របរដេរកាបូបពីពោះវៀនរថយន្ត ជួយឲ្យបុរសពិការម្នាក់ មានសង្ឃឹមក្នុងជីវិត
- 2017-11-21 09:28:28
- ចំនួនមតិ 0 | ចំនួនចែករំលែក 0
របរដេរកាបូបពីពោះវៀនរថយន្ត ជួយឲ្យបុរសពិការម្នាក់ មានសង្ឃឹមក្នុងជីវិត
ចន្លោះមិនឃើញ
ជាបុរសពោះម៉ាយ និងពិការជើងម្ខាងផង លោ ព្រំ រ៉ៃ ត្រូវទទួលបន្ទុកកូនចិញ្ចឹមកូនស្រីម្នាក់បន្ទាប់ពីចែកផ្លូវជាមួយភរិយា។ ជីវិតជាជនពិការ និងថែមទាំងបែកបាក់ពីភរិយាផង លោកថាខ្លួនលោកហាក់តែលតោល និងថែមទាំងមានគំនិតចង់សំលាប់ខ្លួនផង។
ទោះយ៉ាងណាជីវិតលោក ព្រំ រៃ បានប្រែប្រួល ប្រែប្រួលដោយសារលោកបានមករៀនជំនាញដេរកាបូបនៅអង្គការក្រៅរដ្ឋាភិបាលមួយក្នុងទីក្រុងភ្នំពេញ និងបានឃើញជនពិការដទៃទៀតមានស្ថានភាពលំបាកជាងលោក តែ មានការតស៊ូជាងរូបលោកទៅវិញ។
លោកមានប្រសាសន៍ថាៈ «កាលដែលយើងមិនទាន់មានជំនាញណាអូន អត់ចង់រស់នៅទេ...អង្គុយមុខផ្ទះឃើញគេទៅណាមកណីស្រួល ដ៏យើង(ពិការ)អ៊ីចឹង អត់ចង់រស់នៅ តែដ៏មានអង្គការមួយ រើសខ្ញុំមកបណ្តុះបណ្តាលវិជ្ជាជីវៈហ្នឹង ខ្ញុំមកដល់ឃើញគេពិបាកជាងខ្ញុំ...មានអារម្មមួយគិតថាគេពិបាកចង់ងាប់នៅទ្រាំរស់នៅបាន ចុះឯងនៅដើរបាន ដៃ ភ្នែកនៅប្រើការបាន តែចង់ស្លាប់ ដ៏អ៊ីចឹងអារម្មខ្ញុំផ្លាស់ប្តូរ»។
ក្រោយពីចេះជំនាញហើយ បុរសមានស្រុកកំណើតនៅខេត្តកំពង់ធំរូបនេះបានចូលបំរើការនៅសហគ្រាសសង្គម Smart Craft ដោយអាចឲ្យលោកមានចំណូលចិញ្ចឹមជីវិត និងអាចឲ្យកូនស្រីរៀនសូត្របានទៀតផង។ ជំនាញដែលលោកបានរៀនគឺ រៀនដេរកាបូបក្រណាត់ធម្មតា តែពេលលោកប្រឡូកក្នុងវិស័យការងារលោកបានដេរកាបូបពីពោះវៀនរថយន្ត និងបាវស៊ីម៉ងត៍។ ក្នុងមួយថ្ងៃ លោកថា លោក អាចដេរបានយ៉ាងតិចកាបូបចំនួនពីរឬច្រើនជាងនេះទៅតាមប្រភេទនៃកាបូប។
ក្រោយពីរកឃើញនូវពន្លឺជិវិតថ្មី លោក ព្រំ រ៉ៃ ក៏មិនភ្លេចដែរនូវការផ្តែផ្តាំទៅកាន់ជនពិការដូចរូបលោកផ្សេងទៀតមិនត្រូវអស់សង្ឃឹមក្នុងជីវិត ពោលត្រូវតស៊ូជម្នះជោគវាសនាអាក្រក់នានា ដែលលោកថាទើបជីវិតមានពន្លឺភ្លឺស្វាង និងក្លាយជាបុគ្គលល្អម្នាក់ក្នុងសង្គម៕
ចុចទស្សនាវីដេអូ ៣០ដេលី៖