តារាស្រី ៦រូប រស់រានមានជីវិត ពីជំងឺមហារីកសុដន់ដ៏កាចសាហាវ

2017-11-19 07:41:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ជំងឺមហារីកសុដន់ ជាជំងឺដ៏គួរឲ្យភ័យខ្លាច និងបានគំរាមកំហែងជីវិតមនុស្សស្រីជាច្រើន លើពិភពលោក។ ក្នុងចំណោមស្ត្រីទាំងអស់ក្នុងសកលលោក ក៏មានតារាស្រីល្បីឈ្មោះមួយចំនួន បានជួបប្រទះជំងឺដ៏កាចសាហាវនេះ។

ទោះបីពួកគេត្រូវប្រឈមមុខនូវការគំរាមកំហែង ស្ទើរប៉ះពាល់ដល់ជីវិតយ៉ាងណាក្ដី ប៉ុន្តែយ៉ាងណាក៏ដោយពួកគេបានទទួលមកវិញនូវ ក្ដីស្រឡាញ់ ការយកចិត្តទុកដាក់ដោយស្មោះពីមនុស្សជាទីស្រឡាញ់នៅជុំវិញខ្លួនទាំងអស់របស់ពួកគេ។

ទៅទស្សនាទាំងអស់គ្នា តើតារាស្រីដែលរស់រួចផុតពីការស្លាប់ ដោយសារជំងឺមហារីកសុដន់៖

១. តារាហូលីវូដ Angelina Jolie

តារាសម្ដែងស្រីរូបនេះ មានការប្រឈមខ្លាំងនឹងហានិភ័យ ស្ទើរមានគ្រោះថ្នាក់ដល់ជីវិត ដោយសារជំងឺមហារីកសុដន់។ នាងត្រូវទទួលការវះកាត់ដល់ទៅ ២ដងក្នុងឆ្នាំ ២០១៣ បន្ទាប់ពីក្រុមវេជ្ជបណ្ឌិត រកឃើញថា Jolie មានអត្រាប្រឈមនឹងជំងឺនេះដល់ទៅ ៨៧ភាគរយ។ ក្រោយពីទទួលការព្យាបាល និងវះកាត់រួចមក តួលេខនៃគ្រោះថ្នាក់នោះ ក៏បានថយចុះ ៥ភាគរយវិញ។

២. តារាសម្ដែង Koh Chieng Mun

ក្នុងឆ្នាំ ២០០៥ តារាស្រីជើងចាស់រូបនេះ មានអារម្មណ៍ថា មានដុំសាច់មិនធម្មតា នៅក្នុងរាងកាយរបស់ខ្លួន ជាហេតុធ្វើឲ្យ លោកស្រីទៅពិនិត្យឲ្យបានច្បាស់។ លទ្ធផលចេញពីការពិនិត្យនោះគឺ អ្នកស្រីមានជំងឺមហារីកសុដន់ ដំណាក់កាលទី ១។ បន្ទាប់ពីមានការព្យាបាលត្រឹមត្រូវ និងយកចិត្តទុកដាក់ពីខាងគ្រូពេទ្យមក ទើបអ្នកស្រីបានជាសះស្បើយវិញ។

៣. តារាសម្ដែង Liza Wang

តារាស្រីរូបនេះ រកឃើញថាខ្លួនមានជំងឺមហារីកសុដន់ក្នុងឆ្នាំ ២០០២ បន្ទាប់ពីមានការពិនិត្យតាមដានយ៉ាងយកចិត្កទុកដាក់ពីគ្រូពេទ្យ។ មួយវិញទៀត ក្រោយពីការណែនាំរបស់គ្រូពេទ្យ ពីជំងឺដ៏កាចសាហាវនេះ អ្នកស្រីក៏បានប្រញាប់វះកាត់ជាបន្ទាន់ មុនមេរោគរីកសុសសាយបន្ត។

