អស្ចារ្យបំផុត! កូនខ្មែរចេះ១៦ភាសា ហើយសុទ្ធតែអាចប្រើការបាន(មានវីដេអូ)

2017-12-15 03:03:02
ចំនួនមតិ 0 | ចំនួនចែករំលែក 0

ចន្លោះមិនឃើញ

មាននិស្ស័យស្រឡាញ់ការសិក្សារៀនសូត្រតាំងពីតូចក្រូចឆ្មា និងផ្ដើមពីការចូលចិត្តអានសៀវភៅនិយាយពីបុគ្គលល្បីៗលើពិភពលោកអាចប្រើប្រាស់បានច្រើនភាសា ធ្វើឲ្យកូនខ្មែរមួយមានមហិច្ឆតាចង់ក្លាយដូចជាបុគ្គលទាំងនោះដែរ និងតាំងគោលជំហររៀនមិនលោះថ្ងៃគ្រប់ទីកន្លែង រហូតអាចប្រើប្រាស់ភាសាបរទេសជុំវិញពិភពលោកយ៉ាងស្ទាត់ជំនាញដល់ ១៦ភាសាឯណោះ។

រៀបរាប់មកកាន់ Sabay នឹម លាងហេង មានស្រុកកំណើតមកពីខេត្តកំពង់ចាមរូបនេះ ប្រាប់ថា ចាប់ផ្ដើមរៀនមុនគេបង្អស់ គឺភាសាអង់គ្លេសក្នុងឆ្នាំ ១៩៩៩ ក្នុងពេលដែលលោកបួសជាព្រះសង្ឃនៅឯស្រុកកំណើត ប៉ុន្តែមិនមែនសាលាធំដុំអ្វីនោះទេ។ ជាឱកាសល្អមិនរង់ចាំយូរ ក្នុងឆ្នាំដដែល លាងហេង បានស្គាល់គ្រូខ្មែរសុរិន្ទម្នាក់ចេះភាសាថៃ ហើយក៏បានរៀនដំណាលគ្នាជាមួយភាសាអង់គ្លេសនោះតែម្ដងជាមួយសិស្សពីរបីនាក់ផ្សេងទៀត។

និយាយពីភាសាថៃដដែល យុវជនឈ្មុសឈ្មុលជាមួយការរៀននេះ បានស្គាល់ជាមួយគ្រូម្នាក់ទៀត មកពីខេត្តកំពង់ធំ ធ្លាប់ទៅធ្វើការនៅប្រទេសថៃចេះភាសាថៃច្បាស់លាស់ លោកក៏បានសុំគ្រូនោះរៀនបន្ថែមទៀត ចេះល្មមអាចប្រើប្រាស់បាន។ ចំណែកឯភាសាអង់គ្លេសក៏ចេះអាចប្រើការបានដំណាលគ្នានៅពេលនោះ។

កំឡោះរូបសង្ហារវ័យ៣១ឆ្នាំនេះ បន្តទៀតថា បន្ទាប់ពីចេះពីរភាសានេះហើយ ក្នុងឆ្នាំដដែលលោកក៏រៀនភាសាជប៉ុន និងភាសាចិនបន្ថែមទៀត បានរយៈពេលជាងមួយឆ្នាំ ប៉ុន្តែនៅមិនទាន់អាចប្រើការបាននៅឡើយទេ។

ពេលវេលាចេះតែរំកិលទៅមុខ ក្នុងឆ្នាំ ២០០១ លាងហេង បានចាកចេញពីស្រុកកំណើតឃ្លាតឆ្ងាយពីគ្រួសារ ដើម្បីបន្តការសិក្សាថ្នាក់បរិញ្ញាបត្រនៅរាជធានីភ្នំពេញ។ នៅលើទឹកដីភ្លើងពណ៌នេះ លាងហេងមិនបោះបង់គោលបំណងរបស់ខ្លួនឡើយ លោកក៏បានស្វះស្វែងរកសាលារៀនភាសា កូរ៉េ ជប៉ុន ចិន និងអង់គ្លេសឲ្យចេះកាន់តែច្បាស់ថែមទៀតរហូតចេះច្បាស់លាស់។

ឱកាសចេះតែផ្ដល់ឲ្យជាបន្តបន្ទាប់ លោកក៏បានស្គាល់អតីតនិស្សិតម្នាក់ធ្លាប់ជាប់អាហារូបករណ៍នៅប្រទេសរុស្ស៊ី ហើយក៏បានធ្វើការក្នុងស្ថានទូតរុស្ស៊ី មិនបង្អែបង្អង់យូរ លាងហេង ក៏បានទំនាក់ទំនងរៀនភាសានេះ បានរយៈពេលជាង១ឆ្នាំ និងអាចប្រើប្រាស់បាន។

បន្ទាប់មកទៀត គ្រូភាសាបរទេសចេះច្រើនភាសារាប់មិនអស់នេះ បានទៅធ្វើការស្ម័គ្រចិត្តនៅអង្គការ CCF (Cambodia Children's Fund) របស់លោកស្កុតនីសិន។ ប្រៀបដូចជាទេវតាប្រទានឱកាសអ៊ីចឹង នៅទីនោះលោកបានស្គាល់គ្រូបរទេសជាច្រើន ដែលធ្វើការស្ម័គ្រចិត្តដូចជា គ្រូបារាំង អាមេរិក អាល្លឺម៉ង់ កាណាដា អូស្ត្រាលី អេស្ប៉ាញ ព័រទុយហ្គាល់។ល។ មិនបណ្ដែតបណ្ដោយឲ្យវេលាកន្លងផុតទៅទទេៗនោះឡើយ លាងហេង បានសុំរៀនជាមួយគ្រូទាំងនោះយ៉ាងចាស់ដៃតែម្ដង ក្រៅពីទំនេរពីការងារ។ ក្នុងនោះភាសាដែលលោករៀនពេលនោះ គឺ អេស្ប៉ាញ អាល្លឺម៉ង់ និងបារាំង។

