បងប្អូនភ្លោះ ល្បងនឹងមុខងារស្កេនមុខ iPhone X លទ្ធផលបែបណា?

2017-11-01 02:24:42
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានចែក iPhone X ដល់បណ្ដាសារព័ត៌មានជាច្រើន ដោយត្រូវបានគេសាកល្បងលើមុខងារជាច្រើនក្នុងនោះរួមមានមុខងារស្កេនមុខ Face ID ផងដែរ។

សារព័ត៌មានមួយចំនួនដូចជា Mashable និង Tech Insider បានយកកូនភ្លោះដែលមានមុខមាត់ដូចគ្នាមកសាកល្បងដោះសោលើ iPhone X តែមួយ ដោយចង់ដឹងថាកូនភ្លោះអាចបោកប្រាស់មុខងារ Face ID បានឬអត់។

Mashable បានធ្វើតេស្តដោយឲ្យកូនភ្លោះពីរគូដោះសោ iPhone X ដោយដំបូងឲ្យកូនភ្លោះម្នាក់កំណត់ផ្ទៃមុខជាមួយមុខងារ Face ID រួចសាកល្បងធ្វើការដោះសោដោយប្រើផ្ទៃមុខ។ បន្ទាប់មកឲ្យកូនភ្លោះម្នាក់ទៀតដែលមិនបានកំណត់ផ្ទៃមុខជាមួយ Face ID សាកល្បងធ្វើការដោះសោ។ លទ្ធផល កូនភ្លោះដែលមិនបានកំណត់ផ្ទៃមុខនៃកូនភ្លោះទាំងពីរគូ សុទ្ធតែអាចដោះសោ iPhone X បាន។ ទស្សនាវីដេអូខាងក្រោម ៖

ដោយឡែកការធ្វើតេស្តរបស់ Tech Insider ទទួលបានលទ្ធផលផ្ទុយពីនេះ។ នៅក្នុងការធ្វើតេស្តដំបូងគេបានឲ្យកូនភ្លោះម្នាក់កំណត់ផ្ទៃមុខ បន្ទាប់មកសាកល្បងបន្លំមុខងារ Face ID ដោយពាក់មួក, ពាក់វ៉ែនតា និងបង់កន្សែង ប៉ុន្តែមុខងារ Face ID អាចចំណាំផ្ទៃមុខបានគ្រប់ពេល។ ក្រោយមកបងប្អូនភ្លោះម្នាក់ទៀតសាកល្បងប្រើផ្ទៃមុខខ្លួនដើម្បីដោះសោ iPhone X ប៉ុន្តែមិនអាចដោះសោបាននោះទេ។ ទស្សនាវីដេអូខាងក្រោម ៖

Apple ធ្លាប់បានបញ្ជាក់ថាមុខងារ Face ID ប្រហែលជាមិនអាចបែងចែកភាពខុសគ្នារវាងកូនភ្លោះបាននោះទេ។ Phil Schiller អនុប្រធាន Apple បានលើកឡើងថា ៖ "ឱកាសដែលអ្នកដទៃអាចមើល iPhone X របស់អ្នក រួចដោះសោដោយប្រើផ្ទៃមុខរបស់គេ គឺឱកាស ១ លើ មួយលាន។ ពិតណាស់ថាឱកាសនេះនឹងមានកាន់តែខ្ពស់ប្រសិនបើមនុស្សម្នាក់នោះមានទំនាក់ទំនងហ្សែនជិតស្និទ្ធជាមួយអ្នក។ ដូចនេះបើអ្នកមានបងប្អូនភ្លោះ គួរតែការពារទិន្នន័យរបស់អ្នក ដោយប្រើលេខកូដសម្ងាត់”។

មុខងារ Face ID ដំណើរការដោយប្រើបន្ទះឈីប A11 Bionic ដោយមាននូវ Neural Engine មកជាមួយ ហើយវានឹងជួយឲ្យមុខងារ Face ID កាន់តែឆ្លាតទៅៗ៕

ប្រភព៖ macrumors ប្រែសម្រួល៖ សុខហេង