អ្នកសិល្បៈ១០រូបជួបរឿងសោកសង្រេង និងតក់ស្លុតបំផុតនៅឆ្នាំ២០១៧

2017-10-25 03:16:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងមួយដ៏សោកសង្រេង និងតក់ស្លុតខ្លាំងបំផុតសម្រាប់ក្រុមគ្រួសារអ្នកសិល្បៈ ក៏ដូចជាសិល្បករ និង សិល្បការិនី បានស្លាប់បាត់បង់ជីវិតជាបន្តបន្ទាប់គិតត្រឹមដើមឆ្នាំ ២០១៧ មកដល់ចុងឆ្នាំ ២០១៧ នេះ។ ថ្ងៃនេះ Sabay សូមលើកយកសិល្បករ និងសិល្បការិនី ១០ រូបបានជួបប្រទះរឿងរ៉ាវរន្ធត់ និងតក់ស្លុតជាបន្តបន្ទាប់រួមមាន៖

១/ លោក អ៊ា វឌ្ឍនា ជាអ្នកគ្រប់គ្រងទូទៅនៅផលិតកម្មថោន និងជាស្ថាបនិកក្រុម EV Band បានទទួលមរណភាពកាលពីថ្ងៃទី ១៨ ខែ មករា ឆ្នាំ ២០១៧ កន្លងទៅនេះនៅឯមន្ទីរពេទ្យមួយនៃប្រទេសបារាំង ដោយជំងឺបែកទឹកប្រមាត់។ ការស្លាប់របស់លោក ធ្វើឲ្យអ្នកសិល្បៈ និងមហាជនដែលស្គាល់រូបលោកក្រៀមក្រំខ្លាំងបំផុតផងដែរ។

២/ អ្នកផលិតកម្មវិធីកីឡាដ៏ល្បីល្បាញ និងជាអ្នកនិពន្ធម្នាក់ លោក ម៉ា សេរី បានស្លាប់បាត់បង់ជីវិតនៅថ្ងៃទី ៨ ខែ កុម្ភៈ ឆ្នាំ ២០១៧ ដោយជំងឺមហារីកថ្លើម នៅមន្ទីរពេទ្យមិត្តភាពខ្មែរសូវៀត។ មរណភាពរបស់លោកធ្វើឲ្យអ្នកស្នេហាវិស័យកីឡា និងមហាជនជាច្រើនក្ដុកក្ដួលយ៉ាងខ្លាំង។

៣/ តារាចម្រៀងលោក រិន សាវ៉េត បានបាត់បង់ប្រពន្ធជាទីស្រលាញ់ ដោយជំងឺសួត និងមហារីក ដំណាក់កាលចុងក្រោយបានរាលដល់ខួរក្បាលព្យាបាលព្យាបាលមិនជាសះស្បើយ ក៏បណ្ដាលឲ្យស្លាប់កាលពីថ្ងៃទី ២៣ ខែ មេសា ឆ្នាំ២០១៧ ក្នុងអាយុ ៣៧ ឆ្នាំ ។

៤/ នាយ ហុងដា ក៏មិនខុសពីលោក រិន សាវ៉េត ប៉ុន្មានដែរ ភរិយាក្រោយរបស់នាយ ត្រូវបានកូនប្រុសបង្កើតជាមួយភរិយាមុន សម្លាប់ឲ្យស្លាប់ទាំងវ័យក្មេង កាលពីថ្ងៃទី ១១ ខែ ឧសភា ឆ្នាំ ២០១៧ ធ្វើឲ្យតារាកំប្លែងខាងលើនេះតក់ស្លុត និងរន្ធត់ចិត្តយ៉ាងខ្លាំងជុំវិញការបាត់បង់ប្រពន្ធជាទីស្រលាញ់។

