ដឹកនាំរឿងលើកនេះ ធ្វើឲ្យនាយ គ្រឿន ភ្លឺភ្នែក

2017-11-23 09:53:25
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសំណើចមិនចេះរីងស្ងួត នាយ គ្រឿន បានលើកឡើងថា មកដល់ពេលនេះនាយដឹកនាំសម្ដែងបាន៣រឿងមកហើយ ប៉ុន្តែមានតែស្នាដៃទី៣ប៉ុណ្ណោះ ដែលធ្វើឲ្យនាយភ្លឺភ្នែក ដោយអះអាងទទួលបានបច្ចេកទេស និងគំនិតថ្មីជាច្រើនពីអ្នកបច្ចេកទេសល្បីឈ្មោះម្នាក់ ទើបមកពីបរទេស។

តារាកំប្លែងរូបនេះ បន្តថា ស្នាដៃ២កន្លងមកមានដូចជារឿង “ជួបស៊យ” និង “ថតកុន” គឺលោកដឹកនាំទៅតាមអ្វីដែលចេះតាមគ្នា និងមានការបង្ហាត់បង្ហាញខ្លះ ពីម្ចាស់ផលិតកម្ម LD Picture លោក លៀក លីដា។ យ៉ាងណាសម្រាប់ស្នាដៃទី៣ ដែលត្រៀមថតបញ្ចប់ក្នុងពេលឆាប់ៗខាងមុខ គឺមានជំនួយបច្ចេកទេសបន្ថែម ពីអ្នកជំនាញបច្ចេកទេសប្លង់ និងភ្លើង។

នាយ គ្រឿន បញ្ជាក់ថា ក្រោយមានការផ្ដល់យោបល់ពីអ្នកបច្ចេកជនបរទេស បានធ្វើឱ្យនាយកាន់តែមានគំនិតថែមទៀត ហើយជឿជាក់ថា ស្នាដៃថ្មីរបស់ខ្លួនរឿង”មនុស្សឆ្កួត” កាន់តែមានទំនុកចិត្តកាន់តែខ្លាំង។ តារាកំប្លែងរូបនេះ បន្តថា ស្នាដៃថ្មីនេះមានការពង្រឹងគុណភាពខ្ពស់ជាងមុន តាមរយៈសកម្មភាពភាពកាន់តែរស់រវើក ដែលនាយស្ទើរតែនឹកស្មានមិនដល់។ នាយ គិតថា វាជារសជាតិថ្មីប្លែកសម្រាប់ប្រិយមិត្ត និងទស្សនិកជន ដែលនិយមចូលចិត្តវិស័យភាពយន្ត។

តារាកំប្លែងមានប្រភពមកពីខេត្តស្វាយរៀង សង្កត់ធ្ងន់ថា ស្នាដៃទី៤របស់នាយ អាចនឹងកើតឡើងក្នុងពេលឆាប់ៗខាងមុខ បន្ទាប់ពីនាយទទួលបានបច្ចេកទេសល្អពីអ្នករៀបចំប្លង់ និងភ្លើងល្បីឈ្មោះរូបនេះមក។

នាយ គ្រឿន ជាតារាកំប្លែងល្បីឈ្មោះ ប្រចាំស្ថានីយទូរទស្សន៍ CTN។ នាយផ្ដើមបោះជំហានចូលជាអ្នកដឹកនាំរឿងកាលពីពេលថ្មីៗ ក្រោយពីមានផ្ដល់សេចក្ដីទុកចិត្តពីម្ចាស់ផលិតកម្ម LD Picture។ រឿង ”មនុស្សឆ្កួត” ដែលនាយបញ្ជាក់ថា ធ្វើឱ្យអាជីពជាអ្នកដឹកនាំរឿងរបស់លោកកាន់តែល្អជាងមុន ត្រៀមនឹងចាក់បញ្ចាំងនៅចុងឆ្នាំ២០១៧នេះ៕

អត្ថបទៈ ចរិយា