សិល្បករចាប់ផ្ដើមបារម្ភខ្លាំង ក្រោយផលិតករចង់បិទទ្វារផលិតកម្ម

2017-10-28 06:48:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ុន្មានថ្ងៃមកនេះ មានការជជែកវែកញែកច្រើនតាំងពីក្រសួងបានប្រកាសពីផែនការអនុវត្តកាត់ពន្ធភាពយន្តរួចមក។ បញ្ហានេះ ផលិតករជាច្រើនដែលប្រឈមដោយផ្ទាល់លើករណីនេះ ព្រលយថាផលិតកម្មរបស់ពួកគេមានតែបិទទ្វារប៉ុណ្ណោះ ដែលធ្វើអោយមានការព្រួយបារម្ភមួយជាន់ទៀតក្នុងចំណោមសិល្បករ។

សិល្បករមានការបារម្ភថា ការបិទទ្វារផលិតកម្ម១ ឬច្រើនជាងនេះនៅពេលខាងមុខ ដែលអាចកើតមានដោយសារតែមិនទាន់អាចរាប់រងទទួលបន្ទុកបង់ពន្ធជូនរដ្ឋដែលមានរហូត១១ចំណុចនោះ គឺធ្វើឲ្យទីផ្សារការងាររបស់ពួកគេកាន់តែរួមតូច។

កញ្ញា សាឡាត់ ស្រីឡាង ជាតារាសម្ដែងមួយរូបបានអះអាងថា ឃើញប្រកាសរបស់ក្រសួងលើការកាត់ពន្ធក្នុងវិស័យភាពយន្តនេះ ធ្វើឲ្យកញ្ញា អស់កម្លាំងចិត្តធ្វើកិច្ចការងារទៀតណាស់។ “បើម្លឹងៗពួកខ្ញុំជា សិល្បករ សិល្បការនី មានកម្លាំងចិត្តឯណាទៀតនោះ ក្នុងនាមនាងខ្ញុំជាសិល្បករខ្ញុំសូមសំណូមពរ ទៅក្រសួងពាក់ព័ន្ធ មេត្តាអនុគ្រោះការ បង់ពន្ធដារយៈពេល ១០ឆ្នាំ ដើម្បីលទ្ធភាពអោយវិស័យភាពយន្តខ្មែរមានស្ថេរភាពសិន”។

លោក អ៊ុំ សុវណ្ណគីរី បានបញ្ចេញទស្សនៈផ្ទាល់ខ្លួនថា លោកដឹងថា ប្រជាពលរដ្ឋមានកាតព្វកិច្ចត្រូវបង់ពន្ធជូនរដ្ឋ មិនថាតែសិល្បករទេ ប៉ុន្តែថា ការអនុវត្តភ្លាមៗនៅពេលនេះ គឺមិនសមស្រប ដោយហេតុថា វិស័យភាពយន្តក្នុងស្រុកទើបតែងើបឡើង ទាំងផលិតកម្ម និងសិល្បករចំណូលនៅមានកម្រិតទាបណាស់បើធៀបនឹងសិល្បករប្រទេសជិតខាង។ ដូច្នេះហើយលោក ស្នើក្រសួងពិចារណាលើសំណើររបស់ផលិតករ សិល្បករ លើកលែង ឬពន្យារពេលអនុវត្តការបង់ពន្ធ ១០-១៥ឆ្នាំ ដើម្បីគ្រប់ផ្នែករឹងដៃរឹងជើងទាំងអស់គ្នាសិន។

សិល្បករបន្តទៀតមាន ភុល សុវណ្ណដានីន ឌីជេ កាកា និង យិត មាសឧស្សា ជាដើម បានសំណូមដូចគ្នាថា ស្នើសុំក្រសួងពន្យារពេលអនុវត្តការបង់ពន្ធទាញចេញពីវិស័យភាពយន្ត។ ព្រោះថា ផែនការថ្មីនេះ បានធ្វើឲ្យប៉ះពាល់យ៉ាងគំហុកដល់បុគ្គលក្នុងវិស័យភាពយន្តទាំងអស់ ក្នុងពេលគ្រប់គ្នានៅទន់ដៃជើងនៅឡើយ។ ផែនការអនុវត្តការកាត់ពន្ធក្នុងវិស័យភាពយន្ត ទើបត្រូវប្រកាសថ្មីៗនេះដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ពីគោលការណ៍របស់មន្ត្រីពន្ធដារ ក្នុងការប្រមូលពន្ធពីវិស័យភាពយន្ត ក្នុងកិច្ចប្រជុំមួយរវាងផលិតករ និងក្រសួងក្រោមប្រធានបទ “ដើម្បីលើកស្ទួយវិស័យសិល្បៈ និងភាពយន្ដខ្មែរ”។

