Rock opera"ទីដំរីយំ” គ្រោងសម្ដែងជាថ្មីនៅឆ្នាំក្រោយ ឯថវិកាចំណាយរាប់សែនដុល្លារ

2017-10-06 08:02:38
ចំនួនមតិ 0 | ចំនួនចែករំលែក 0

ចន្លោះមិនឃើញ

Rock opera "ទីដំរីយំ” ស្នាដៃដំបូងគេបង្អស់កើតមាននៅកម្ពុជា កាលពីជិត ១០ឆ្នាំមុន ដែលធ្វើឱ្យពិភពលោកស្ងើចសរសើរ ហើយថែមទាំងទាក់ទាញមនុស្សស្ទើរគ្រប់វ័យនោះ ឥឡូវគ្រោងនឹងសម្ដែងជាលក្ខណៈ concert នៅឆ្នាំក្រោយនេះហើយ។

បើតាមការឱ្យដឹងពីស្ថាបនិកស្នាដៃ "ទីដំរីយំ” លោក បណ្ឌិត ហ៊ឹម សុភី ថា ស្នាដៃដែលធ្វើឱ្យកក្រើកទាំងប្រជាជនកម្ពុជា និងនៅលើឆាកអន្តរជាតិកាលពីឆ្នាំ ២០០៨នោះ គ្រោងនឹងរៀបចំការសម្ដែងនៅឆ្នាំក្រោយនេះ។ លោកបញ្ជាក់ថា ពេលនេះកំពុងតែត្រៀមរៀបចំការសម្ដែងជាលើកទី២នៅកម្ពុជាទៀត។ រីឯតម្លៃដែលគ្រោងនឹងចំណាយក្នុងការរៀបចំ concert rock opera “ទីដំរីយំ” នៅឆ្នាំក្រោយនេះវិញ គ្រោងចំណាយប្រមាណ ២០ម៉ឺនដុល្លារអាមេរិក។

សាស្ត្រាចារ្យបណ្ឌិត ហ៊ឹម សុភី (រូបពីបណ្តាញសង្គម)

“យើងអត់ទាន់ច្បាស់ថា នឹងធ្វើនៅខែណា ឬថ្ងៃណាឱ្យប្រាកដនៅឡើងទេ ដឹងត្រឹមថា គ្រោងធ្វើនៅឆ្នាំក្រោយ តួសម្ដែងក៏យើងនៅមិនទាន់កំណត់ច្បាស់ដែរ ហើយបើធ្វើជាលក្ខណៈ production អាចនៅឆ្នាំក្រោយៗទៀត ព្រោះវាអស់លុយច្រើន ម៉្យាងឥឡូវនេះ យើងកំពុងជាប់រវល់ស្នាដៃធំ តន្ត្រី "បង្សុកូល” ត្រូវសម្ដែងក្រៅប្រទេសផងក្នុងប្រទេសផង"។ បណ្ឌិត ហ៊ឹម សុភី បញ្ជាក់។

សំបុត្រចូលទស្សនា rock opera "ទីដំរីយំ" (រូបពីបណ្តាញសង្គម)

ស្នាដៃ Rock opera "ទីដំរីយំ” ដែលបានធ្វើឡើងកាលពីឆ្នាំ២០០៨ មានការចូលរួមសហការផលិតពីផលិតករល្បីៗទាំងខ្មែរនិងបរទេស។ តួសម្ដែង មានជនជាតិខ្មែរ ខ្មែរអាមេរិក និងជនជាតិអាមេរិកកាត់អាស៊ីជាច្រើនរូបទៀត ដែលសុទ្ធសឹងតែជាសិល្បករដែលមានបទពិសោធន៍ច្រើនឆ្នាំនិងមានទេពកោសល្យខ្ពស់សរុបជាង៣០នាក់៕

អត្ថបទ៖ ប៉ូ សាគុន