ក្រុមស្គរនារីដ៏កម្រ បង្កើតស្នាដៃថ្មីបង្កប់អត្ថន័យជ្រៅដល់ក្មេងជំនាន់ក្រោយ

2017-11-10 03:03:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមស្គរនារីដ៏កម្រមួយក្រុមឈ្មោះថា "ក្រុមមេធា"* មានសមាជិក៧នាក់សុទ្ធតែជាស្ត្រី បានយកឧបករណ៍ស្គរពីសម័យបុរាណមកបង្កើតបទភ្លេងថ្មី សម្រាប់ទុកជាមរតកដល់ក្មេង១០០ឆ្នាំក្រោយ និងមានបង្កប់អត្ថន័យល្អ ធ្វើឱ្យអ្នកទស្សនាក្នុងមហោស្រពបុណ្យរួមកាលពីពេលកន្លងទៅ មានការភ្ញាក់ផ្អើលខ្លាំង។

ប្រធានក្រុមស្គរនារី អ្នកនាង សាំង ស្រីពេជ្រ បានប្រាប់ Sabay ថា ក្រុមនេះទើបតែបង្កើតនៅខែមករា ឆ្នាំ២០១៧នេះតែប៉ុណ្ណោះ ហើយឈ្មោះ "មេធា" មានន័យថា មោះមុត ក្លាហាន ជម្នះរាល់ឧបសគ្គគ្រប់បែបយ៉ាង។ ក្រុមនេះបង្កើតបានស្នាដៃថ្មី៣ មានឈ្មោះថា "ព្រលឹងស្គរជ័យ” ”ផ្ដើមចេញពីខ្ញុំ”និងស្នាដៃ”ទិស” ។ ស្នាដៃទាំងនេះសុទ្ធតែមានអត្ថន័យរបស់វា សូមមើលអត្ថន័យខាងក្រោម៖

អត្ថន័យស្នាដៃទាំង៣៖

ស្នាដៃ "ព្រលឹងស្គរជ័យ" សំដៅលើស្គរ និងមនុស្សមានព្រលឹងតែមួយ បើអ្នកវាយចង់បង្ហាញពីអារម្មណ៍ល្អ ឬមិនល្អ ទុកកង្វល់ ឬអារម្មណ៍យ៉ាងណាមួយ ពេលវាយទៅលើស្គរ វានឹងឮសំឡេងទៅតាមអារម្មណ៍អ្នកនោះ។

ស្នាដៃ "ទិស" មានន័យថាទិសទាំង៨ បើមនុស្សកំណត់គោលដៅថាចង់ទៅទិសណា នោះនឹងតម្រង់ទៅទិសនោះ បានដល់គោលដៅយ៉ាងប្រាកដ។

ស្នាដៃ “ផ្ដើមចេញពីខ្ញុំ” ក្រុមនេះចង់បង្ហាញថា រាល់ការងារទាំងអស់អាចសម្រេចទៅបាន គឺត្រូវផ្ដើមចេញពីខ្លួនយើងជាមុន ដោយមានក្រុមស្គរនារីជាឧទាហរណ៍ស្រាប់។

ប្រធានក្រុមមេធាអ្នកនាង សាំង ស្រីពេជ្រ នៅខាងមុខ

ប្រធានក្រុមមេធាអ្នកនាង សាំង ស្រីពេជ្រ បន្តថា “ពីមុនសូម្បីតែយើងវ៉ៃលេងក៏គ្រូអត់ឱ្យវ៉ៃដែរ តែយើងសួរថាហេតុអី សូម្បីតែប៉ះក៏គាត់មិនឱ្យប៉ះផង គាត់ថាស្គរសម្រាប់តែមនុស្សប្រុសលេងទេ ស្រីមិនឱ្យលេងទេ ព្រោះវាត្រូវការប្រើកម្លាំងខ្លាំង។ តែខ្ញុំថា ស្រីក៏អាចលេងបានដែរ ឥលូវយើងបង្កើតក្រុមស្គរនារីបានហើយ ពេលហាត់ដំបូងវាពិបាកមែន យើងត្រូវប្រើកម្លាំងច្រើន ឈឺដៃ តែយើងនៅតែអាចធ្វើបាន យើងចង់បង្ហាញថា រឿងមួយចំនួនមនុស្សស្រីក៏អាចធ្វើបាន ហើយធ្វើបានល្អផង”។

លក្ខណៈពិសេសរបស់ស្គរដែលលេងក្នុងក្រុមមេធា គឺស្គរទាំងអស់ដែលយកមកលេង ត្រូវបានស្រាវជ្រាវ និងដកស្រង់ចេញពីជញ្ជាំងប្រសាទបាយ័ន និងមានប្រវត្តិជាស្គរហែក្បួនទ័ព កាលពីសម័យបុរាណ។ ស្គរលេងក្នុងក្រុមមេធាមាន ស្គរសាំងណា ស្គរទីមីឡា ស្គរធំ ស្គរតូច ស្គរដៃ ហើយស្គរទាំងនេះសុទ្ធតែមានគូញីឈ្មោលទាំងអស់។

ទៅថ្ងៃអនាគតក្រុមនេះមានបំណងស្រាវជ្រាវឧបករណ៍ផ្លុំ ដូចជា ខ្យង ត្រែ ស្នែង ជាដើម យកមកលេងជាមួយឧបករណ៍ស្គរ និងបង្កើតបទភ្លេងថ្មីដើម្បីឱ្យសាច់បទដែលបង្កើតថ្មី កាន់តែសម្បូរបែប និងមានភាពអស្ចារ្យមួយកម្រិតទៀត។ ក្រុមនេះមិនទាន់កំណត់ឱ្យប្រាកដថា នៅពេលណានឹងចាប់ផ្ដើមបង្កើតបទភ្លេងថ្មីដែលមានទាំងស្គរ និងឧបករណ៍ផ្លុំឡើយទេ ដោយរង់ចាំឱ្យសមាជិកក្រុមទាំងអស់ស្ទាត់ជំនាញទៅលើឧបករណ៍ស្គរសិន។

ក្រុមស្គរនារីនេះ មានទាំងសមាជិកដែលចេះឧបករណ៍ភ្លេងបុរាណស្រាប់ និងមានទាំងស្ត្រីរបាំដែលមិនធ្លាប់រៀនភ្លេងពីមុន តែពួកគេបានមកហាត់រៀនបទភ្លេងថ្មី ប្រកបដោយទេពកោសល្យ និងភាពច្នៃប្រឌិត៕

អត្ថបទ៖ ប៉ូ សាគុន

Cambodian Living Arts (CLA)