ទម្រាំជោគជ័យដូចសព្វថ្ងៃ Land Rover ឆ្លងកាត់ការទិញលក់ពីក្រុមហ៊ុនជាច្រើន

2017-10-29 03:20:52
ចំនួនមតិ 0 | ចំនួនចែករំលែក 0

ចន្លោះមិនឃើញ

Land Rover ជាស្លាកយីហោដ៏ពេញនិយមមួយរបស់ចក្រភពអង់គ្លេស ហើយត្រូវបានគេសម្គាល់ជាពិសេសទៅលើការផលិតរថយន្តរត់ដោយកង់បួនសឹងតែទាំងអស់។ ស្ថិតក្រោមការគ្រប់គ្រងរបស់ក្រុមហ៊ុនឥណ្ឌា Tata Motors ចាប់តាំងពីឆ្នាំ ២០០៨។

ឈ្មោះ Land Rover ធ្លាប់បានប្រើជាលើកដំបូងដោយក្រុមហ៊ុន Rover Company សម្រាប់រថយន្ត Land Rover Series បង្ហាញខ្លួននាឆ្នាំ ១៩៤៨ ដោយកាលនោះអភិវឌ្ឍនូវប្រភេទរថយន្តប៉ុងពីរជាច្រើន មានទាំងម៉ូដែល Defender, Discovery, Freelander, Rang Rover, Range Rover Sport និង Range Rover Evoque។ បច្ចុប្បន្នមានរោងចក្រដំឡើងនៅតាមបណ្ដាប្រទេសធំៗដូចជា អង់គ្លេស, ឥណ្ឌា, ចិន និងទីផ្សារដទៃទៀត។

ដើមកំណើត:

គំនិតបង្កើតរថយន្ត Land Rover ដំបូងបង្អស់លេចចេញនៅឆ្នាំ ១៩៤៧ ដោយលោក Maurice Wilks ។ តំណែងជាប្រធានផ្នែករចនានៃក្រុមហ៊ុន Rover Company ខ្លួនបានចាប់ដៃជាមួយបងប្រុសឈ្មោះ Spencer ដែលជាប្រធានចាត់ការទូទៅនៃ Rover សហការបង្កើតគម្រោងនៃរថយន្ត Series I បានដោយជោគជ័យក្នុងដីចម្ការស្ថិតក្នុងទីក្រុង Newborough រដ្ឋ Anglesey ប៉ុន្តែគំនិតនៃការរចនារថយន្តនោះគឺបំផុសចេញពីរថយន្ត Jeep។

ក្នុងឆ្នាំ ១៩៦៧ Land Rover ស្ថិតក្រោមការគ្រប់គ្រងរបស់ Leyland Motor Corporation ថ្វីបើទទួលបានភាពជោគជ័យប៉ុន្មានទសវត្សរ៍ជាប់គ្នា តែក្រោយមកក្រុមហ៊ុនទាំងមូលត្រូវបានបែកបាក់ ទើបនៅឆ្នាំ ១៩៩៤ Rover Group plc ដែលបានបំបែកខ្លួនចេញអំឡុងឆ្នាំ ១៩៧០ ត្រូវបានទិញយកដោយក្រុមហ៊ុន BMW។ មិនដល់ ១០ ឆ្នាំ Rover Group បានបន្តជួបបញ្ហា ហើយបង្ខំចិត្តឲ្យ BMW និង Land Rover ត្រូវលក់ទៅឲ្យក្រុមហ៊ុន Ford Motor Company ទាំងអស់វិញ។ ការលក់ទិញមិនទាន់បញ្ចប់ ជាចុងក្រោយនាឆ្នាំ ២០០៨ ក្រុមហ៊ុន Ford សម្រេចលក់ Jaguar និង Land Rover ទៅឲ្យក្រុមហ៊ុនឥណ្ឌា Tata Motors គ្រប់គ្រងយក ហើយទទួលបានភាពជោគជ័យមកទល់បច្ចុប្បន្ន។

ការដំឡើងនិងទីផ្សារលក់ចេញ:

រោងចក្រធំបំផុតរបស់ខ្លួនស្ថិតក្នុងទីក្រុង Solihull ប្រទេសអង់គ្លេស ប៉ុន្តែក្នុងគោលបំណងផលិតម៉ូដែល Freelander ខ្លួនត្រូវផ្លាស់ប្ដូរទីតាំងទៅអតីតរោងចក្ររបស់ Ford មានឈ្មោះ Halewood Body & Assembly ក្បែរទីក្រុង Liverpool វិញ។ ចំពោះការប្រឡូកចូលប្រទេសឥណ្ឌា ទើបតែមាននៅឆ្នាំ ២០១៥ នេះ ដើម្បីបង្កើតការផលិតរថយន្តម៉ូដែល Discovery Sport និង Evoque ទើបដំឡើងរោងចក្រថ្មីទៀតក្នុងតំបន់ Chikhali ក្បែរទីក្រុង Pune។

