "បណ្ដាំបុព្វបុរស” និងមានច្រើនទៀត។
ឆ្នាំ ១៩៨២ រៀននៅសាលាវិចិត្រសិល្បៈបន្ត។

បទពិសោធន៍សិក្សាក្រៅប្រទេស

ឆ្នាំ ១៩៨៥ ដល់ឆ្នាំ ១៩៩៩ បានអាហារូបករណ៍រៀននៅសាលា អភិរក្សដ្ឋានតូយ៌តន្ត្រីមូស្គូ ឈ្មោះ ឆាយកូស្គី ប្រទេស រុស្សី ។ ជាអភិរក្សដ្ឋានល្បីឈ្មោះមួយក្នុងចំណោម អភិរក្សដ្ឋានល្បីជាងគេលើសកលលោក។
ឆ្នាំ ២០០១ ទទួលបានអាហារូបករណ៍ជាន់ខ្ពស់ពីសហរដ្ឋអាមេរិក ទៅសិក្សានៅសហរដ្ឋអាមេរិក។

ស្ថាបនិកស្នាដៃ Rock Opera ដំបូងបង្អស់នៅកម្ពុជាដែលមានដើមកំណើតនៅខេត្តព្រៃវែងរូបនេះ បានប្រឹងប្រែងរៀននៅរុស្សី អស់រយៈពេលជិត១៤ឆ្នាំ ទទួលបានសញ្ញាប័ត្រធំៗជាច្រើនដូចជា៖

ឆ្នាំ ១៩៩២ បានសញ្ញាប័ត្រអនុបណ្ឌិត។
ឆ្នាំ ១៩៩៥ បានសញ្ញាប័ត្របណ្ឌិតផ្នែកនិពន្ធតន្ត្រី។
ឆ្នាំ ១៩៩៨ បានសញ្ញាប័ត្រផ្នែកតន្ត្រីវិជ្ជា និងបានសញ្ញាប័ត្របណ្ឌិត ផ្នែកសរសេរនិក្ខេបបទកម្រាស់៥០០ទំព័រ។

បណ្ឌិត ហ៊ឹម សុភី ស្តាំដៃ

ស្នាដៃធំៗជាច្រើនដែលលោកបានបង្កើតឡើង ធ្វើឱ្យពិភពលោកទទួលស្គាល់ពីគុណតម្លៃរបស់វា រួមមានស្នាដៃ "ទន្លេកោងមួយ” "ផ្កាស្លា” "ទីដំរីយំ” និងស្នាដៃតន្ត្រី "បង្សុកូល” ជាដើម។ ស្នាដៃទាំងនេះសុទ្ធសឹងតែធ្វើឱ្យពិភពលោកកោតសរសើរ។

បច្ចុប្បន្នសាស្ត្រាចារ្យបណ្ឌិត ហ៊ឹម សុភី ជាសមាជិកបម្រុង និងជាទីប្រឹក្សានៃរាជបណ្ឌិតសភាជាតិកម្ពុជា ជាសមាជិកគណៈកម្មការវិចិត្រសិល្បៈនៃក្រុមប្រឹក្សាជាតិភាសាខ្មែរ ជាស្ថាបនិកសាលាតូយ៌តន្ត្រី ហ៊ឹម សូភី ជាអ្នកនិពន្ធតន្ត្រី និងជាសាស្ត្រាចារ្យប៉្យាណូ៕

អត្ថបទ៖ ប៉ូ សាគុន