គីឡូម៉ែត្រទី “០” គិតរយៈចម្ងាយពីភ្នំពេញទៅបណ្តាខេត្ត អ្នកដំណើរខ្លះអាចមិនស្គាល់

2017-12-03 09:21:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតនៅភាគខាងជើងនៃរមណីយដ្ឋានវត្តភ្នំ និងត្រូវបានកសាងឡើងលំនាំរចនាបថខ្មែរ អមដោយការបង្ហាញទិសដៅខេត្តនីមួយៗទូទាំងប្រទេស នៅទីនោះហើយគឺជាគីឡូម៉ែត្រទីសូន្យ ដែលគិតនូវរយៈចម្ងាយពីភ្នំពេញឆ្ពោះទៅតាមបណ្តាខេត្តនានាទូទាំងព្រះរាជាណាចក្រកម្ពុជា។

អ្នកដំណើរមួយចំនួនហាក់មិនបានចាប់ភ្លឹកទៅនឹងទីតាំងខាងលើប៉ុន្មានឡើង និងគ្រាន់តែដឹងថា រមណីយដ្ឋានវត្តភ្នំគឺជាទីតាំងមួយរាប់នូវរយៈចម្ងាយឆ្ពោះទៅកាន់បណ្តាខេត្តតែប៉ុណ្ណោះ។ ជាក់ស្តែងយុវជន ម៉ែន បញ្ញា និស្សិតសាកលវិទ្យាល័យជាតិគ្រប់គ្រង ដែលបានដើរកម្សាន្តនៅរមណីយដ្ឋានវត្តភ្នំឱ្យដឹងថា ខ្លួនតែងធ្វើដំណើរកាត់ទីតាំងខាងលើព្រឹកល្ងាច ប៉ុន្តែមិនដឹងទីតាំងខាងលើគឺជាចំណុចគីឡូម៉ែត្រទីសូន្យឡើយ។ បញ្ញា រៀបរាប់ថា “ខ្ញុំរៀងភ្ញាក់ផ្អើលបន្តិចដែរ ព្រោះមិនដែលចាប់ភ្លឹក និងចង់ស្នើទៅសាលាក្រុងដាក់ស្លាកបង្ហាញធំមួយ ហើយចំពោះមគ្គុទេសចរទៀតសោតក៏គួរតែណែនាំឱ្យភ្ញៀវទេសចរជាតិ និងអន្តរជាតិបានស្គាល់ទីតាំងខាងលើនេះដែរ”។

ចំណែកលោក វិបុល អ្នករត់ម៉ូតូរឺម៉កកង់បី និងតែងឈប់សំចតក្បែរទីតាំងខាងលើស្ទើរាល់ថ្ងៃក៏ មិនបានដឹងថា បង្គោលថ្មខាងលើគឺជាទីតាំងគីឡូម៉ែត្រទីសូន្យឡើយ ហើយគិតថា គ្រាន់តែការបោះបង្ហោះព្រមទាំងបង្ហាញទិសធម្មតាប៉ុណ្ណោះ។ លោក វិបុលបញ្ជាក់ថា៖ “ការពិតខ្ញុំនៅរស់នៅផ្ទះជួលម្តុំហ្នឹងយូរដែរ តែអត់ដឹង ខ្ញុំគិតថា អ្នកផ្សេងទៀតក៏ប្រហែលមិនដឹងដែរ”។

អ្នកស្រី ទាវ បុប្ឆា ប្រជាពលរដ្ឋរស់នៅម្តុំវត្តភ្នំឱ្យដឹងថា ទីតាំងខាងលើសាងសង់ឡើងប្រហែល ៤ ឆ្នាំ ទៅ៥ ឆ្នាំហើយ ប៉ុន្តែអ្នកស្រីផ្ទាល់ក៏មិនចាប់អារម្មណ៍ ទីនេះជាគីឡូម៉ែត្រទីសូន្យដែរ។ “ខ្ញុំមិនដឹងថា នៅប្រទេសគេមានការតាំងបង្ហាញបែបណាទេ ប៉ុន្តែនៅទីនេះផ្ទាល់ខ្ញុំចង់ឱ្យសាលាក្រុងដាក់ស្លាកបង្ហាញមួយធំមួយដើម្បីឱ្យអ្នកដំណើរបានស្គាល់”។ អ្នកស្រី បន្ថែម។

ទីតាំងខាងលើអាចជាការស្វែងយល់ទូទៅមួយក្នុងចំណោមយុវជនខ្មែរ ដូចនេះបើអាចសាលារាជធានីគួរដាក់ស្លាកបង្ហាញឱ្យធំ។ នេះបើតាមឱ្យរបស់យុវជន ម៉ៅ មិថុនា និស្សិតសាកលវិទ្យាល័យន័រតុន។ មិថុនា ឱ្យដឹងថា ម្នាក់ៗដឹងត្រឹម វត្តភ្នំគឺជាទីតាំងកំណត់រយៈចម្ងាយពីរាជធានីភ្នំពេញទៅតាមបណ្តាខេត្ត ប៉ុន្តែនេះគឺជាទីតាំងច្បាស់លាស់មួយ ដែលត្រូវបានកំណត់ដោយសាលារាជធានីភ្នំពេញ។