សំណាងល្អ ដោយសារព្យាបាលទាន់ពេលវេលា តារាស្រីរូបនេះក៏បានជាសះស្បើយឡើងវិញ ហើយបច្ចុប្បន្ន លោកស្រីកំពុងបម្រើការងារក្នុងសមាគម Hong Kong Anti-Cancer Society ដើម្បីចែករំលែកបទពិសោធន៍ និងការយល់ដឹងទាក់ទងនឹងជំងឺដ៏កាចសាហាវនេះទៅកាន់អ្នកជំងឺមហារីកសុដន ដទៃទៀត។

៤. តារាសម្ដែង Pan Ling Ling

តារាស្រីវ័យ ៤៧ឆ្នាំរូបនេះ ក៏ជាតារាស្រីដែលបានជាសះស្បើយពីជំងឺមហារីកដែរ។ រម្លឹកទៅអំឡុងពេលដែលស្ថិតក្នុងភាពភ័យខ្លាច ស្ទើរនឹងបាត់បង់ជីវិត នាងបាននិយាយថា ខ្លួនបែរជាមានអារម្មណ៍រំភើបទៅវិញ ជាពិសេសឃើញពីភាពខុសគ្នារបស់គ្រួសារ ទាំងប្ដី និងកូនទាំង២។ ពួកគេតែងផ្ដល់កម្លាំងចិត្ត និងយកចិត្តទុកដាក់ ព្រមជាមួយក្ដីស្រឡាញ់គ្រប់ពេលវេលាឥតលក្ខខ័ណ្ឌដល់នាង។ មកទល់ពេលនេះ នាងមានភាពធូរស្រាលជាងមុន ហើយក៏ព្យាយាមថែទាំសុខភាពបានយ៉ាងល្អបំផុត។

៥. អតីតតារាម៉ូដែល Lum May Yee

កាលពី ២ឆ្នាំមុន May Yee បានរកឃើញថាខ្លួនមានដុំសាច់ក្នុងទ្រូង។ នៅពេលពិនិត្យ ឃើញថានាងស្ថិតក្នុងដំណាក់កាលទី ២ នៃជំងឺមហារីក។ ប៉ុន្តែជាសំណាងល្អ ដោយសារមានការយកចិត្តទុកដាក់ពីក្រុមគ្រូពេទ្យ តារាស្រីវ័យ ៤៤ឆ្នាំរូបនេះ ក៏បានធូរស្រាលជាងមុន។

៦. តារាសម្ដែង Mandy Lam

ថ្ងៃមួយ ក្នុងឆ្នាំ ២០១០ តារាស្រីរូបនេះទទួលអារម្មណ៍ចម្លែកថាមានដុំសាច់ក្នុងទ្រូង ហើយភ្លាមៗនាងក៏បានប្រញាប់ប្រញាល់ទៅមន្ទីរពេទ្យឲ្យ ពេទ្យពិនិត្យ។ ជាលទ្ធផល ទើបដឹងថានាងមានជំងឺមហារីកសុដន់ដំណាក់កាលទី ២។ ពេលនោះ នាងប្រឈមនឹងការជ្រុះសក់មិនធម្មតា រីឯក្រចកដៃរបស់នាងវិញ ប្រែទៅជាពណ៌ប្រផេះទៀតផង។ កន្លងផុតអស់រយៈពេល ៧ឆ្នាំ ពេលនេះសុខភាពនាងបានគ្រាន់បើហើយ ព្រមទាំងបានរៀបការយ៉ាងមានក្ដីសុខជាមួយបុរសដ៏ល្អម្នាក់។ ជាក់ស្ដែង នាងនិងស្វាមីបានព្រមព្រៀងគ្នា ថាមិនបង្ខំរឿងយកកូនពេកទេ សំខាន់ធ្វើយ៉ាងណាឲ្យនាងមានសុខភាពល្អសិន៕

ប្រភព៖ entertainment.toggle ប្រែសម្រួល៖ យី សុធារី