ក្ដៅៗ តួអង្គ X-Men និង Fantastic Four ត្រឡប់មកកាន់ Marvel ជាផ្លូវការហើយ!

2017-12-15 03:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីល្ងាចមិញនេះ ក្រុមហ៊ុន Disney ទើបតែប្រកាសពីការទិញក្រុមហ៊ុន 21st Century Fox ក្នុងតម្លៃកប់ពពកគឺ ៥២,៤ប៊ីលានដុល្លារ។ ការទិញក្រុមហ៊ុននេះ រាប់បញ្ចូលទាំងផលិតផលទាំងអស់របស់ 21st Century Fox និង 21st Century Fox TV ក្នុងនោះតួអង្គសំខាន់ៗដូចជា X-Men និង Fantastic Four ព្រមទាំងរឿងល្បីៗដូចជា "Avatar” នឹងត្រូវកាន់កាប់ដោយក្រុមហ៊ុន Disney ទាំងស្រុង។

លោក Bob Iger CEO ក្រុមហ៊ុន Walt Disney

លោក Bob Iger ដែលជា CEO របស់ក្រុមហ៊ុន Walt Disney បានប្រកាសដូច្នេះថា៖ "យើងមានឱកាសសម្រាប់បំបែកសែស្រឡាយរឿងជាច្រើន សម្រាប់ទស្សនិកជនជំនាន់ក្រោយដូចជា 'Marvel' និង 'Star Wars' ជាដើម ហើយពួកយើងក៏នឹងពង្រីកពិភពភាពយន្តរបស់ Marvel (MCU) ឲ្យកាន់តែធំឡើង ដោយរួមបញ្ចូលទាំង X-Men, Fantastic Four, និង Deadpool។"

បើគិតមកដល់ពេលនេះតួអង្គ X-Men ដែលដកស្រង់ចេញពីសៀវភៅត្លុករបស់ Marvel បានត្រូវគេថតជាភាពយន្តបាន១២ រឿងហើយ រាប់បញ្ចូលទាំងភាពយន្ត Fantastic Four ចំនួន ៣រឿងទៀត ដែលភាពយន្តវគ្គថ្មីទទួលបានភាពបរាជ័យយ៉ាងធ្ងន់ធ្ងរ។

ទោះជាយ៉ាងណាក៏ដោយអ្នកគាំទ្រភាគច្រើន ព្រួយបារម្ភថា Disney នឹងកែប្រែប្រភេទរឿង "Deadpool” ទៅជារឿងសម្រាប់ក្មេង (PG 13) ជាជាងលាយឡំនឹងឈុតឆាកស្រើបស្រាល ឫប្រើប្រាស់ពាក្យមិនសមរម្យ (Rated R)។ ប៉ុន្តែលោក Iger បានប្រកាសថា Disney នឹងមិនកែប្រែអ្វីទាំងអស់ ប៉ុន្តែពួកគេនឹងអាចឃើញតួអង្គ Deadpool ចូលរួមចេញមុខជាមួយនឹងពពួកតួអង្គ Avengers។

នេះគឺជាកិច្ចព្រមព្រៀងមួយដែលបណ្ដាអ្នកគាំទ្រពិភពភាពយន្តរបស់ Marvel បានទន្ទឹងរងចាំយូរមកហើយ ហើយទៅថ្ងៃអនាគតពួកគេនឹងអាចឃើញតួអង្គពី X-Men បង្ហាញខ្លួនជាមួយក្រុម Avengers៕

អានអត្ថបទ៖

អត្ថបទ៖ ធារ៉ូ