អ្នកឧស្សាហ៍ជប់ខ្យល់ ប្រយ័ត្នស៊យធំ ដូចបុរសម្នាក់នេះ

2017-11-11 04:12:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជប់ខ្យល់ ជាវិធីព្យាបាលបែបបុរាណប្រើប្រាស់សម្រាប់កាត់បន្ថយអាការៈឈឺចុកចាប់ ចុករោយ ឈឺក្បាល ឬក្ដៅខ្លួនដើម្បីពង្រឹងចរន្តសរសៃឈាម។

ទោះបីសព្វថ្ងៃ មានការពេញនិយមនៅតាមប្រទេសជាច្រើននៅតំបន់អាស៊ីក្នុងការព្យាបាលអាការៈច្រើនមុខក៏ដោយ ក៏ខាងវិទ្យាសាស្ត្ររកឃើញថា វាមានគ្រោះថ្នាក់ដល់សុខភាពដែរ។ តួយ៉ាងដូចបុរសខាងក្រោមនេះ គាត់បានជប់ខ្យល់ ដើម្បីព្យាបាលរោគរលាកទងសួត បែរជាជួបគ្រោះថ្នាក់លើសដើម។

បុរសវ័យកណ្ដាលជនជាតិចិនម្នាក់ឈ្មោះ Goh រស់ទៅក្រុង Wuhan តែងតែក្អកឥតឈប់ពេលអាកាសធាតុចុះត្រជាក់ម្ដងៗ ព្រោះគាត់មានជំងឺរលាកទងសួតរ៉ាំរ៉ៃ។ ដើម្បីព្យាបាលឲ្យបាត់ក្អក គាត់បានឲ្យគេជប់ខ្យល់ជាញឹកញាប់ ព្រោះជឿជាក់ថា អាចបំបាត់អាការៈត្រជាក់ក្នុងរាងកាយ។ គាត់បានប្រើវិធីនេះយូរដែរហើយ ប៉ុន្តែទើបថ្មីៗនេះ គាត់ចាប់ផ្ដើមមានអារម្មណ៍តប់ប្រមល់ និងចុកទ្រូង ក្រោយជប់ខ្យល់ម្ដងៗ។

កម្លាំងចាប់ផ្ដើមខ្សោយទៅៗ មុខមាត់ក៏ស្លេកស្លាំងខុសធម្មតាដែរ។ ដោយមានការព្រួយបារម្ភ គ្រួសាររបស់គាត់ បានប្រញាប់បញ្ជូនគាត់ទៅកាន់មន្ទីរពេទ្យ និងធ្វើឲ្យគ្រូពេទ្យជាច្រើនភ្ញាក់ផ្អើលនូវលទ្ធផលដែលបានរកឃើញ។ បំពង់ខ្យល់ក្នុងសួតមានភាពមិនប្រក្រតី ឯសួតខាងស្ដាំបានរួមតូចរហូតដល់ ៩០% បន្ទាប់មក ក្រុមគ្រូពេទ្យបានប្រញាប់វះកាត់ប៉ះប៉ូវប្រហោងក្នុងសួតភ្លាមៗតែម្ដង។

យោងទៅតាមគ្រូពេទ្យទទួលបន្ទុកអះអាងថា អ្នកជំងឺបានកើតអាការៈរលាកទងសួតជាយូរហើយដែលធ្វើឲ្យសួតកាន់តែខ្សោយទៅៗ។ លោកជឿថា ការជ្រើសរើសវិធីជប់ខ្យល់នេះ បានប៉ះពាល់ដល់សម្ពាធឈាមក្នុងប្រហោងទ្រូង និងប៉ះពាល់ដល់បំពង់ខ្យល់ទៅកាន់សួត។

លោកវេជ្ជបណ្ឌិតខាងលើ ក៏ផ្ដល់ដំបូន្មានឲ្យគ្រប់គ្នាគួរជៀសវាងជប់ខ្យល់ ព្រោះវាផ្ដល់ផលប៉ះពាល់ដល់សុខភាពសួត។ ចំណែក ស្ត្រីមានផ្ទៃពោះ អ្នកមករដូវ ឬអ្នកមានបញ្ហាឈាមកក គួរជៀសឲ្យឆ្ងាយពីការជប់ខ្យល់នេះឲ្យបានផងដែរ៕