ឡៅ ចន្រ្ទា និយាយអ្វីខ្លះចំពោះគីឡូ៦៥ បច្ចុប្បន្នមិនសូវបានជោគជ័យ

2017-11-23 08:07:01
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករជើងខ្លាំងវ័យក្មេងរបស់កម្ពុជា ឡៅ ចន្រ្ទា មួយរយៈពេលចុងក្រោយនេះហាក់ដូចជាមិនសូវបានជោគជ័យក្នុងការប្រកួតនោះទេ បន្ទាប់ពីរូបគេដំឡើងទម្ងន់ដល់ទៅ ៦៥គីឡូក្រាម ពោលមានចាញ់មានស្មើ។

កីឡាករ ឡៅ ចន្រ្ទា

ឡៅ ចន្រ្ទា បានឲ្យដឹងថា កាលវ៉ៃត្រឹមទម្ងន់ ៦៣,៥ មិនសូវជាមានកីឡាករខ្លាំងៗនោះឡើយ មិនថាកម្លាំង ឬស្នៀតប្រយុទ្ធទេគឺប្រហាក់ប្រហែលគ្នាតែម្ដង ដោយឡែកចំពោះទម្ងន់ថ្មី ៦៥គីឡូក្រាមនេះ គឺមានជើងខ្លាំងច្រើនសម្រាប់ថៃ មានទាំងកីឡាករក្មេងៗនិងចាស់វស្សាក៏មានដែរ។

កីឡាករ ឡៅ ចន្រ្ទា ក្រហម

ម្ចាស់ខ្សែក្រវាត់៣ស្ថាប័នរូបនេះបង្ហើបឲ្យដឹងទៀតថា អាចថាជាប្រភេទទម្ងន់ថ្មីដែលរូបគេមិនសូវមានបទពិសោធ ណាមួយកីឡាករថៃជើងចាស់មានបទពិសោធជោកជាំលើប្រភេទទម្ងន់រួមនឹងក្បាច់ល្អទៀតនោះ វាពិបាកដែរសម្រាប់កីឡាករកម្ពុជាក៏ដូចជារូបគេយកជ័យជម្នះ។ កីឡាករថៃបើល្អវ៉ៃប្រយោល និងពូកែចាប់ឡាំហើយគឺពិបាកយកឈ្នះលើពួកគេណាស់។ និយាយការហ្វឹកហាត់វិញ ប្អូនប្រុស ឡៅ ស៊ីណាត រូបនេះគឺធ្វើការហ្វឹកហាត់ត្រៀមជាធម្មតាដូចមុនអញ្ចឹងមិនធ្វេសប្រហែលនោះទេ។

កីឡាករ ឡៅ ចន្រ្ទា

ឡៅ ចន្រ្ទា ជាជើងខ្លាំងប្រចាំក្លឹបប្រដាល់ ទ័ពពិសេសឆ័ត្រយោង ៩១១ និងជាម្ចាស់ខ្សែក្រវាត់៣ស្ថាប័នទៀតផង ប្រកួតលើកចុងក្រោយចាញ់ពិន្ទុកីឡាករឆ្លងដែនមកពីប្រទេសថៃ ហើយនៅថ្ងៃអាទិត្យទី២៦ វិច្ឆិកា ២០១៧ នេះ គេនឹងត្រូវប្រកួតសងសឹកអ្នកប្រដាល់ថៃ Kla Khunserk ក្នុងកម្មវិធី Carabao ម៉ោង៦ល្ងាចតទៅ៕

អត្ថបទ៖ នួន ស៊ីណា