មកស្គាល់អ្នករាំរបាំព្រះរាជទ្រព្យជួរមុខ៥រូប ក្នុងសម័យសង្គមរាស្ត្រនិយម

2017-10-12 23:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជាល្បីល្បាញខាងរបាំ ទាំងរបាំផ្នែកបុរាណនិងប្រពៃណី ពិភពលោកបានឱ្យតម្លៃប្រទេសកម្ពុជាថាជាជង្រុកនៃវប្បធម៌ដ៏ល្អអស្ចារ្យ។ Sabay សូមណែនាំតួរបាំ៦ជំនាន់ តាំងពីសម័យសង្គមរាស្ត្រនិយម ដែលបានចូលរួមលើកតម្កើងវប្បធម៌ជាតិ ជូនលោកអ្នកបានស្គាល់។

តួរបាំបុរាណ(របាំព្រះរាជទ្រព្យ) ៦ជំនាន់រាប់តាំងពីសម័យសង្គមរាស្ត្រនិយម៖

១ អ្នកស្រី ហ៊ុន សឿន : អ្នកស្រីចូលសិល្បៈផ្នែករបាំព្រះរាជទ្រព្យក្នុងអំឡុងឆ្នាំ ១៥៥០ តាំងពីអាយុ៨ឆ្នាំ ក្នុងសម័យសង្គមរាស្ត្រនិយម បច្ចុប្បន្នអ្នកស្រីមានវ័យ៧៤ឆ្នាំ។ តាំងពីចូលសិល្បៈអ្នកស្រីបានសម្ដែងក្នុងកម្មវិធីថ្នាក់ជាតិធំៗជាច្រើន មិនតែប៉ុណ្ណោះខ្នាតអន្តរជាតិក៏អ្នកស្រីសម្ដែងមិនតិចដងដែរ។ អ្នកស្រីបានដង្ហែអង្គព្រះមហាក្សត្រិយានីទៅសម្ដែងនៅប្រទេសចិនក្នុងអំឡុងឆ្នាំ១៩៧៣។ បន្ទាប់ពីចេញទៅប្រទេសបារាំងក្នុងឆ្នាំ១៩៧៦ អ្នកស្រីបានបង្កើតក្រុមរបាំមួយនៅប្រទេសបារាំងដើម្បីបង្ហាត់កូនខ្មែរនៅទីនោះ។

អ្នកស្រី ហ៊ុន សឿន រាប់ពីស្ដាំដៃ ទី២

២ លោក ព្រឿង ឈាង : លោកចូលសិល្បៈតាំងពីឆ្នាំ១៩៥៧ ពីអាយុ៨ឆ្នាំ ដោយមានជីដូនជាគ្រូបង្ហាត់របាំនៅក្នុងព្រះរាជវាំងស្រាប់លោកមានពេលច្រើនក្នុងការហាត់របាំ។ លោកបានសម្ដែងរបាំព្រះរាជទ្រព្យក្នុងកម្មវិធីធំៗជាច្រើន ទាំងក្នុងប្រទេសនិងក្រៅប្រទេស។ សិល្បកររូបនេះគឺជាតួអង្គ ជាលី ដំបូងគេបង្អស់ ក្នុងស្នាដៃរឿង "មហាវេស្សន្ដរជាតក" និងដើរតួព្រះវេស្សន្ដរ ក្នុងរឿងដដែលនេះសម្ដែងក្នុងឆ្នាំ២០១៧។ សិល្បករតាំងពីសម័យសង្គមរាស្ត្រនិយមរូបនេះ បច្ចុប្បន្នមានវ័យ៦៧ឆ្នាំ។ សាស្ត្រាចារ្យ ព្រឿង ឈៀង ជាទីប្រឹក្សាក្រសួងវប្បធម៌និងវិចិត្រសិល្បៈ លោកអាចសម្ដែងសិល្បៈបុរាណបានស្ទើរគ្រប់ទម្រង់រាប់តាំងពីរបាំព្រះរាជទ្រព្យ របាំប្រពៃណី ល្ខោនបាសាក់ យីកេ និងមានជាច្រើនទៀត រួមទាំងធ្លាប់ ថតកុន និងដើរម៉ូដផង។

