មិនធម្មតា! ទូតអាមេរិកគ្រោងផ្ដល់ប្រាក់ខ្ទង់ម៉ឺនដុល្លារឲ្យ យឹង យន ផលិត Original Song

2017-10-25 03:48:46
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង លោក យឹង យន បានបង្ហើបឲ្យដឹងថា ឆាប់ៗខាងមុខនេះ ស្ថានទូតអាមេរិកប្រចាំនៅប្រទេសកម្ពុជា នឹងរៀបចំកម្មវិធីសម្ពោធ Album Original Song ឲ្យលោក ដោយកម្មវិធីនោះ គ្រោងចំណាយខ្ទង់១ម៉ឺនដុល្លារ បូកទាំងការរៀបចំពិធី និង ការផលិតបទចម្រៀងបន្ត។

លោក យឹង យន បានរៀបរាប់ឲ្យដឹងថា មូលហេតុដែលនាំឲ្យស្ថានទូតអាមេរិក គាំទ្រស្នាដៃរបស់លោកបែបនេះ ក៏ព្រោះតែលោកធ្លាប់ផលិត Original song ជាច្រើនបទទាក់ទងនឹងសម្រស់នៅទឹកដីអាមេរិក មានការគាំទ្រច្រើនពីប្រជាជនខ្មែរទាំងនៅអាមេរិក ក៏ដូចនៅប្រទេសកម្ពុជា។

"រឿងនេះ ផ្ដើមចេញកម្មវិធី១ ឈ្មោះ ONE BEAT ទូតអាមេរិកបានឲ្យខ្ញុំទៅច្រៀងនិងធ្វើសិក្ខាសាលានៅអាមេរិកខែ កាលឆ្នាំ២០១៣ កាលណោះខ្ញុំនិពន្ធបទ"សម្រស់ហ្វូរីដា" បទហ្នឹងជាប់លេខ២កម្មវិធី Hear My Song របស់Sabay គេគាំទ្រច្រើន ហើយបន្ទាប់មកខ្ញុំនិពន្ធបទជាច្រើនទៀតទាក់ទងមេរិក ដោយឃើញស្នាដៃបង្ហាញពីទំនាក់ទំនងវប្បធម៌ខ្មែរ-អាមេរិកបែបនេះ ទូតគេឲ្យខ្ញុំសរសេរ Proposal សុំថវិកាមួយចំនួន ដើម្បីផលិតឲ្យចេញជាAlbum “ លោក យឹង យន លើកឡើង។

តារាចម្រៀងរូបនេះបានបន្តទៀតថា Album Original song ដែលទូតអាមេរិកគ្រោងរៀបចំកម្មវិធីសម្ពោធឲ្យលោក មានទាំងអស់១១បទ ដោយនៅក្នុងនោះបទចម្រៀងដែលថតជាMVរួចមាន៤បទ នៅសល់៧បទ គ្រោងថតបញ្ចប់ បន្ទាប់ពីទទួលបានថវិកា ក្រោយការរៀបចំពិធីរួច។ កម្មវិធីគ្រោងធ្វើនៅថ្ងៃទី១៥ ខែ ធ្នូ ឆ្នាំ ២០១៧ នៅ CKCC ដោយគ្រោងអញ្ជើញភ្ញៀវខ្ទង់៤០០នាក់ចូលរួម។ ជាមួយគ្នានោះក៏មាន ការដាក់ដល់Album របស់លោកផង។

Album Original song ទាំង១១បទនោះ លោក យឹង យន បានប្រាប់ថា តាមគម្រោងមិនមែនច្រៀងតែលោកម្នាក់ឯងឡើយ ពោលគឺមានតារាចម្រៀងស្រី៣នាក់ផ្សេងទៀតដោយពួកគេច្រៀងក្នុងម្នាក់១បទ គឺ អ៊ុន ស្រីលីស, គ្រីប លក្ខិណា និង ចាន់ វណ្ឌី។ លោកថា ទាំងការរៀបចំកម្មវិធីខាងលើ និង ថវិកាទុកសម្រាប់ផលិតបទចម្រៀង៧បទបន្ថែមទៀត ប្រហែលជាជិត១ម៉ឺនដុល្លារ។

ជុំវិញទំនាក់ទំនងវប្បធម៌សិល្បៈខ្មែរអាមេរិកនេះ កន្លងមក យឹង យន ធ្លាប់ និពន្ធចម្រៀង៤បទមកហើយ មាន បទទី"សម្រស់ហ្វូរីដា",បទ "អនុស្សាវរីយ៍មិនីសូតា",បទ" លាហើយឈីខាហ្គោ",បទ"កូឡាបឡូវែល" ជាដើម។ ជាមួយគ្នានោះ លោកធ្លាប់ទៅច្រៀងនៅទឹកដីអាមេរិកចំនួន៤លើកមកហើយ គឺនៅឆ្នាំ ២០១៣ ម្ដង នៅឆ្នាំ ២០១៥ ម្ដង និង ឆ្នាំ ២០១៦ ចំនួន២ដង។ តារាចម្រៀងរូបនេះ សង្ឃឹម យ៉ាងមុខមាំថា ក្រោយផលិត Album Original song នេះរួច លោកនឹងកាន់តែមានឱកាស ចេញទៅច្រៀងនៅប្រទេសមហាអំណាចនេះ កាន់តែញឹកថែមទៀត។