មកស្គាល់ការងារទាំង៦ គ្រោះថ្នាក់បំផុត នៅជុំវិញពិភពលោក

2017-11-29 03:54:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រសិនបើអ្នកកំពុងស្វែងរកការងារធ្វើ ដែលផ្សងព្រេង និងប្រថុយគ្រោះថ្នាក់ នោះអ្នកត្រូវតែគិតឡើងវិញម្ដងទៀត។ ការងារទាំងនោះអាចផ្ដល់ប្រាក់ឈ្នួលច្រើន ប៉ុន្តែក៏គ្រោះថ្នាក់ខ្លាំងផងដែរ។

ខាងក្រោមនេះគឺជាការងារទាំង៦ ដែលអាចបង្កគ្រោះថ្នាក់បំផុត នៅជុំវិញពិភពលោក

#១ អ្នកយកពិសពស់

អ្នកយកពិសពស់ ធ្វើការច្របាច់ពិសពស់ ចូលទៅក្នុងប្រអប់ផ្លាស្ទិក។ វាត្រូវបានយកទៅប្រើប្រាស់ជាច្រើនយ៉ាង ប៉ុន្តែសំខាន់បំផុតគឺប្រើនៅក្នុងការស្រាវជ្រាវវេជ្ជសាស្ត្រ ឬ ផលិតថ្នាំការពារពិស។

ប្រាក់ឈ្នួលប្រចាំឆ្នាំជាមធ្យម ៖ ៣០ ០០០ដុល្លារ

#២ អ្នកជិះគោជល់

ការងារនេះទទួលបានការចាប់អារម្មណ៍ខ្លាំង នៅអំឡុងចុងឆ្នាំ ១៩៩០ នៅពេលដែលការជិះរយៈពេល ត្រឹម៨វិនាទី អាចទទួលបានប្រាក់កម្រៃច្រើន។ ជាក់ស្ដែង លុយទាំងនោះមិនសមនឹងផលវិបាកឡើយ។ តួលេខបានបង្ហាញថា អ្នកជិះគោលជល់ម្នាក់ អាចទទួលរងរបួសយ៉ាងធ្ងន់ធ្ងរ ដូចជាបាក់ឆ្អឹងជាដើម រៀងរាល់ការជិះចំនួន ១៥លើក។

ប្រាក់ឈ្នួលប្រចាំឆ្នាំជាមធ្យម ៖ ១០៧ ០០០ដុល្លារ

#៣ មគ្គុទ្ទេសក៍ភ្នំ

ការជម្នះឡើងកំពូលភ្នំខ្ពស់ៗ គឺជាក្ដីសុបិនសម្រាប់មនុស្សមួយចំនួន រហូតបង្កើតឲ្យមានការងារថ្មីមួយ គឺ មគ្គុទ្ទេសក៍ភ្នំ។ ការងាររបស់ពួកគេ មិនត្រឹមតែនាំផ្លូវប៉ុណ្ណោះទេ ប៉ុន្តែត្រូវលីសម្ភារៈ ឬ ឧបករណ៍ធ្ងន់ៗ , ហ៊ានសាកល្បងផ្លូវគ្រោះថ្នាក់មុនគេ និង ទទួលខុសត្រូវចំពោះសុវត្ថិភាពរបស់អ្នកដទៃទៀតផង។

ប្រាក់ឈ្នួលប្រចាំឆ្នាំជាមធ្យម ៖ ៧០ ០០០ដុល្លារ

#៤ អ្នកផលិតបន្ទះឈីបខ្នាតតូច (Microchip)

យើងទាំងអស់គ្នា រីករាយនឹងការដែលមានកុំព្យូទ័រ និងទូរសព្ទដៃទំនើបប្រើប្រាស់ ប៉ុន្តែវាប្រឈមនឹងហានិភ័យខ្លាំង សម្រាប់អ្នកដែលផលិតវា។ សារធាតុគីមីដែលមានគ្រោះថ្នាក់ជាច្រើន ដូចជា អសេនិក (Arsenic) ត្រូវបានប្រើដើម្បីផលិតបន្ទះឈីបកុំព្យូទ័រ។ ខណៈពេលដែលវាមិននាំមកនូវផលប៉ះពាល់ភ្លាមៗ ប៉ុន្តែផលប៉ះពាល់នៅពេលក្រោយ រួមមាន ការរលូតកូន , ពិការភាពពីកំណើត , ជំងឺផ្លូវដង្ហើម និង ជំងឺមហារីក ផងដែរ។

ប្រាក់ឈ្នួលប្រចាំឆ្នាំជាមធ្យម ៖ ៦១ ០០០ដុល្លារ

#៥ អ្នកឆ្លើយឆ្លងព័ត៌មានសង្គ្រាម

ការរាយការណ៍ព័ត៌មានពិតទៅឲ្យពិភពលោកទាំងមូលដឹង គឺមានសារៈសំខាន់ណាស់ ប៉ុន្តែប្រឈមនឹងហានិភ័យខ្ពស់ ដូចជា ត្រូវគេចាប់ជំរិត , ធ្វើទារុណកម្ម និង ស្លាប់ ជាដើម។ នៅពេលដែលអ្នកស្ថិតនៅកណ្ដាលសមរភូមិ នោះអ្នកប្រាកដជាត្រូវគេចាត់ទុកថាជាសត្រូវ មិនមែនជាអ្នកកាសែតឡើយ។

ប្រាក់ឈ្នួលប្រចាំឆ្នាំជាមធ្យម ៖ ៣៦ ០០០ដុល្លារ

#៦ អ្នកនេសាទ

កុំគិតថាការនេសាទ គឺជាការងារដែលប្រកបដោយសន្តិភាព និងសមាធិ។ ជាទូទៅ អ្នកនេសាទមានការងារដែលគ្រោះថ្នាក់បំផុតមួយ ដោយសារតែអាកាសធាតុមិនល្អ , ឧបករណ៍ខូច និង ឧប្បត្តិហេតុ ដែលទាក់ទងនឹងការដឹកជញ្ជូន។ ការងារនេះមានអត្រាស្លាប់ខ្ពស់បំផុត៕

ប្រាក់ឈ្នួលប្រចាំឆ្នាំជាមធ្យម ៖ ៣០ ០០០ដុល្លារ

ចុចអាន៖

ប្រភព៖ Brightside ប្រែសម្រួល៖ សេង ឡុង