Wenger៖ គ្មានទេ រឿង Sanchez និង Ozil ចេញពី Arsenal នៅខែមករា

2017-11-28 12:54:21
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹប Arsenal លោក Arsene Wenger ក្នុងថ្ងៃនេះបាននិយាយថា ទាល់តែមានរឿងមិនគួរឲ្យជឿកើតឡើង ទើបខ្សែប្រយុទ្ធស្លាប Alexis Sanchez និងខ្សែបម្រើប្រយុទ្ធ Mesut Ozil ចាកចេញពីក្លឹបកាំភ្លើងធំនៅខែមករាខាងមុខ។

ពេលដែលត្រូវបានអ្នកសារព័ត៌មានសួរថាតើ Sanchez និង Ozil នឹងបន្តនៅ Arsenal ឬទេ នៅខែមករា លោក Wenger បានឆ្លើយតបវិញថា៖ "ហ្នឹងហើយ ប្រាកដណាស់។ បើតាមការគិតរបស់ខ្ញុំ ពួកគេនឹងបន្តលេងឲ្យក្លឹបរហូតដល់រដូវកាលនេះចប់។ ទាល់តែមានរឿងមិនគួរឲ្យជឿកើតឡើង ទើប Sanchez និង Ozil នឹងចាកចេញនៅខែមករា"។ អ្នកចាត់ការសញ្ជាតិបារាំងរូបនេះបានបន្តទៀតថា៖ "ដរាបណា ពួកគេនៅបន្តលេងឲ្យក្លឹប ពួកគេនឹងប្រឹងប្រែងគ្រប់បែបយ៉ាងដើម្បីលេងឲ្យបានល្អនៅក្នុងក្លឹបមួយនេះ"។

ទោះជាយ៉ាងណា ពេលសួរថា តើកីឡាករទាំងពីរនឹងបន្តលេងឲ្យក្លឹបកាំភ្លើងធំទៀតទេ ក្រោយរដូវកាលនេះបានបញ្ចប់ លោក Wenger បាននិយាយថា៖ "ខ្ញុំមិនមែនជាអ្នកសម្រេចទេ រឿងហ្នឹង។ ពួកគេទេដែលជាអ្នកសម្រេច"។

បើគ្មានអ្វីប្រែប្រួលទេ ទាំង Sanchez និង Ozil នឹងផុតកុងត្រាជាមួយ Arsenal ហើយនៅពេលរដូវកាល ២០១៧/២០១៨ បញ្ចប់ទៅ។

តាំងពីចាកចេញពីក្លឹប Barcelona មកចូលរួមជាមួយ Arsenal នៅក្នុងឆ្នាំ ២០១៤ មក ខ្សែប្រយុទ្ធ Sanchez បានរកគ្រាប់បាល់ឲ្យក្លឹបមួយនេះរហូតដល់ទៅ ៥៦ គ្រាប់ក្នុងការបង្ហាញខ្លួន ១១៣លើក។ ចំណែកឯ Ozil វិញ បានមកលេងឲ្យក្លឹបកាំភ្លើងធំ មុន Sanchez មួយរដូវកាល ហើយបានធ្វើការបញ្ជូនបាល់ឲ្យមិត្តរួមក្រុមស៊ុតដល់ទៅ ៤៥លើក តាំងពីពេលនោះមក៕

ប្រែសម្រួល៖ ហ៊ីម រស្មី