បើនិយាយពីភាសាអាល្លឺម៉ង់ បន្ទាប់ពីគ្រូនោះត្រឡប់ទៅប្រទេសកំណើតវិញ លោកក៏បានស្គាល់ជាមួយលោកគ្រូម្នាក់ ជាសិស្សធ្លាប់ទៅរៀននៅអាល្លឺម៉ង់ ក៏សុំរៀនដោយមិនគិតប្រាក់កម្រៃនោះទេ រហូតអាចប្រើការបាន។ ទន្ទឹមនឹងនោះ លាងហេង ក៏បង់លុយរៀនភាសាអេស្ប៉ាញ បន្ថែុមទៀតនៅវិទ្យាស្ថានជាតិអប់រំរហូតដល់ចេះយ៉ាងច្បាស់លាស់។

ចំពោះ ភាសាអ៊ីតាលីវិញ កំពូលអ្នករៀនគ្មានគូប្រៀបនេះប្រាប់ថា លោកបានស្គាល់ជនជាតិអ៊ីតាលីម្នាក់ និងបានសុំរៀនទៀត។ ដោយសារភាសានេះមិនខុសគ្នាជាមួយអេស្ប៉ាញ លោកក៏រៀនឆាប់ចេះមិនប្រើពេលវេលាយូរនោះទេ។ កាន់តែពិសេស គ្រូអ៊ីតាលីនោះចេះព័រទុយហ្គាល់ លាងហេងក៏បានរៀនដំណាលគ្នា ហើយក៏ចេះទាំងពីរភាសាក្នុងពេលតែមួយ។

ក្រោយពីចេះភាសាបរទេសជាច្រើនទាំងនោះហើយ អំឡុងឆ្នាំ ២០១១ ដល់ឆ្នាំ ២០១៤ និស្សិតបញ្ចប់ការសិក្សាថ្នាក់បរិញ្ញាបត្រផ្នែកព័ត៌មានវិទ្យាមកពីសាកលវិទ្យាល័យន័រតុនរូបនេះ ក៏សម្រេចចិត្តរៀនភាសាវៀតណាម និងភាសាឥណ្ឌា ដោយជួលគ្រូមកបង្ហាត់ទាល់តែចេះអាចប្រើការបាន។

អ្នកស្រឡាញ់ការសិក្សាដ៏កំពូលនេះ ប្រាប់ទៀតថា ក្រោយមកលោកក៏បានជាប់អាហារូបករណ៍ទៅសិក្សា ថ្នាក់អនុបណ្ឌិតផ្នែកគ្រប់គ្រងធនធានមនុស្សនៅប្រទេសថៃ។ អំឡុងពេលរៀននៅទីនោះ លោកក៏បានស្គាល់និស្សិតមកពីប្រទេសឡាវ ហ្វីលីពីន បង់ក្លាដេស ក៏សុំពួកគេរៀនភាសាទាំងនោះ និងសន្ទនាជាមួយគ្នាជារៀងរាល់ថ្ងៃ។

ក្រោយត្រឡប់មកប្រទេសកម្ពុជាវិញ លាងហេង បានរៀនបន្ថែមភាសាដទៃទៀតដូចជា ឥណ្ឌូណេស៊ី ម៉ាឡេស៊ី និងអារ៉ាប តាមរយៈការស្វះស្វែងរកគ្រូនៅវិហារឥស្លាមផង និងទាក់ទងជាមួយអ្នកចេះភាសាទាំងនោះផង លុះត្រាតែចេះអាចប្រើការបាន។

រហូតមកដល់បច្ចុប្បន្ន លោក នឹមលាងហេង ចេះរហូតដល់១៦ ភាសាឯណោះដូចជា៖ ថៃ អង់គ្លេស កូរ៉េ ចិន ជប៉ុន បារាំង វៀតណាម ឡាវ អេស្ប៉ាញ រុស្ស៊ី ព័រទុយហ្គាល់ ឥណ្ឌូណេស៊ី ម៉ាឡេស៊ី អារ៉ាប ឥណ្ឌា ទួរគី។ ប៉ុន្តែលោកនៅតែមានបំណងចេះភាសាដទៃទៀត មិនបញ្ចប់ត្រឹមប៉ុននេះនោះទេ។

តាមរយៈការចំណាយពេលស្ទើរតែទាំងស្រុងទៅលើការសិក្សាភាសាបរទេសដ៏ច្រើននេះ អស់រយៈពេលជាង១០ឆ្នាំកន្លងមកនេះ សមិទ្ធផលដែលលោកទទួលបានធំបំផុតនោះគឺ ទ្រព្យសម្បត្តិដែលចោរលួចមិនបានគ្មានថ្ងៃសាបសូន្យ គឺចំណេះវិជ្ជាជាច្រើនឥតគណនានេះហើយ។ ជាពិសេសលោកអាចរកប្រាក់ចំណូលតាមរយៈការបង្រៀនតាមសាលា តាមផ្ទះ តាមក្រុមហ៊ុន សឹងតែគ្មានម៉ោងសេសសល់ឡើយ និងបកប្រែតាមកម្មវិធីធំៗ ក៏ដូចជាបកប្រែឯកសារឲ្យបណ្ដាក្រុមហ៊ុននានា។ល៕

ទស្សនាវីដេអូបទយកការណ៍ពិសេសខាងក្រោមនេះ៖