រំឭកថានៅខែកញ្ញា ឆ្នាំ ២០១៣ Jaguar Land Rover បានប្រកាសពីគម្រោងបើកមជ្ឈមណ្ឌលស្រាវជ្រាវនិងអភិវឌ្ឍបច្ចេកវិទ្យារថយន្តជំនាន់ក្រោយ ក្នុងសកលវិទ្យាល័យ University of Warwick ដែលមានតម្លៃជាង ១៦០ លានដុល្លារអាមេរិក ។ ក្នុងនោះមានអ្នកបម្រើការប្រហែល ១ ពាន់នាក់ ហើយដំណាក់កាលចាប់ផ្ដើមកសាងនាឆ្នាំ ២០១៤។

ចំពោះទីផ្សារចេញលក់សកលនាឆ្នាំ ២០០៩ ខ្លួនលក់បានជាង ១៤ ម៉ឺនគ្រឿង ខណៈឆ្នាំ ២០១៣ លក់បានជិត ៣៥ ម៉ឺនគ្រឿង រហូតដល់ឆ្នាំ ២០១៦ បានប្រហែល ៤៣ ម៉ឺនគ្រឿង ។ តួលេខនេះកត់សម្គាល់ថាកើនឡើងជាបន្តបន្ទាប់ គ្រាន់មិនច្រើនខ្លាំងបើធៀបនឹងក្រុមហ៊ុនរថយន្តដទៃ។

ប្រភេទរថយន្តពេញនិយមឆ្នាំ ២០១៧:

គិតត្រឹមឆ្នាំ ២០១៧ ពពួករថយន្តពេញនិយមខ្លាំងបំផុតមាន Discovery 5, Discovery Sport, Range Rover Evoque, Range Rover Sport និង Range Rover។

រថយន្តអគ្គិសនី:

បច្ចេកវិទ្យា ERAD ផ្គត់ផ្គង់ថាមពលអគ្គិសនីសម្រាប់រថយន្ត ត្រូវបានជួយជ្រោមជ្រែងយ៉ាងពេញទំហឹងពីរដ្ឋាភិបាលអង់គ្លេស ស្ថិតក្រោមគម្រោង Energy Saving Trust នៃការស្រាវជ្រាវនិងអភិវឌ្ឍកាបូនកម្រិតទាប។ ដល់ខែកុម្ភៈឆ្នាំ ២០១៣ បច្ចេកវិទ្យានោះបានច្របាប់បញ្ចូលទៅក្នុងរថយន្ត Leopard 1 ដែលផលិតកម្លាំង ៧០ គីឡូវ៉ាត់ អាចបើកបរក្នុងចម្ងាយផ្លូវជាង ៨០ គីឡូម៉ែត្រក្នុងការសាកបញ្ចូលភ្លើងម្ដង។

ការពង្រីកស្លាកយីហោ:

Land Rover មិនត្រឹមតែជាស្លាកយីហោរថយន្តមួយមុខទេ ទៀតសោតក៏មានអាជីវកម្មដទៃទៀត ដែលក្រុមហ៊ុនខ្លួនបានពង្រីកដល់:

ទោចក្រយានយន្ត: នៅឆ្នាំ ១៩៩៥ Land Rover បានផលិតទោចក្រយានយន្ត (កង់) ដោយប្រើ Logo ខ្លួន និងឲ្យឈ្មោះថា Land Rover APB និងផលិតដោយក្រុមហ៊ុន Pashley Cycles។ រហូតដល់ខែមិថុនា ឆ្នាំ ២០០៤ ខ្លួនបានបញ្ចេញលក់កង់ដល់ ២៤ ម៉ូដ ដែល ៣ ម៉ូដមានឈ្មោះ Defender, Discovery និង Freelander ដូចទៅនឹងឈ្មោះរថយន្តដែរ។

អាជីវកម្មកាហ្វេ: នៅឆ្នាំ ២០០៥ ខ្លួនបានប្រឡូកក្នុងអាជីវកម្មកាហ្វេ គាប់ជួនពេលដែល Land Rover Coffee បានបង្កើតឡើង។

រទេះរុញទារក: ក្រុមហ៊ុនអង់គ្លេសនេះ បានផលិតនៅរទេះរុញកង់បី សម្រាប់ទារក។ វារចនានៅជម្រើសពណ៌ច្រើនដូចជា Light Blue, Sand Colour និង Olive Drab ប៉ុន្តែសោកស្ដាយនៅឆ្នាំ ២០០២ ចង្វាក់ផលិតកម្មត្រូវបានផ្ដាច់ចោល៕

ប្រភព៖ en.m.wikipedia.org ប្រែសម្រួល៖ កៅ រក្សា