ដូណាល់ ត្រាំ ចំណាយពេលវាយកូនគោល ច្រើនជាង អូបាម៉ា ៣ដង ក្រោយកាន់ដំណែង១ឆ្នាំ

2017-11-27 07:28:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ដូណាល់ ត្រាំ បានចំណាយពេល ៨១ថ្ងៃ នៅលើទីលានវាយកូនគោល ក្នុងរយៈពេល១ឆ្នាំដំបូងរបស់លោក ក្នុងនាមជាប្រធានាធិបតិអាមេរិក។

លោក ដូណាល់ ត្រាំ

លោក ត្រាំ បន្ទាប់ពីលេងវាយកូនគោល នៅឯ Trump International Golf Club នៃទីក្រុង West Palm Beach រដ្ឋ Florida នាចុងសប្ដាហ៍កន្លងទៅនេះ បើគិតទៅបានចំណាយពេលលេងកីឡានេះ ច្រើនជាងអតីតប្រធានាធិបតី George W Bush ក្នុងអំឡុងពេលកាន់តំណែង ៨ឆ្នាំទៅទៀត។

អតីតប្រធានាធិបតី George W Bush

ជាមួយគ្នានេះដែរ លោក ត្រាំ បានចំណាយពេលច្រើនជាងដល់ទៅ ៣ដង បើប្រៀបធៀបជាមួយអតីតប្រធានាធិបតី បារ៉ាក់ អូបាម៉ា ក្នុងអំឡុងពេលកាន់តំណែងរយៈពេល ១ឆ្នាំដំបូង។ នេះបើយោងតាមសារព័ត៌មាន Independent។

ជាទូទៅ ការលេងវាយកូនគោលរបស់ លោក ត្រាំ តែងតែត្រូវលាក់បាំងដោយក្រុមជំនួយការសេតវិមាន ដែលនិយាយថា លោក ត្រាំ នឹងចំណាយពេលចុងសប្ដាហ៍ដើម្បីធ្វើការ ឬ នៅក្នុងកិច្ចប្រជុំ។

លោក ត្រាំ ដែលជាអតីតតារាទូរទស្សន៍ និងអ្នកជំនួញអចលនទ្រព្យ ធ្លាប់បានរិះគន់លោក អូបាម៉ា ចំពោះការលេងវាយកូនគោលនេះ ដោយចំអកដល់ក្រមសីលធម៌ការងាររបស់លោក អូបាម៉ា ទៀតផង។

នៅក្នុងខែតុលា ឆ្នាំ២០១៤ លោក ត្រាំ ធ្លាប់បានបង្ហោះសារនៅលើបណ្ដាញសង្គម Twitter ថា «តើអ្នកអាចជឿទេ ជាមួយនឹងបញ្ហា និងការលំបាកទាំងអស់ ដែលប្រឈមនឹងសហរដ្ឋអាមេរិក លោកប្រធានាធិបតី អូបាម៉ា បែរជាចំណាយពេលលេងវាយកូនគោលទៅវិញ»។

លោក បារ៉ាក់ អូបាម៉ា

គួរបញ្ជាក់ថា លោក បារ៉ាក់ អូបាម៉ា បានចំណាយពេលលេងវាយកូនគោល ចំនួន ២៦ជុំ បន្ទាប់ពីកាន់តំណែងបាន១ឆ្នាំដំបូង និងរហូតដល់ទៅ ៣៣៣ជុំ ក្នុងរយៈពេលកាន់តំណែង ៨ឆ្នាំ ខណៈ លោក George W Bush លេងត្រឹមតែ ២៤ជុំប៉ុណ្ណោះ ក្នុងរយៈពេលកាន់តំណែង ៨ឆ្នាំ ព្រោះលោកបានឈប់លេង នៅក្នុងឆ្នាំ២០០៣ ដោយសារតែ ការរិះគន់អំពីពេលវេលាទំនេររបស់លោក ក្នុងអំឡុងសង្គ្រាមអ៊ីរ៉ាក់៕

ប្រភព៖ Independent ប្រែសម្រួល៖ សេង ឡុង