ពីកូនអ្នកលក់ដូរកំប៉ិកកំប៉ុក មកជាសហគ្រិនស្រ្តីឆ្នើមម្នាក់
- 2017-10-11 03:30:51
- ចំនួនមតិ 0 | ចំនួនចែករំលែក 0
ពីកូនអ្នកលក់ដូរកំប៉ិកកំប៉ុក មកជាសហគ្រិនស្រ្តីឆ្នើមម្នាក់
ចន្លោះមិនឃើញ
ជាកូនអ្នកលក់ដូរកំប៉ិកកំប៉ុកក្នុងស្រុកកោះសូទិន ខេត្តកំពង់ចាម នាយិការគ្រប់គ្រងមន្ទីរព្យាបាលធ្មេញម៉ាស្ទ័រឃែរ លោកស្រី អេង លីគង់ បានព្យាយាមសិក្សាដោយជម្នះឧបសគ្គជាច្រើនរហូតបានក្លាយជាទន្តបណ្ឌិត និងមានជំនួញផ្ទាល់ខ្លួនរមួយចំនួនទៀត។
លោកស្រីថា ភាពក្រលំបាក មិនមែនជាឧបសគ្គដែល អាចរារាំងមិនឲ្យអ្នកគ្រប់គ្នាទទួលបានការជោគជ័យនោះទេ សំខាន់លោកស្រីថាចិត្តតស៊ូជារឿងចាំបាច់។ លោកស្រីរំឭកថា លោកស្រីបានប្រឡងបញ្ជប់ថ្នាក់ទី១២នៅឆ្នាំ១៩៨៨ ហើយបានមកប្រឡងចូលរៀននៅសាកលវិទ្យាល័យវិទ្យាសាស្រ្តសុខាភិបាល ដោយចង់បានជំនាញជំងឺទូទៅ។ ទោះយ៉ាងណាលោកស្រីថា ក្តីស្រម៉ៃនេះមិនបានក្លាយជាការពិតទេ ដោយពិន្ទុរបស់លោកស្រីពេលប្រឡងបានទាប លោកស្រីថាពេលនេះមានជម្រើសតែពីរប៉ុណ្ណោះគឺសិក្សាផ្នែកទន្តសាស្រ្ត ឬឱសថសាស្រ្ត។
ដោយគ្មានជំរើសលោកស្រីក៏បានជ្រើសរើសមុខវិជ្ជាទន្តសាស្រ្ត តែថាមុខវិជ្ជានេះលោកស្រីមិនសូវពេញចិត្តទេនៅពេលនោះ និងម្យ៉ាងជំនាញនេះមិនសូវមានទីផ្សារទៀតផងកាលពេលនោះ។ ទោះយ៉ាងណា ដោយមានការលើកទឹកចិត្តពីលោកគ្រូ-អ្នកគ្រូ និងជឿងតាមលោកគ្រូ-អ្នកគ្រូថាមុខជំនាញនេះនឹងមានទីផ្សារនៅថ្ងៃអនាគតលោកស្រីបានដាក់ចិត្តដាក់កាយរៀនមុខវិជ្ជានេះ។
អ្វីដែលលោកស្រីត្រូវជម្នះខ្លាំងជាងគេនៅពេលនោះគឹការស្នាក់នៅក្នុងអន្តេវាសិកដ្ឋានដែលពេលនោះលោកស្រីថាមានមនុស្សជាច្រើនចាត់ទុកថាជាកន្លែងមិនល្អដោយមានមនុស្សប្រុសស្រីស្នាក់នៅលាយឡំគ្នា។ លោកស្រ្តីបន្ថែមៈ «ខ្ញុំបានជន្នះការពេបជ្រាយ រឿង ពីរដាច់ដោយឡែកពីគ្នាទី១ យើងប្រលងធ្លាក់មិនបានរៀនថ្នាក់វេជ្ជបណ្ឌិតដូចគេ ទី២ គឺកន្លែងស្នាក់នៅដែលមតិមួយចំនួនថាមិនល្អ ប៉ុន្តែខ្ញុំអត់ខ្វល់សំខាន់ធ្វើខ្លួនឱ្យល្អ មានបុគ្គលម្នាក់ ឬពីរនាក់មិនល្អមិនអាចម៉ៅទាំងអស់បានទេ»។
លោកស្រីបានទទួលសញ្ញាបត្រកម្រិតមធ្យមផ្នែកទន្តពេទ្យនៅឆ្នាំ១៩៩២ និងបានចូលបម្រើការនៅមន្ទីរពេទ្យសម្ភពក្រុងព្រមទាំងបានបើកបន្ទប់ព្យាបាលធ្មេញតូចមួយផង ដែលបានវិវត្តមកជាមន្ទីរព្យាបាលធ្មេញម៉ាស្ទ័រឃែរ បច្ចុប្បន្ន។ ជាមួយគ្នានោះលោកស្រីក៏បានទទួលសញ្ញាបត្រ ថ្នាក់វេជ្ជបណ្ឌិតផ្នែកទន្តសាស្រ្តឯកទេសរាក់ស៊ីធ្មេញ និងពុកធ្មេញកាលពីឆ្នាំ២០០២។
ក្រៅពីអាជីវកម្មលើមន្ទីរព្យាបាលធ្មេញ នៅឆ្នាំ២០០៦ លោកស្រីបានហក់ចូលក្នុងវិស័យអចលនទ្រព្យ និងមានក្រុមហ៊ុនបីផ្សេងទៀត។ ដោយសារភាពជោគជ័យក្នុងជំនួញក្នុងនាមជាស្រ្តីភេទ លោកស្រីនិងសហគ្រិនស្រ្តី៩នាក់ផ្សេងទៀត កាលពីចុងខែសីហា ឆ្នាំ២០១៧ បាន ទទួលពានរង្វាន់សហគ្រិនស្រ្តីអាស៊ាន២០១៧ (Outstanding ASEAN Woman Entrepreneur Award 2017)។
លោកស្រីបន្ថែមយ៉ាងនេះថាៈ «យុវជនមិនត្រូវតូចចិត្តនៅពេលយើងក្រីក្រ និងជួបការលំបាកនោះទេ ជាពិសេសស្រីៗ...ការលំបាកទាំងឡាយនឹងជាឱកាសមួយធ្វើឱ្យយើងជោគជ័យ ព្រោះការអត់ធ្មត់ដល់កម្រិតណាមួយនោះនឹងធ្វើឱ្យយើងលូតលាស់បាន»៕