​​លោក​​ Ming Chi Kuo ​អ្នក​វិភាគ​ប្រចាំ​ក្រុមហ៊ុន​ KGI ​បាន​ធ្វើ​ការ​ប៉ាន់​ស្មាន​ជា​លើក​ដំបូង​អំពី​ iPhone ចេញ​ឆ្នាំ​ ២០១៨ ដោយ​អាច​នឹង​មាន​បី​ម៉ូដែល​​រួម​មាន​ប្រភេទ​ទំហំ​អេក្រង់​ ៥,៨ អ៊ីញ​ និង ៦,៥ អ៊ីញ​ប្រើ​អេក្រង់​ OLED និង​ ប្រភេទ​អេក្រង់​ ៦,១ អ៊ីញ​ប្រើ​អេក្រង់​ LCD។

អ្នក​វិភាគ​ល្បី​ឈ្មោះ​ខាង​លើ​ជឿ​ថា​ iPhone ទាំង​បី​ម៉ូដែល​នឹង​មាន​ការ​រចនា​ផ្ទៃ​អេក្រង់​​មាន​​ដុះ​ស្នែង​ និង​​មាន​ប្រព័ន្ធ​កាមេរ៉ា​ TrueDepth ដូច​ជា​ iPhone X ដែរ។ មិន​តែ​ប៉ុណ្ណោះ​ក៏​រំពឹង​ថា​ ម៉ូដែល​ ៥,៨ អ៊ីញ​មាន​​ដង់ស៊ីតេ​រូបភាព​ ៤៥៨ ភីកសែល/អ៊ីញ, ម៉ូដែល​ ៦,៥ អ៊ីញ​មាន​ដង់ស៊ីតេ​ពី​ ៤៨០ ទៅ ៥០០ ភីកសែល/អ៊ីញ និង​ម៉ូដែល​ ៦,១ អ៊ីញ​មាន​ដង់ស៊ីតេ​ចន្លោះ​ពី​ ៣២០ ទៅ ៣៣០ ភីកសែល​/អ៊ីញ។

​​​​លោក​ Kuo ​បាន​​សង្កត់​ធ្ងន់​ថា​ iPhone ​ប្រើ​អេក្រង់​ LCD ទំហំ​ ៦,‌១ អ៊ីញ​​នឹង​​ផលិត​សម្រាប់​ទីផ្សារ​ទូរសព្ទ​​​លំដាប់​ទាប​ និង​លំដាប់​កណ្ដាល​ ដោយ​មាន​តម្លៃ​ប៉ាន់​ស្មាន​​ពី​ ៦៤៩ ​ដុល្លារ​ ទៅ ៧៤៩ ដុល្លារ នៅ​សហរដ្ឋអាមេរិក។ អ្នក​វិភាគ​រូប​នេះ​មិន​បាន​និយាយ​អំពី​តម្លៃ​ iPhone អេក្រង់​ ៥,៨ អ៊ីញ​ និង ៦,៥ អ៊ីញ​ឡើយ។​

ប្រសិន​បើ​​ការ​លើក​ឡើង​ខាង​លើ​ត្រឹម​ត្រូវ​មែន​ នោះ​ iPhone ចេញ​ឆ្នាំ​ ២០១៨ នឹង​មាន​ជា​ iPhone X អេក្រង់​ ៥,៨ អ៊ីញ​ជំនាន់​ទី​ពីរ, iPhone អេក្រង់​ទំហំ​ ៦,៥ អ៊ីញ​ដែល​អាច​ជា​ iPhone X Plus រួម​ជា​មួយ​ iPhone លំដាប់​កណ្ដាល​​អេក្រង់​ ៦,១ អ៊ីញ​ ដែល​មាន​ចំណុច​ពិសេសៗ​ដូច​ iPhone X តែ​មាន​តម្លៃ​ធូរ​ថ្លៃ​ជាង។

ត្បិត​ថា​​កន្លង​មក​ការ​ប៉ាន់​ស្មាន​របស់​លោក​ Kuo មិន​ត្រូវ​ ១០០% ប៉ុន្តែ​គាត់​ឧស្សាហ៍​ទទួល​បាន​ដំណឹង​​ច្បាស់​ការ​​ពី​ប្រភព​ដែល​ចេញ​ពី​ខ្សែ​សង្វាក់​ផលិតកម្ម​របស់​ Apple ផ្ទាល់។ មុន​ការ​ប្រកាស​ចេញ​ iPhone X លោក​ Kuo បាន​រៀប​រាប់​យ៉ាង​លម្អិត​ និង​ត្រូវ​ចំៗ​អំពី​អេក្រង់​ទំហំ​ ៥,៨ អ៊ីញ, រចនាបថ​ពី​កញ្ចក់​លាយ​នឹង​លោហៈ, មិន​មាន​ Touch ID, កាមេរ៉ា​ស្កេន​មុខ​ 3D និង​ចំណុច​ពិសេស​ដទៃ​ទៀត៕ ​​​​​

ប្រភព៖ macrumors   ប្រែ​សម្រួល៖ សុខហេង