លោក ព្រឿង ឈាង

៣ អ្នកស្រី ប៉ែន សុជា : ដោយមានចំណូលចិត្តខ្លាំងលើសិល្បៈបុរាណ អ្នកស្រីបានចូលរៀនសិល្បៈតាំងពីអាយុ៨ឆ្នាំ ពោលក្នុងអំឡុងឆ្នាំ ១៩៦០ បច្ចុប្បន្នអ្នកស្រីមានវ័យ៦៧ឆ្នាំ។ ជាអតីតគ្រូបង្ហាត់របាំបុរាណអ្នកស្រីបានធ្វើការងារច្រើនដើម្បីបង្ហាត់របាំដល់ក្មេងជំនាន់ក្រោយ។

អ្នកស្រី ប៉ែន សុជា រាប់ពីស្ដាំទី១

៤ អ្នកស្រី ហ៊ុល ភឿនណារី : ជាគ្រូបង្ហាត់របាំបុរាណខ្មែរ បច្ចុប្បន្នមានវ័យ៦៣ឆ្នាំ ចូលសិល្បៈតាំងពីអាយុ៨ឆ្នាំ។ អ្នកស្រីបានសម្ដែងរបាំក្បាច់បុរាណក្នុងពិធីធំតូចជាច្រើនក្នុងប្រទេសកម្ពុជា។ អ្នកស្រីជាតួសម្ដែងមួយរូបក្នុងរឿង "មហាវេស្សន្ដរជាតក” ក្នុងតួនាងអាមិត្តធីតា។

អ្នកស្រី ហ៊ុល ភឿនណារី

៥ អ្នកស្រី សុទ្ធ សុមាលី : ដោយមានជីដូនជាគ្រូបង្ហាត់របាំនៅក្នុងព្រះរាជវាំងស្រាប់អ្នកស្រីមានឱ្យកាសហាត់រៀនរបាំបានច្រើន ដោយចូលរៀនតាំងពីអាយុ៥ឆ្នាំ ក្នុងអំឡុងឆ្នាំ១៩៦០ជាង បច្ចុប្បន្នមានវ័យ៥៧ឆ្នាំ។ អ្នកស្រីមានស្នាដៃផ្នែកសិល្បៈជាច្រើន និងជាពិសេសនោះ អ្នកស្រីជាអ្នកផ្ដួចផ្ដើមបង្កើតស្នាដៃរឿង "មហាវេស្សន្ដរជាតក” លើកទី២ ទទួលបានជោគជ័យយ៉ាងត្រចះត្រចង់។

អ្នកស្រី សុទ្ធ សុមាលី

៥ អ្នកស្រី ហង្ស សុភាព : បច្ចុប្បន្នជាគ្រូបង្ហាត់របាំក្បាច់បុរាណខ្មែរ អ្នកស្រីមានវ័យ៣៧ឆ្នាំ ចូលសិល្បៈតាំងពីឆ្នាំ១៩៩០។ គ្រូរបាំរូបនេះក៏បានដើរតួក្នុងរឿង "មហាវេស្សន្ដរជាតក” ដែរ ដើរតួជា ជាលី់។

អ្នកស្រី ហង្ស សុភាព ស្ដាំដៃ

៦ កុមារី តារា ពិសី : ក្នុងជំនាន់ទី៦នេះ ប្អូនស្រីជាកុមារីដែលទើបតែចូលហាត់សិល្បៈបានប្រមាណជា១ឆ្នាំតែប៉ុណ្ណោះ បច្ចុប្បន្នប្អូនមានអាយុ ១០ឆ្នាំ និយាយពីទេពកោសល្យវិញថ្វីត្បិតទើបចូលហាត់របាំទើបបាន១ឆ្នាំ តែប្អូនស្រីចេះសិល្បៈច្រើនដូចជាក្បាច់បាតនៃរបាំបុរាណ របាំនារីជាជួរ និងរបាំមួយចំនួនទៀត។

កុមារី តារា ពិសី

តួរបាំដែលបានរៀបរាប់ខាងលើនេះសុទ្ធសិងតែជាគ្រូរបាំទាំងអស់ លើកលែងតែ កុមារី ជំនាន់ទី៦តែប៉ុណ្ណោះ ហើយតួទាំងនេះសុទ្ធតែមានវត្តមានក្នុងស្នាដៃរឿង "មហាវេស្សន្ដរជាតក"។ដោយសិល្បករក្នុងរបាំបុរាណខ្មែរ (របាំព្រះរាជទ្រព្យ) មានច្រើន យើងសូមលើកយកតែតួក្នុងមួយជំនាន់តែម្នាក់ មកបង្ហាញតែប៉ុណ្ណោះ។

អត្ថបទ៖ ប៉ូ សាគុន