ដើម្បីគ្រួសារ ពេជ្រ ចរណៃ តួអ្វីក៏សម្ដែង ឲ្យតែបានប្រាក់ផ្គត់ផ្គង់ជីវភាព
- 2017-10-10 23:07:00
- ចំនួនមតិ 0 | ចំនួនចែករំលែក 0
ដើម្បីគ្រួសារ ពេជ្រ ចរណៃ តួអ្វីក៏សម្ដែង ឲ្យតែបានប្រាក់ផ្គត់ផ្គង់ជីវភាព
ចន្លោះមិនឃើញ
តារាសម្ដែងវ័យក្មេងដែលទើបវិលត្រលប់ចូលសិល្បៈវិញ ពេជ្រ ចរណៃ ប្រាប់ថា តាំងពីជីវភាពគ្រួសាររបស់ខ្លួនធ្លាក់ចុះមក នាងត្រូវការប្រាក់កាសច្រើនដើម្បីទ្រទ្រង់ជីវភាព។ ដូច្នេះទើបនាងខិតខំខ្លាំងក្នុងការងារប្រចាំថ្ងៃ ហើយតួអីក៏នាងហ៊ានសម្ដែងដែរឲ្យតែអាចរកប្រាក់បានច្រើន។
ស្រីស្អាតខាងលើរំលឹកថា គ្រួសាររបស់នាងចាប់ផ្ដើមដុនដាបខ្លាំងដោយជំងឺដាច់សរសៃប្រើសបេះដូង ដែលជាជំងឺប្រចាំកាយរបស់នាងបានរើឡើងខ្លាំងកាលពីប៉ុន្មានឆ្នាំមុន។ ស្របពេលគ្នានោះ ម្ដាយនាងក៏ធ្លាក់ខ្លួនមានជំងឺមហារីកមាត់ស្បូនទៀត។ ឯបន្ទុកគ្រួសារដែលគ្មានឪពុក និងបងប្អូន៣នាក់ក៏ត្រូវធ្លាក់មកលើនាងស្ទើរទាំងស្រុង។
មូលហេតុទាំងអស់នេះ បានតម្រូវឲ្យនាងត្រូវរិះរកគ្រប់មធ្យោបាយដើម្បីរកប្រាក់ផ្គត់ផ្គង់គ្រួសារ ហើយការងារដែលអាចឲ្យនាងរកចំណូលបានច្រើនគឺការសម្ដែងនេះឯង។ "ក្រៅពីអាជីពសម្ដែងខ្ញុំរៀនកាត់សក់បុរស ព្រោះមានបំណងចង់បើកហាងមួយ តែបច្ចុប្បន្នគឺបានតែការងារអាចរកចំណូលបានច្រើនគឺសម្ដែង ដោយខ្ញុំមិនប្រកាន់តួទេ ទោះរឿងនោះត្រូវឲ្យដើរតួអាក្រក់បែបណាក៏ដោយ"។ តួសម្ដែងវ័យ ២២ឆ្នាំ ថ្លែង។
ចរណៃ បានឲ្យដឹងថា កន្លងមកនាងត្រូវបានទស្សនិកជនរិះគន់យ៉ាងសម្បើមក្នុងការសម្ដែងជាតួជាស្រីដែលមានសហាយស្មន់ច្រើន និងជាតួចិត្តអាក្រក់ និងកាចឆ្នាសឆ្នើម។ ជុំវិញបញ្ហានេះ នាងបកស្រាយថា ដោយសារខ្លួនមានទម្រង់មុខសក្ដិសមគ្រងតំណែងជាតួបែបនោះទើបផលិតករតម្រូវឲ្យនាងសម្ដែងតាមសាច់រឿងដូច្នេះទៅ។
ងាកមករឿងកំប្លែងខ្លីដែលនាងរងការរិះគន់ថាជាស្រ្តីខ្មែរមិនគួរសម្ដែងជាគំរូស្រីមានសហាយស្មន់ នាងសម្ដែង នាងបញ្ជាក់ថា នេះគ្រាន់តែជ្រុងមួយនៃបញ្ហាសង្គម និងជាផ្នែកមួយនៃប្រភេទរឿងអប់រំដែរ ហើយនាងសំណូមពរទស្សនិកជនបើកចិត្តឲ្យទូលាយបន្តិចទស្សនារឿងដែលនាងសម្ដែងជាតួប្រភេទនេះទើបអាចយល់ពីអត្ថន័យ ម្យ៉ាងទៀតនេះគ្រាន់តែជាការសម្ដែង ជីវិតពិតនាងមិនដូចនេះឡើយ៕