រកឃើញម្ចាស់ជយលាភីភាពយន្តឆ្នើម ក្នុងមហោស្រពភាពយន្តជាតិលើកទី៥ហើយ
- 2017-12-11 00:44:11
- ចំនួនមតិ 0 | ចំនួនចែករំលែក 0
រកឃើញម្ចាស់ជយលាភីភាពយន្តឆ្នើម ក្នុងមហោស្រពភាពយន្តជាតិលើកទី៥ហើយ
ចន្លោះមិនឃើញ
រឿង «តម្លៃសេ្នហ៍» និយាយអំពី «យុវជនរិទ្ធិ ដែលជាមនុស្សចង់មានសេរីភាពមិនគិតអ្វីទាំងអស់ ដូចនេះទើបគេកុហកថាកំពុងស្រលាញ់នារីម្នាក់ ដើម្បីគេចចេញពីការចាប់បង្ខំឱ្យរៀបការដោយឪពុកម្តាយ»។
ភាពយន្តនេះដឹកនាំរឿងដោយលោក ម៉ាធ្យូ រ៉ូប៊ីនសុន បានជាប់ពានរង្វន់មាស ជយលាភីភាពយន្តឆ្នើម (Best Film) ក្នុងមហោស្រពភាពយន្តជាតិលើកទី៥ អមជាមួយពានរង្វន់ តួរសម្តែងស្រីឆ្នើម សម្តែងដោយ កញ្ញា ស៊ិន យូបិន និងពានរង្វន់ជយលាភីអ្នកថតភាពយន្តឆ្នើម (Best Cinematographer) ដោយលោក មឿន វណ្ណា និងពានរង្វន់អ្នកប្រព្រឹត្តិកម្មភាពយន្តឆ្នើម (Best Post Production )របស់ផលិតកម្មខ្មែរមេគង្គ។ ក្រៅពីនោះពានរង្វន់ អ្នកនិពន្ធភាពយន្តឆ្នើម (Best Screen Play) និងពានរង្វន់ភាពយន្តដែលមានប្រជាប្រិយភាព បានទៅលើ ខ្សែភាពយន្ត ទឹកចិត្តម្តាយសម័យថ្មី និពន្ធដោយអ្នកស្រី ពាន់ ភួងបុប្ផា ក្នុងផលិតកម្មទីក្រុងភាពយន្ត។
ជយលាភីអ្នកដឹកនាំរឿងឆ្នើម (Best Director) បានទៅលោក លោក ជុំ វិចិត្រ ដែលដឹកនាំសម្តែងរឿង ស៊ុបភើរមាំ ដែលនិយាយអំពី «គ្រួសារដែលរស់នៅជាប់របងគ្នាតែងតែមានការទាស់ទែងគ្នារវាងប្រពន្ធ និងប្រពន្ធ។ ចំណែកឯប្តី និងប្តីគឺជាមិត្តភ័ក្តិនឹងគ្នា ហើយកូន និងកូនក៏មានចិត្តទៅលើគ្នាដែរ។ ដោយសារតែម្តាយទាំងសងខាងមិនមានការចុះសម្រុងនឹងគ្នា ក៏បានធ្វើឲ្យស្នេហារវាងកូនទាំង២មានភាពលំបាក» របស់ផលិតកម្ម មហាហង្ស។
ចំណែកឯ ជយលាភីអ្នកសម្តែងប្រុសឆ្នើម (Best Actor) បានទៅលើ លោក អ៊ួង ដារា និង លោក មុត អៀវ ជយលាភីអ្នកតុបតែងឆាកឆ្នើម (Best Props Master) ក្នុងរឿង Jailbreak របស់ផលិតកម្ម កងចក្រភាពយន្ត។
ក្នុងឱកាសបិទមហោស្រពភាពយន្តជាតិលើកទី៥ ដែលប្រព្រឹត្តទៅតាំងពីថ្ងៃទី ៦ រហូតដល់ថ្ងៃទី ១០ នេះ លោកស្រី ភឿង សាកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ក៏មានវត្តមាន ជាកិត្តយស និងបានថ្លៃងកោតសរសើរពីការវិវិឌ្ឃនរបស់វិស័យភាពយន្តខ្មែរ ដែលក្នុងឆ្នាំនេះទទួលបាន ភាពយន្តល្បីៗ រហូតដល់ ១៤ចំណងជើងចូលរួមប្រកួត ព្រមទាំងប្រគល់រង្វន់ពានមាសភាពយន្តឆ្នើម អមជាមួយទឹកប្រាក់ចំនួន ៣០ លានរៀនជូនទៅដល់ម្ចាស់ភាពយន្ត «តម្លៃស្នេហ៍» របស់ផលិតកម្មខ្មែរមេគង្គ។