ពន្ធលើវិស័យភាពយន្តនោះ មាន៖ ពន្ធទី១ គឺពន្ធពីចំណូលនៃការបញ្ចាំងក្នុងរោង កាត់១០ភាគរយទៅរដ្ឋ។ ទី២ ក្រោយចែកជាមួយរោងកុន ត្រូវកាត់១ភាគរយទៅរដ្ឋ។ ទី៣ ត្រូវបង់ពន្ធអាករ១០ភាគរយ រៀងរាល់ខែ នៃប្រាក់ចំណូលរបស់ផលិតកម្ម។ ទី៤ ត្រូវបង់ពន្ធ (vat) ប្រចាំឆ្នាំ។ ទី៥ ពន្ធកាត់ទុកពីប្រាក់ចំណូលចំនួន១៥ភាគរយ។ ទី៦ គឺការកាត់ពន្ធ ១០ភាគរយពីតម្លៃជួលទីតាំង ការិយាល័យ។ ទី៧ ពន្ធកាត់ពីបុគ្គលិកពេញម៉ោង១០ភាគរយ សម្រាប់បុគ្គលិកមានប្រាក់បៀវត្សរិ៍ ចាប់ពី៣០០ដុល្លារអាមេរិកឡើងទៅ។ ទី៨ ពន្ធលើអ្នកដឹកនាំសម្តែង អ្នកនិពន្ធ ក្រុមការងារផលិត សិល្បករ ចំនួន១០ភាគរយ។ ទី៩ ពន្ធលើកម្មសិទ្ធិ ឬស្នាដៃ ចំនួន១៥ភាគរយ។ ទី១០ ពន្ធកម្រៃនៃប្រាក់ចំណូលតួសម្តែង ១៥ភាគរយ និងទី១១ ពន្ធលើការជួលទីតាំងថត ការជួលសម្ភារៈ១០ភាគរយ។

ឃើញពីការប្រកាសលើពន្ធវិស័យភាពយន្តនេះ បានធ្វើឲ្យមានការជ្រួលច្របល់ក្នុងចង្កោមផលិតករ ដែលពួកគេបានអះអាងថា មានផ្លូវបិទអាជីវកម្មមួយគត់ ប្រសិនបើប្រកាសត្រូវបានចូលជាស្ថាពរ ព្រោះបន្ទុកបង់ពន្ធមានបន្ទុកធ្ងន់ធ្ងរពេក។

លោក រ៉ូណាន ចាន់ណា ផលិតករវ័យក្មេងនៃផលិតកម្មឥន្ទ្រានិម្មិត ដែលទើបផលិតរឿងបានពី២រឿង បានប្រាប់ថា ផលិតកម្មរបស់លោកលោកទំនងនឹងមិនមានបញ្ចេញនូវវណ្ណកម្មថ្មីណាមួយទៀត ប្រឈមនឹងកាតព្វកិច្ចខាងលើ បើសិនជាសំណើសុំអនុគ្រោះពន្យារពេលលើពន្ធដារ ទទួលបានផលអវិជ្ជមាន។

លោក រ៉ូណាន ចាន់ណា (រូបឆ្វេងដៃ)

លោក លៀក លីដា ចាងហ្វាងផលិតកម្ម LD Picture អះអាងថា លោកក៏ព្រួយបារម្ភដូចគ្នា ពីផែនការខាងលើ។ លោកថា ពន្ធដែលទើបប្រកាស គឺបន្ទុកធ្ងន់ធ្ងរហួសពីផលិតករអាចរ៉ាប់រងបាន។ ជាក់ស្ដែងផលិតកម្មរបស់លោកដែលមាន បុគ្គលិកពេញម៉ោងជាង ៤០នាក់នោះ គឺត្រូវប្រឈមពន្ធ ១៥ភាគរយនៃប្រាក់ខែពួកគេ រួមទាំងពន្ធផ្សេងៗទៀត ដូចជា Vat ជាដើម លោកមិនអាចរាប់រងរួចទេ។

លោក លៀក លីដា ចាងហ្វាងផលិតកម្ម LD Picture

“ដូចរឿងខ្ញុំ ថតនៅបាសិតអី ទៅរក VAT ម៉ោពីណា មានន័យថា ចាយនៅបាសិតអស់ ២០០ហើយ មកបង់២០%ជូនរដ្ឋទៀត ងាប់បាត់!”។ លោក លៀក លីដា ថ្លែង។

សរុបមក ផលិតករទាំងអស់ ស្នើសុំយ៉ាងទទូចអោយក្រសួងបន្ធូរបន្ថយ នឹងពិនិត្យលើសំណើរសុំពន្យារការអនុវត្តពន្ធវិស័យភាពយន្ត ១០-១៥ ឆ្នាំ ដែលពួកគេយល់ថា ជាវេលាសមស្របសម្រាប់គ្រប់គ្នា ផលិតករ សិល្បករ អ្នកដឹកនាំសម្ដែងជាដើម អាចបំពេញកាតព្វកិច្ចបង់ពន្ធជូនរដ្ឋនេះបាន។

សំណើរខាងលើ គឺបានដាក់ទៅក្រសួងរួចហើយ ដោយមានការគាំទ្រពីនាយកដ្ឋានភាពយន្តផង ដែលសុំលើកលែងពន្ធខ្លះ និងស្នើសុំពន្យារពេលអនុវត្តន៍ផ្លូវការ។ ពាក់ព័ន្ធបញ្ហានេះ រដ្ឋមន្ត្រីក្រសួងវប្បធម៌លោក ជំទាវ ភឿង សកុណា មិនទាន់អាចសុំការអធិប្បាយបានទេព្រឹកនេះ។ ផលិតករ សិល្បករ រំពឹងថា សំណើររបស់ពួកគេនឹងអាចទទួលផលវិជ្ជមាន ពុំនោះទេ ចៀសមិនផុតពីការបិទទ្វារអាជីវកម្មនោះឡើយ៕

អត្ថបទៈ ប៊ុណា សភា