៥/ ពិធីករចាស់វស្សាសម្បូរទៅដោយវោហារស័ព្ទលោក អ៊ិត សេដ្ឋា បានបាត់បង់ជីវិតកាលពីថ្ងៃទី៤ ខែ មិថុនា ឆ្នាំ ២០១៧ នៅមន្ទីរពេទ្យរុស្ស៊ី ដោយជំងឺក្រិនថ្លើមយូរបណ្ដាលទៅជាជំងឺមហារីក រួមទាំងជំងឺទឹកនោមផ្អែម។ ការបាត់បង់ជីវិត លោក អ៊ិត សេដ្ឋា ធ្វើឲ្យមហាជនទាំងក្នុង និងក្រៅសិល្បៈសោកស្ដាយយ៉ាងខ្លាំងព្រោះជាការបាត់បង់ធនធានដ៏កម្រមួយ។

៦/ តារាពហុជំនាញលោក ជួប ច័ន្ទកក្កដា ហៅ កញ្ញា រ៉ូលីន ក្រោយពីត្រលប់មកពីសម្ដែងនៅអាមេរិកបានប៉ុន្មានថ្ងៃផង អ្នកម្ដាយរបស់ខ្លួនក៏បានទទួលមរណភាព នៅថ្ងៃទី ១០ ខែ កក្កដា ឆ្នាំ ២០១៧ នៅគេហដ្ឋាន ទីរួមខេត្តកំពង់ស្ពឺ ក្នុងជន្មាយុ ៧០ ឆ្នាំ ដោយជំងឺសួតឈឺរ៉ាំរៃ ធ្វើឲ្យ រ៉ូលីន ក្រៀមក្រំចិត្តយ៉ាងខ្លាំង។

៧/អតីតតារាចម្រៀងផលិតកម្ម Rock លោក ឈុំ រតនា បានទទួលមរណភាពកាលពីថ្ងៃទី ៨ ខែតុលា ឆ្នាំ ២០១៧ កន្លងទៅ ដោយជំងឺទឹកនោមផ្អែមដំណាក់កាលចុងក្រោយ។

៨/តារាចម្រៀងអ្នកនាង សាន ស្រីឡៃ បានស្លាប់បាត់បង់ជីវិតកាលពីថ្ងៃទី ១៦ ខែ តុលា ឆ្នាំ ២០១៧ ដោយ បុរសជាប្ដីបាញ់សម្លាប់ នៅហាងកែសម្ផស្សមួយកន្លែង ស្ថិតបណ្ដោយផ្លូវលេខ៣៦០ ក្នុងសង្កាត់បឹងកេងកង១ ខណ្ឌចំការមន ហើយបន្សល់ទុកនូវកូនប្រុស២នាក់ កំព្រាទាំងឪពុក និងម្ដាយ ក្រោមការមើលថែរក្សារបស់ជីដូនជាស្ត្រីមេម៉ាយ។

៩/តារាចម្រៀង និងកំប្លែង ស្រីតុ និង ស្វាមី បានជួបរឿងក្រៀមក្រំ និងសោកសៅបំផុតកាលពី ថ្ងៃទី ១៧ ខែ តុលា ឆ្នាំ ២០១៧ កន្លងផុតទៅដោយប្អូនស្រីជីដូនមួយបានស្លាប់បាត់បង់ជីវិត ក្រោយពីរឿងឃាតកម្មបាញ់សម្លាប់ អ្នកនាង សាន ស្រីឡៃ បានមួយថ្ងៃ។

១០/ តារាសម្ដែងសិចស៊ី សាច់សខ្ចី អ្នកនាង វ៉ា នួនសុភា ហៅ កែវ សុរិយា អាយុ ២៩ ឆ្នាំ បានចងកធ្វើអត្តឃាតខ្លួនឯងកាលពីថ្ងៃទី ២៣ ខែ តុលា ឆ្នាំ ២០១៧ បន្ទាប់ពីបានលែងលះគ្នាជាមួយស្វាមីរយៈពេលកន្លះឆ្នាំមកនេះ៕