ផលិតករច្រើននាក់បង្ហាញក្ដីកង្វល់ជុំវិញការយកពន្ធលើវិស័យភាពយន្តខ្មែរ

2017-10-09 03:44:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះផលិតករជាច្រើននាក់បានជួបជុំពិភាក្សាគ្នានៅសាកលវិទ្យាល័យភ្នំពេញអន្តរជាតិ ក្នុងគោលបំណងបង្ហាញក្ដីកង្វល់របស់ខ្លួនជុំវិញការយកពន្ធ ទៅលើបុគ្គលិកទាំងអស់ដែលជាប់កាតព្វកិច្ចបម្រើវិស័យភាពយន្ត។

ថ្លែងក្នុងកិច្ចពិភាក្សាខាងលើលោក ឆាយ បូរ៉ា ចាងហ្វាងផលិតកម្មដើមត្នោតបានលើកឡើងថា តាមការពន្យល់ពីមន្ត្រីពន្ធដារ នាពេលកន្លងមករាល់បុគ្គលិកដែលបម្រើក្នុងវិស័យភាពយន្តដែលទទួលបានប្រាក់បៀវត្សទាំងអស់ ត្រូវមានកាតព្វកិច្ចបង់ពន្ធជូនទៅរដ្ឋ មិនថាអ្នកនិពន្ធ ក្រុមអ្នកកាត់តវីដេអូ ឬតារាសម្ដែងឡើយភាពយន្តឡើយ។

លោកថា៖“ទោះបីជាយើងជួលសិល្បករ ឲ្យពួកគាត់មកសម្ដែង ១ ភាគ ឬ ១ ឆាកក៏ខាងពន្ធដារតម្រូវឲ្យយើងកាត់ពន្ធពីសិល្បករហ្នឹងទុកដែរ អ៊ីចឹងហើយទើបយើងហៅសមាគមសិល្បករឲ្យគាត់មកចូលរួមឲ្យដឹងពីបញ្ហាហ្នឹង ក្នុងគោលបំណងជួយផ្សព្វផ្សាយ និងពន្យល់សិល្បករភាពយន្តទាំង បើគាត់មិនយល់ពីបញ្ហាហ្នឹងទេ គាត់អត់បង់ពន្ធទេ"។

បន្ថែមពីនេះលោកព្រមទាំងផលិតករផ្សេងទៀតសូមស្នើសុំដល់ ក្រសួងវប្បធម៌ និងវិចិត្រសិល្បៈ ក៏ដូចជាប្រមុខរាជរដ្ឋាភិបាលឲ្យជួយអនុគ្រោះទៅលើការបង់ពន្ធ លើវិស័យភាពយន្តខ្មែរ ដោយបន្ថយមកនៅត្រឹម ៥ ទៅ ១០ ឆ្នាំចាំបង់ពន្ធម្ដង ឬ មិនបាច់បង់ពន្ធតែម្ដង ពីព្រោះវិស័យភាពយន្តគឺជាផ្នែកមួយជួយទ្រទ្រង់វិស័យវប្បធម៌ឲ្យកាន់តែរីកសុះសាយ និងទូលំទូលាយ។

ដោយឡែក លោក កុយ ស៊ីឌឿន ជាក្រុមប្រឹក្សាភិបាល សមាគមសិល្បករខ្មែរ បានសុំអំពាវនាវដល់ប្រមុខរដ្ឋាភិបាលឲ្យជួយបន្ធូរបន្ថយទៅលើការយកពន្ធពីផលិតករ និងអ្នកដែលជាប់ពាក់ពន្ធបម្រើឲ្យវិស័យភាពយន្ត ព្រោះអាជីពជាអ្នកផលិតករ និងអ្នកសម្ដែងមិនទៀងឡើយ ជូនកាល១ឆ្នាំថតបាន ១រឿងក៏មាន ចំណែកខ្លះទៀតអត់មានសោះក៏បានដែរ។

លោកបានមានប្រសាសន៍ថា៖“ហើយខ្ញុំចង់ឲ្យរដ្ឋកំណត់ពន្ធ លើផលិតកម្មទាំងអស់ហ្នឹងពីខ្នាតមធ្យមមកត្រឹមខ្នាតតូចបានហើយ ពីព្រោះខ្នាតមធ្យមយើងត្រូវតែរាយការណ៍របាយការពន្ធហ្នឹងរៀងរាល់ខែ អំពីប្រាក់ចំណូល និងចំណាយ ហើយផលិតកម្មភាគច្រើនគាត់អត់មានបុគ្គលិកទេ គាត់អត់មានអាជីវកម្មអ្វីដែលធ្វើរៀងរាល់ខែដែរ គាត់មិនអាចប្រកាសពន្ធរៀងរាល់ខែបានទេ"។

ហេតុផលដែលលោកស្នើសុំឲ្យរដ្ឋពន្ធ ចំពោះផលិតកម្មទាំងអស់ពីខ្នាតមធ្យមមកខ្នាតតូចដោយសារ តែអាជីវកម្មខ្នាតតូចមួយឆ្នាំប្រកាសពន្ធម្ដង។ ទាក់ទងគម្រោងក្នុងការដាក់លិខិតស្នើសុំទៅក្រសួងវប្បធម៌ ក៏ដូចជាប្រមុខរាជរដ្ឋាភិបាល លោក និងផលិតករមួយចំនួនទៀត នឹងដាក់ក្នុងពេលឆាប់ៗ ដើម្បីឲ្យពួកគេបង្ហាញពីក្ដីកង្វល់របស់ខ្លួនចំពោះការយកពន្ធ៕