កូនស្រីតែម្នាក់គត់របស់ប្រធានាធិបតីឥណ្ឌូនេស៊ី រៀបអាពាហ៍ពិពាហ៍ហើយ

2017-11-09 05:08:10
ចំនួនមតិ 0 | ចំនួនចែករំលែក 0

ចន្លោះមិនឃើញ

Kahiyang Ayu គឺជាកូនស្រីតែម្នាក់គត់ក្នុងចំណោមបងប្អូន ៣នាក់របស់ប្រធានាធិបតីឥណ្ឌូនេស៊ី លោក ចូកូ វីដូដូ។ ការរៀបចំពិធី គឺយកតាមប្រពៃណីជ្វា និងមានការចាក់បញ្ចាំងលើកញ្ចក់ទូរទស្សន៍ផង។

លោកប្រធានាធិបតីល្បីប្រើកណ្ដាប់ដៃដែកបាញ់កម្ទេចទូកនេសាទបរទេសខុសច្បាប់នេះ បានអញ្ជើញភ្ញៀវចូលរួមប្រមាណ ៨ ០០០នាក់ មានទាំងអ្នកនយោបាយ អ្នកមុខអ្នកការជាច្រើនរូបផ្សេងទៀត។

នៅពេលល្ងាចមុនថ្ងៃរៀបអាពាហ៍ពិពាហ៍ គ្រួសារខាងកូនក្រមុំបានស្លៀកពាក់បែបទំនៀមទម្លាប់ប្រពៃណីជ្វាជាច្រើនឈុត។ ពិធី និងក្បួនដង្ហែបានប្រារព្ធធ្វើឡើងនៅថ្ងៃពុធទី ៨ វិច្ឆិកា ម្សិលមិញនៅគេហដ្ឋានខាងស្រីក្នុងក្រុង Surakarta ខេត្ត Central Java។

ចំណែកកូនកំលោះត្រូវគេស្គាល់ឈ្មោះថា Muhammad Bobby Afif Nasution ជាអ្នកជំនួញអចលនទ្រព្យ និងជាសមាជិកជនជាតិភាគតិច Batak។ កូនក្រមុំមានអាយុ ២៦ឆ្នាំ ជាកូនកណ្ដាល ដោយមានប្អូនប្រុសម្នាក់ និងបងប្រុសម្នាក់។

លោកប្រធានាធិបតី បានជួលរទេះសេះចំនួន ៥០គ្រឿង ដើម្បីទទួលដឹកភ្ញៀវមួយចំនួន។ គួររម្លឹកថា វីដូដូ ជាចៅហ្វាយក្រុង Solo ដំបូងគេ បន្ទាប់មកជាអភិបាលក្រុងចាកាតា មុនក្លាយជាប្រធានាធិបតីក្នុងឆ្នាំ ២០១៤។ ក្នុងការដឹកនាំប្រទេស លោកទទួលបានការសាទរខ្លាំងពីយុទ្ធនាការបាញ់កម្ទេចទូកនេសាទខុសច្បាប់បរទេសមិនរើសមុខ ដែលចូលនេសាទក្នុងដែនទឹករបស់ខ្លួន៕