ដំណឹងល្អ! មិនយូរប៉ុន្មាន ប្រជាពលរដ្ឋអាចធ្វើដំណើរតាមរថភ្លើងទៅលេងសៀមរាបបាន

2017-11-21 07:27:36
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីចំណាយពេលសិក្សាបឋមរយៈពេល៦ខែ ទៅលើការសាងសង់ផ្លូវរថភ្លើងពីភ្នំពេញ ទៅសៀមរាប-ស៊ីសុផុន ដោយក្រុមហ៊ុន CRCC 17th ឆាប់ៗខាងមុខកម្ពុជានឹងមានផ្លូវរថភ្លើងថ្មីមួយទៀតហើយ។ នេះបើតាមទំព័រហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន។

សូមជម្រាបជូនថា នៅថ្ងៃទី២១ ខែវិច្ឆិកា ឆ្នាំ២០១៧ ឯកឧត្ដមទេសរដ្ឋមន្ត្រី ស៊ុន ចាន់ថុល បានជួបពិភាក្សាជាមួយគណៈប្រតិភូមួយក្រុមរបស់ក្រុមហ៊ុន CRCC 17th ដែលដឹកនាំដោយលោក Lu Peng ប្រធានក្រុមប្រឹក្សានៃក្រុមហ៊ុននេះ។ ក្នុងនោះក៏មានការចូលរួមពីអ្នកឧកញ៉ា គិត ម៉េង ប្រធានក្រុមហ៊ុនRoyal Group និងជាប្រធានសភាពាណិជ្ជកម្មកម្ពុជា។ ជំនួបពិសេស គឺដើម្បីធ្វើការសិក្សាឲ្យកាន់តែច្បាស់អំពីគម្រោងសាងសង់ផ្លូវដែកថ្មី ពីភ្នំពេញទៅសៀមរាប-ស៊ីសុផុន។

ឯកឧត្ដមទេសរដ្ឋមន្ត្រី ស៊ុន ចាន់ថុល បានលើកឡើងថា គម្រោងនេះមានសារសំខាន់ខ្លាំង សំដៅ បង្កភាពងាយស្រួលដល់ការដឹកជញ្ជូននិងការតភ្ជាប់ និងជំរុញការអភិវឌ្ឍវិស័យផ្លូវដែកនៅកម្ពុជា។

យ៉ាងណាក្ដី ចំពោះទំហំថវិការដែលនឹងគ្រោងចំណាយ ទៅលើគម្រោងមួយនេះនៅមិនទាន់បានបញ្ជាក់នៅឡើយទេ។ ចំណែកឯថ្ងៃបើកការដ្ឋាន កំពុងស្ថិតក្នុងដំណាក់កាលសិក្សានៅឡើយ៕