សង្គ្រាម​លើ​វាល​ស្មៅ​នៅ​ទីក្រុង​ម៉ាឌ្រីដ​នឹង​កើត​ឡើង​សារ​ជា​ថ្មី​នៅ​យប់​នេះ​ ជា​ការ​ប៉ះ​គ្នា​រវាង​ Atletico Madrid និង​ Real Madrid។

នេះ​ជា​គឺជា​ការ​ប៉ះ​គ្នា​លើក​ដំបូង​របស់​​ក្រុម​អ្នក​ជិត​ខាង​ទាំង​ពីរ​​នៅ​​ទឹកដី Wanda Metropolitano របស់​ Atletico ចាប់​តាំង​ពី​ពួកគេ​ចាកចោល​កីឡដ្ឋាន Vicente Calderón។ Real បច្ចុប្បន្ន​ឈរ​លេខ៣​ក្នុង​តារាង​ស្មើ​ពិន្ទុ​គ្នា​ជាមួយ​លេខ​៤ Atl Madrid។ ក្រុម​ទាំង​សង​ខាង​ត្រូវ​ការ​ឈ្នះ​ដាច់​ខាត​ដូចគ្នា​ដើម្បី​តាម​ពិន្ទុ​ Barcalona ដែល​ដាច់​៨​ពិន្ទុ​នៅ​ទី​កំពូល។ ចាំ​មើល​តើ​ក្រុម​មួយ​ណា​នឹង​ឈ្នះ​​ប្រកួត​នៅ​ម៉ោង​២:៤៥​នាទី​រំលង​អាធ្រាត្រ​​នេះ?

ជើង​កីឡាករ៖

Real Madrid នៅ​តែ​អវត្តមាន​ Gareth Bale ខណៈ Keylor Navas ត្រឡប់​មក​ហ្វឹកហាត់​វិញ​ តែ​មិន​ទាន់​អាច​ចូល​លេង​បានវិញ​នៅ​ឡើយ​ដូច្នេះ​ជម្រើស​១១​នាក់​អាច​ជា៖ Kiko Casilla, Marcelo, Varane, Ramos, Carvajal, Kross, Casemiro, Modric, Isco, Ronaldo និង​ Benzema។

Atletico Madrid មាន​បញ្ហា​តែ​ Filipe Luis មួយ​ប៉ុណ្ណោះ​ដែល​រង​របួស​សរសៃ​ពួរ​ដូច្នេះ​ជម្រើស​១១​នាក់​ដំបូង​អាច​ជា៖ Oblak, Lucas, Savic, Godin, Juanfran; Saul, Gabi, Thomas, Augusto; Griezmann និង​Correa។

ស្ថិតិ​មួយ​ចំនួន៖

• ជំនួប​លើក​នេះ​គឺ​ជា​ការ​ប៉ះ​គ្នា​លើក​ទី​១៦១​នៅ​ La Liga រវាង​ក្រុម​ទាំង​ពីរ​ក្នុង​នោះ Real Madrid ឈ្នះ​លើស​ពី​ពាក់​កណ្ដាល​ (៨៦​ដង)។

• Atletico ចាញ់​តែ​ម្ដង​ប៉ុណ្ណោះ​ក្នុង​ការ​ប៉ះ​គ្នា​៨​លើក​ចុងក្រោយ​នៅ​លីគ​ទល់នឹង​ Real Madrid ដោយ​ឈ្នះ​ ៤​ដង, ស្មើ​៣ ហើយ​ការ​ចាញ់​ម្ដង​នោះ​គឺ​ក្នុង​លទ្ធផល​៣-០ កាល​ពី​រដូវ​កាល​មុន​នៅ​ទឹកដី Vicente Calderon។

• Cristiano Ronaldo ទាត់​ចូល​៦​គ្រាប់​ក្នុង​ការ​លេង​ទល់​នឹង​ Atletico ៤​លើក​ចុង​ក្រោយ​គិត​លើ​គ្រប់​កម្មវិធី។

• Zinedine Zidane ដឹកនាំ​ Realចាញ់​ Atletico ២​លើក​ជា​កំណត់ត្រា​ចាញ់​ច្រើន​បំផុត​បើ​ធៀប​នឹង​ការ​ដឹកនាំ​របស់​លោក​ទល់នឹង​ក្រុម​ដទៃ៕