Dortmund រកមុខមេ Fan Club នៅកម្ពុជា ដើម្បីជួយឧបត្ថម្ភនិងហៅទៅលេងអាល្លឺម៉ង់

2017-11-13 01:48:33
ចំនួនមតិ 0 | ចំនួនចែករំលែក 0

ចន្លោះមិនឃើញ

បាល់ទាត់ល្បីក្នុងពិភពលោក Burussia Dortmund កំពុងស្វែងរក Fan Club នៅកម្ពុជា ក្នុងន័យជួយជ្រោមជ្រែងពួកគេបន្ដធ្វើសកម្មភាព និងមានឱកាសហៅទៅទស្សនាការប្រកួតបាល់ទាត់ផ្ទាល់នៅទឹកដីអាល្លឺម៉ង់ផងដែរ។

លោកSuresh Letchmanan ប្រធានផ្នែកទំនាក់ទំនងនៅតំបន់អាស៊ីប៉ាស៊ីហ្វិកបានប្រាប់ Sabay ក្នុងកិច្ចសម្ភាសន៍កាលពីថ្ងៃសុក្រកន្លងទៅថាលោកពិតជារីករាយដែលដឹងថានៅកម្ពុជាមានអ្នកគាំទ្រក្លឹប Dortmund ច្រើន។ ប្រសិនបើលោកបានស្គាល់ មេ Fan Club នៅកម្ពុជា នោះវាជាឱកាសល្អមួយសម្រាប់ធ្វើការជាមួយគ្នាក្នុងន័យបង្កើតកម្មវិធីផ្សេងៗឱ្យច្រើន ធ្វើឱ្យគេស្គាល់ក្លឹបនៅអាល្លឺម៉ង់មួយនេះកាន់តែខ្លាំង។

លោក Suresh បន្ថែមថាប្រសិនបើនៅកម្ពុជាមិនទាន់មានអ្នកចេញមុខ ឬមិនទាន់បង្កើតជា Fan Club បានទេ នោះលោកសង្ឃឹមថានឹងមានអ្នកគាំទ្ររួបរួមគ្នា ដើម្បីបង្កើតជាក្រុមឱ្យបានលឿនបំផុត។ ការបង្កើតជាអ្នកគាំទ្រនេះ គឺពិតជាសំខាន់ ក្នុងចែករំលែកព័ត៌មានពិតៗ ដល់អ្នកគាំទ្រដទៃ និងទាក់ទាញអ្នកគាំទ្រកាន់តែច្រើនថែមទៀត។

ក្លឹប Burussia Dortmund បានចាប់ដៃគូសហការជាមួយស្រាបៀរអង្គរ របស់កម្ពុជា ហើយការសហការគ្នានេះដែរ នឹងផ្ដល់ឱកាសជាច្រើនដល់វិស័យបាល់ទាត់ជាតិ ព្រោះថានៅថ្ងៃមុខ ពួកគេអាចនឹងហៅគ្រូបង្វឹកឬកីឡាករណាម្នាក់មកកម្ពុជាផងដែរ៕

អត្ថបទ៖ មុន្នីរម្យ