អស់ពី Neymar ពេលនេះ Cavani អន់ចិត្តជាមួយ Suarez?

2017-10-12 03:26:51
ចំនួនមតិ 0 | ចំនួនចែករំលែក 0

ចន្លោះមិនឃើញ

Edinson Cavani ទើបតែចប់ជម្លោះជាមួយ Neymar ជុំវិញបញ្ហាដណ្ដើមគ្នាទាត់ប៉េណាល់ទីឲ្យ Paris Saint-Germain កាលពីខែមុនបានធ្វើឲ្យប្រិយមិត្តបាល់ទាត់ចាប់អារម្មណ៍យ៉ាងខ្លាំង។

Cavani និង Suarez

រឿងរ៉ាវកាលណោះមានទាំងការលូកដៃពីសំណាក់ម្ចាស់ក្លឹបដោយព្រមឲ្យ Cavani ១លានអឺរ៉ូដើម្បីបោះបង់សិទ្ធទាត់ប៉េណាល់ទីឲ្យទៅ Neymar តែត្រូវសាមីខ្លួនបដិសេធ។ ស្ងប់រឿងមិនបានប៉ុន្មានផងខ្សែប្រយុទ្ធវ័យ៣០ឆ្នាំមានបញ្ហាមួយទៀតជាមួយ Suarez នៅក្រុមជម្រើសជាតិ។

កាលពីថ្ងៃពុធក្នុងការប្រកួតជម្រុះ World Cup រវាងអ៊ុយរុយហ្គាយ និងបូលីវី កាមេរ៉ាបានតាមចាប់សកម្មភាពមិនប្រក្រតីរវាងកំពូលខ្សែប្រយុទ្ធទាំងពីរ ក្នុងនោះគេឃើញ Cavani និង Suarez ប្រកែកគ្នាតឹងសរសៃ.ក។ ក្នុងវីដេអូ Cavani ទំនងជាខឹង Suarez ដែលមិនបញ្ជូនបាល់ឲ្យខ្លួន ហើយសុខចិត្តស៊ុតបើទោះជាជំហរមិនល្អក៏ដោយ។

ហេតុការណ៍បន្ទាប់មកទៀត Suarez បានស៊ុតចូលទីប៉ុន្តែ Cavani បែរជាដើរទៅកន្លែងកែបាល់មិនខ្វល់ពីការអបអរជាមួយមិត្តរួមក្រុមឡើយ។ ចប់ការប្រកួតនោះ អ៊ុយរុយហ្គាយឈ្នះ បូលីវី ៤-២ ស៊ុតបញ្ចូលទីដោយ Martin Caceres ១គ្រាប់, Cavani ១គ្រាប់ និង Suarez ២គ្រាប់៕