Miss Global International 2017 បង់កក្រមាខ្មែរ រាំចង្វាក់ប្រពៃណីខ្មែរ យ៉ាងសប្បាយរីករាយ

2017-11-07 02:51:33
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបញ្ចប់ទស្សនកិច្ច ស្វែងយល់ពីការរស់នៅរបស់ប្រជាជននៅ ក្នុងឃុំមួយចំនួនក្នុងស្រុក អូររាំងឪ ខេត្ត ត្បូងឃ្មុំរួចមក ល្ងាចថ្ងៃទី០៦ ខែ វិច្ឆិកា កន្លងទៅនេះ ស្រីស្អាតMiss Global International ត្រូវបានក្រសួងបរិស្ថានធ្វើពិធីជប់លៀងជូន ពួកគេបានបង់កក្រមាខ្មែរ និង រាំចង្វាក់ប្រពៃណីរបស់ខ្មែរ ដូចជារាំវង់ រាំក្បាច់ សារ៉ាវ៉ាន់ ឡាំលាវ យ៉ាងសប្បាយរីករាយ។

កាលពីថ្ងៃទី០៥ ខែ វិច្ឆិកា ឆ្នាំ ២០១៧ កន្លងទៅ ស្រីស្អាតទាំង៦៥រូប តំណាងប្រទេសទាំង៦៥ មកពីជុំវិញពិភពលោក ដែលកំពុងតែចូលរួមប្រឡង Miss Global International 2017 ក្នុងទេសកម្ពុជា ត្រូវបានអ្នករៀបចំកម្មវិធីសហការជាមួយក្រសួង បរិស្ថាន ដឹកនាំទៅទស្សនាស្ថានភាពការរស់នៅរបស់ប្រជាជននៅ ក្នុងឃុំមួយចំនួនក្នុងស្រុក អូររាំងឪ ខេត្ត ត្បូងឃ្មុំ។ ឃុំដែលពួកគេបានទៅ ទស្សនកិច្ចមានឃុំ សូភី ឃុំ ព្រះធាតុ ឃុំ គងជ័យ ឃុំ ដំរិល ឃុំ មៀន និង ឃុំ អំពិលតាពក ជាដើម។ ក្នុងដំណើរទស្សនកិច្ចនោះ ពួកគេបានទៅសាលារៀន វត្ត ផ្សារ ហើយជាពិសេសនោះ គឺបានចូលរួមដាល់អំបុកស្រូវថ្មី ជាមួយពលរដ្ឋយ៉ាងសប្បាយរីករាយ។

ឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងពីសក្ដានុពលទេសចរណ៍ប្រវត្តិសាស្ត្រ ក៏ដូចជាសម្រស់ធម្មជាតិ ដែលកម្ពុជាមានជូនដល់បេក្ខភាព Miss Global International ទាំង៦៥ រូបបានដឹង ក្នុងនោះដែរឯកឧត្ដមរដ្ឋមន្ត្រី ក៏បានគាំទ្រ និង ស្វាគមន៍យ៉ាងកក់ក្ដៅពី វត្តមានក៏ដូចជាកម្មវិធីប្រកួតនេះ។ ឯកឧត្ដម បានស្នើឲ្យភាគីដែលពាក់ព័ន្ធ មេត្តាយកចិត្តទុកដាក់ដោយមានទំនូលខុសត្រូវខ្ពស់ ដើម្បីឲ្យកម្មវិធីខាងលើ ទទួលបានភាពជោគជ័យ។

អ្វីដែលជាការចាប់អារម្មណ៍នារាត្រីនោះ បេក្ខភាព Miss Global International បានបង់កក្រមា និង រាំចង្វាក់ប្រពៃណីរបស់ខ្មែរ ដូចជារាំវង់ រាំក្បាច់ សារ៉ាវ៉ាន់ ឡាំលាវ ជាមួយមន្ត្រីក៏ដូចជាថ្នាក់ដឹកនាំជាច្រើនរូបទៀត យ៉ាងសប្បាយរីករាយ។

ក្រៅពីទស្សនកិច្ចនៅខេត្ត ត្បូងឃ្មុំ តាមគម្រោង ពួកគេគ្រោងទៅទស្សនកិច្ចបន្ត នៅ ខេត្ត សៀមរាប ព្រះសីហនុ ភ្នំបូកគោ ខេត្តកំពត ជាដើម។

Miss Global International ជាកម្មវិធីប្រកួតសម្រស់អន្តរជាតិមួយ ដែលមានការបញ្ជ្រាបការយល់ដឹងពីបរិស្ថាន។ តាមការឲ្យដឹងពីអ្នករៀបចំ កម្មវិធីនេះបានធ្វើឡើងចំនួន៥លើកមកហើយនៅប្រទេសមួយចំនួនក្នុងពិភពលោក។ សម្រាប់នៅឆ្នាំ២០១៧នេះ ប្រទេសកម្ពុជា គឺជាម្ចាស់ផ្ទះ ហើយក៏ជាលើកដំបូងរបស់កម្ពុជាផងដែរ។ កម្មវិធីចាប់គ្រោងបញ្ចប់នៅថ្ងៃទី១៧ ខែ វិច្ឆិកា ឆ្នាំ២០១៧។

កញ្ញា យស ប៉ូលីណា (Paulina Yos) តំណាងកម្ពុជា ត្រូវបានជ្រើសរើសឲ្យចូលរួមប្រកួតកម្មវិធីបវរកញ្ញាពិភពលោកនេះ។ ប៉ូលីណា មានវ័យ២៥ឆ្នាំ នាងមានឈាមជ័រខ្មែរ-អាមេរិក ដោយសព្វថ្ងៃរស់នៅក្រុង San Francisco រដ្ឋ California សហរដ្ឋអាមេរិក៕

អត្ថបទៈ ស៊ុនហួត