កំពុងតែទទួលបានការគាំទ្រ ស្រីស្អាត នូណា បែរជាមិនទទួលថតរឿងថ្មី

2017-11-15 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារសម្រស់ និងទេពកោសល្យ ពន្លកថ្មីវ័យក្មេងក្នុងវិស័យសម្ដែង នូណា ទទួលបានការគាំទ្រ និងចាប់អារម្មណ៍យ៉ាងខ្លាំងពីមហាជនជាមួយរឿងភាគដំបូងរបស់ខ្លួន។ មិនត្រឹមតែប៉ុណ្ណោះ ផលិតករភាពយន្តជាច្រើនបានទាក់ទងឲ្យនាងចូលរួមសម្ដែងក្នុងភាពយន្តថ្មីៗជាច្រើនទៀត។

នូណា ត្រូវបានគេស្គាល់ថា ជាតួអង្គ កញ្ចនា ក្នុងរឿងភាគ "សិសិររដូវក្នុងបេះដូង"។ ជាមួយតួអង្គនេះ នាងបានធ្វើឲ្យបណ្ដាអ្នកគាំទ្រមានការភ្ញាក់ផ្អើល និងសរសើរមិនដាច់មាត់ ទៅលើរូបសម្រស់ និងទេពកោសល្យសម្ដែងជាតួកាចឆ្នាសឆ្នើមបានយ៉ាងល្អ ទាំងខ្លួននៅវ័យក្មេងដូចនេះ។

និយាយទាំងញញឹម ស្រីស្អាតខាងលើ បានប្រាប់ Sabay ថា បន្ទាប់ពីរឿងភាគនេះចេញផ្សាយ មានផលិតករជាច្រើនទាក់ទងនាងសម្ដែងជាហែហូរតែនាងបដិសេធ។ "មានក្រុមហ៊ុនគេទាក់ទងឲ្យថតរឿងភាគ២ ៣រឿងដែរបង តែខ្ញុំមិនហ៊ានទទួល ព្រោះខ្លាចរវល់ហើយធ្វើឲ្យគេអត់បាន តែសម្រាប់ការសម្ដែងស្ប៉ត និងកម្មវិធីនានាខ្ញុំទទួល"។ យុវតីថ្ពាល់ខួចទាំងទ្វេថ្លែង។

ម្យ៉ាងទៀតពន្លកថ្មីរូបនេះកំពុងស្ថិតនៅការវ័យសិក្សា ដូច្នេះទើបនាងមិនសូវសម្រេចចុះកុងត្រា និងប្រឡូកខ្លាំងលើវិស័យសម្ដែងភាពយន្តនេះឡើយ។ នូណា បញ្ជាក់ថា បវេសនកាលឆ្នាំសិក្សាថ្មីនេះ នាងរៀនថ្នាក់ទី១១ ដែលជាថ្នាក់សិក្សាត្រៀមប្រឡងយកសញ្ញាប័ត្រទុតិយភូមិនៅឆ្នាំក្រោយ។

យុវតីវ័យ១៦ឆ្នាំ នូណា មានឈ្មោះពិតថា ហួ លីហេង។ នាងប្រឡូកសិល្បៈបានជិត១ឆ្នាំហើយ តាមរយៈគ្រូបង្ហាត់ដើរម៉ូដ និងមានការងារស្នូលជាតារាម៉ូដែលក្នុងក្រុម P& E។ សម្រាប់ភាពយន្ត នាងបង្ហាញមុខដំបូងក្នុងរឿងអប់រំខ្លីមួយគឺ " ទឹកភ្នែកក្មេងឈាមរាវ" និងបានសម្ដែងក្នុងរឿងភាគខ្មែរខ្នាតធំ "សិសិររដូវក្នុងបេះដូង" ដែលទើបតែដាក់បញ្ចាំងជាផ្លូវការនៅពេលថ្មីៗនេះ៕

អត្ថបទ៖ សុខណា