Porsche ជឿជាក់ថាខ្លួននឹងឈានមុខគេក្នុងវិស័យរថយន្តអគ្គិសនី

2017-11-10 13:06:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Porsche ស្ថិតក្រោមដំបូលរបស់មេ Volkswagen AG ជឿជាក់ថាខ្លួននឹងវ៉ាដាច់ក្រុមហ៊ុនរថយន្តដទៃផ្សេងទៀតក្នុងវិស័យផលិតរថយន្តអគ្គិសនីដែលនឹងពុះកញ្ជ្រោលខ្លាំងក្នុងរយៈពេលប៉ុន្មានឆ្នាំដ៏ខ្លីខាងមុខ ។

ក្រុមហ៊ុនអាល្លឺម៉ង់ Porsche ត្រូវគេមើលឃើញថាបានផ្លាស់ប្តូរយ៉ាងធំធេងក្នុងការផលិតរថយន្តប្រភេទ sedan, suv និងប្រភេទស្ព័រជាច្រើនទសវត្សរ៍មកនេះហើយខ្លួនត្រូវប្រឈមនឹងការប្រកួតប្រជែងថ្មីមួយទៀតគឺ “ស័យកាលរថយន្តអគ្គិសនី” ។ លោក Lutz Meschke ប្រធានហិរញ្ញវត្ថុរបស់ Porsche និយាយថា ក្រុមហ៊ុនមិនបារម្ភចំពោះការបោះជំហានចូលវិស័យផលិតរថយន្តអគ្គិសនីនោះទេព្រោះ Porsche បានត្រៀមខ្លួនរួចជាស្រេចហើយ ។

ជាក់ស្តែងដូចជាការដំឡើងស្ថានីយបញ្ចូលអាគុយលឿនបំផុត ២៥០ គីឡូវ៉ាត់ដើមឆ្នាំ២០១៧នេះនៅក្រុងប៊ែរឡាំងប្រទេសអាល្លឺម៉ង់ ដែលអាចសាកបាន ៨០%ក្នុងរយៈពេល ១៥ នាទី ។ បច្ចុប្នន្ន Porsche ជាក្រុមហ៊ុនម៉ាកល្បីមួយក្នុងចំណោមក្រុមហ៊ុនល្បីៗផ្សេងទៀតបានរក្សាប្រតិបត្តិការប្រាក់ចំណេញប្រមាណ ១៥% ពីការលក់រថយន្តហើយការវិនិយោគសម្រាប់វិស័យរថយន្តអគ្គិសនី បច្ចេកវិទ្យាពាក់ព័ន្ធអគ្គិសនីមានតម្លៃថ្លៃៗទៀតផង ។

លោក Meschke និយាយថា Porsche ត្រូវតែចំណាយលុយបន្ថែមទៀតដើម្បីអភិវឌ្ឍការបើកបរអគ្គិសនីជាមួយនឹងម៉ាស៊ីនចំហេះ ពោលនៅពេលទីផ្សាររថយន្តអគ្គិសនីផ្ទុះឡើងពេលនោះ Porsche នឹងមានចំណែកទីផ្សារដើម្បីឈរជើងតែម្តង ។

គួរបញ្ជាក់ថា រថយន្តអគ្គិសនីអនាគតរបស់ Porsche ចាប់ផ្តើមផលិតជាមួយនឹងរថយន្ត Panamera 4 E-Hybrid ២០១៨ ។ ដោយឡែកសង្វាក់ផលិតកម្ម Mission E ដែលជាគម្រោងផលិតរថយន្តអគ្គិសនីពេញលេញអាចធ្វើដំណើរជាង ៤០០ គីឡូម៉ែត្រប្រើប្រាស់បច្ចេកវិទ្យាបញ្ចូលភ្លើងលឿនបំផុតនឹងចូលទីផ្សារ ២០១៩ ៕

ប្រភព៖ motorauthority. ប្រែសម្រួល៖ សិរីបុទ្រ