យី កក្កដា សិល្បករពហុជំនាញ ចេះគូរគំនូរ២ផ្ទាំងក្នុងពេលតែមួយ មានប្រវត្តិកំសត់នឹកស្មានមិនដល់

2017-10-26 03:54:24
ចំនួនមតិ 0 | ចំនួនចែករំលែក 0

ចន្លោះមិនឃើញ

មានអាយុទើបតែ២២ឆ្នាំ សិល្បករ ពហុជំនាញ កក្កដា ចេះទាំងគូរគំនូរបុរាណ សម័យ ទាំងលើជញ្ចាំង និងលើកំណាត់ ឬក្រដាស។ លើសពីនោះគឺមានទេពកោសល្យ គូររូប២ផ្ទាំងដោយប្រើដៃពីរក្នុងពេលតែមួយ។

បន្ថែមពីលើជំនាញខាងលើនេះ កក្កដា ក៏អាចលេងភ្លេង ថែមទាំងចេះឆ្លាក់រូបបានទៀតផង ដោយបច្ចុប្បន្នរូបគេអាចរកចំណូលបានខ្ទង់ពាន់ដុល្លាជារៀងរាល់ខែ ក៏ប៉ុន្តែយើងមិននឹកស្មានដល់ថាយុវជនរូបនេះធ្លាប់ឆ្លងកាត់ប្រវត្តិដ៏កំសត់ ទម្រាំមានថ្ងៃនេះ។

កាលពី កក្កដា អាយុ ៤ឆ្នាំ ឪពុកក៏បានមរណភាព ហើយរហូតដល់ខ្លួនមានអាយុ ១០ឆ្នាំ ម្តាយរ ក៏ឈឺស្លាប់ទៀត។ ក្រោយពីអ្នកមានគុណទាំងពីរលាចាកលោក កក្កដា ត្រូវរស់នៅខ្លួនទីពឹងខ្លួន ជាមួយបងប្អូនរហូតដល់ទៅ៨នាក់។

ជាក្មេងដែលអណ្តែតត្រសែត ត្រាច់ចរតាមបងស្រីដើម្បីរកស៊ីលក់ដូរសម្លៀកបំពាក់ ហើយនិងខិតខំរៀនរស់ដោយពឹងលើសមត្ថភាពខ្លួនឯង ដូចជាស៊ីឈ្នួលរត់តុគុយទាវ កាហ្វេ ឬការងារសំណង់ជាដើម និយាយរួមការងារអ្វីក៏ដោយឲ្យតែគេឲ្យលុយ គឺធ្វើទាំងអស់ដើម្បីចិញ្ចឹមជីវិត។

ដោយសារជីវភាពក្រីក្រ កក្កដា មិនបានរៀនសូត្រសាលាចំណេះដឹងទូទៅបានចប់ថ្នាក់ទី១២នឹងគេនោះទេ។

ជារឿងដែលនឹកស្មានមិនដល់មួយទៀត ដែលយុវជនចិត្តស៊ូម្នាក់នេះក្លាយខ្លួនជាសិល្បករ វិចិត្រករ ដោយចូលសាលារៀនសិល្បៈមួយនៅខេត្តបាត់ដំបងបានត្រឹមតែ ២ ទៅ ៣ខែ រូបគេក៏ចេញប្រឡូកការងារសិល្បៈគំនូរនេះ តែស្នាដៃមិនធម្មតា។ រូបគំនូររបស់កក្តដា ធ្លាប់ទទួលបាន ប័ណ្ណសរសើរ និងមេដាយកិត្តិយសពីអង្គការយូនេស្គូប្រចាំនៅកម្ពុជាទៀតផង។

ត្បិតតែមិនទទួលបានការអប់រំខ្ពង់ខ្ពស់ តែយុវជនដែលមានស្រុកកំណើតនៅខេត្តបាត់ដំបងរូបនេះ តែងលើកតម្លៃការសិក្សាអប់រំ ហើយរូបគេក៏តែងតែចូលរួមចំណែកតាមសមត្ថភាព ក្នុងការងារសង្គម ដោយយកថវិកាដែលរកបានពីការងារសិល្បៈទៅធ្វើជាគំនូរបែបអប់រំ សិល្បៈចែករំលែកនានា តាមសាធារណៈ និងតាមមណ្ឌលក្មេងកំព្រាជាដើម។

ចំពោះបំណងប្រាថ្នាទៅអនាគត សក្កដា លើកឡើងថាខ្លួនចង់ធ្វើឲ្យសិល្បៈខ្មែរ ពិសេសសិល្បៈនៃការច្នៃប្រឌិតរបស់ខ្លួនមានការទទួលស្គាល់ដល់បរទេស និងធ្វើឲ្យប្រទេសកម្ពុជាមានភាពល្បីល្បាញ៕

អត្ថបទៈ Sunny