ដឹងអត់! កាមេរ៉ា Sony A9 ផលិតនៅជិតកម្ពុជា?

2017-11-21 02:25:27
ចំនួនមតិ 0 | ចំនួនចែករំលែក 0

ចន្លោះមិនឃើញ

រោងចក្រផលិតកាមេរ៉ា និង Lens របស់ក្រុមហ៊ុន Sony គឺបានបោះទីតាំងក្នុងខេត្តច័ន្ទបុរី ប្រទេសថៃ ដែលចំណាយពេលប្រហែលជា ៩០ នាទីពីទីក្រុងបាងកក ហើយបច្ចុប្បន្នជារោងចក្រផលិតសំខាន់មួយសម្រាប់កាមេរ៉ាម៉ូដែល Alpha ដូចជា Alpha A9 និង Alpha A7R III។ វាក៏ផលិតនូវភាគច្រើននៃ Lens របស់ Sony ដែរ រួមទាំង Premium G Master។

ការផលិតក្នុងប្រទេសថៃ

ពេលមនុស្សភាគច្រើនទិញកាមេរ៉ា ឬឧបករណ៍ទាក់ទងកម្រិតខ្ពស់ ពួកគេរំពឹងពាក្យមួយ Made in Japan (ផលិតក្នុងប្រទេសជប៉ុន)។ ខណៈពេលក្រុមហ៊ុន Sony បានអនុវត្តរាល់ការរចនា និងបង្កើតនូវកាមេរ៉ា ក៏ដូចជាផលិត Sensor ក្នុងប្រទេសជប៉ុន ក្រុមហ៊ុនជឿថាកម្លាំងពលកម្មក្នុងប្រទេសថៃមានបទពិសោធន៍ និងជំនាញគ្រប់គ្រាន់ក្នុងការផលិតនូវ Hardware រូបភាពកម្រិតខ្ពស់បាន។

ក្រុមហ៊ុន Sony បានបង្កើតរោងចក្រដំបូងក្នុងប្រទេសថៃ នៅឆ្នាំ ២០០៣ ក្នុងការដំឡើងរថយន្ត ឧបករណ៍តន្ត្រី និងទូរសព្ទ។ នៅឆ្នាំ ២០០៩ Sony បានចាប់ផ្ដើមផលិតនូវកាមេរ៉ាកម្រិតល្មម និង Zoom lens 18-55mm ប្រើជាមួយនឹង Sony DSLRs ភាគច្រើន។ ក្រោយរងគ្រោះនឹងទឹកជំនន់ក្នុងឆ្នាំ ២០១១ ក្រុមហ៊ុន Sony Technology Co Ltd បានរៀបចំរោងចក្រថ្មី ពីរ នៅខេត្តច័ន្ទបុរី ក្នុងការជៀសពីទឹកជំនន់។

ក្រៅពីក្រុមហ៊ុន Sony មានក្រុមហ៊ុនជប៉ុនប្រហែលជា ៤០០ មានការចាប់អារម្មណ៍នឹងតំបន់ភាគអាគ្នេយ៍នៃប្រទេសថៃ។ ខេត្តច័ន្ទបុរី ជាទីតាំងដ៏ល្អមានខ្យល់អាកាសល្អ និងផ្លូវតភ្ជាប់នឹងសមុទ្រ ដែលអាចនាំចេញ និងនាំចូលផលិតផលបានរហ័ស។ ម្យ៉ាងទៀត តម្លៃពលកម្មតិចជាងក្នុងប្រទេសជប៉ុន។

ការគ្រប់គ្រងគុណភាព

ក្នុងឆ្នាំ ២០១៣ រោងចក្របានចាប់ផ្ដើមផលិតនូវកាមេរ៉ាប្រភេទ Full-frame ដែលមាន Alpha A7R និង A7 ដែលមានការជជែកដេញដោលច្រើន ដោយសារយន្តការ និងសមាភាគមានភាពស្មុគស្មាញច្រើន, ការគ្រប់គ្រងធូលីមានភាពតឹងរ៉ឹង និងសម្ភារៈមានកម្រិតខ្ពស់ខ្លាំង ដែលមានប្រើក្នុងការផលិត ដោយតម្រូវនូវហេដ្ឋារចនាសម្ព័ន្ធល្អច្បាស់លាស់។ ដោយធ្វើការជាមួយនឹងក្រុមរចនា Tokyo HQ របស់ Sony ក្រុមនៅច័ន្ទបុរីបានបង្កើតនូវប្រព័ន្ធផលិតកម្រិតខ្ពស់មួយ។ ដោយប្រកាន់ភ្ជាប់នូវទស្សនវិជ្ជារបស់ជប៉ុនគឺបន្តកែលំអពីតូចៗទៅ បានធ្វើឲ្យរោងចក្រនៅច័ន្ទបុរីរបស់ Sony អាចផលិតបាននូវកាមេរ៉ា និង Lens កម្រិតខ្ពស់ភាគច្រើនមួយចំនួនប្រើលើទីផ្សារបច្ចុប្បន្ន៕